00:00:00 IGIHE NETWORK KN KINYARWANDA EN ENGLISH FR FRANCAIS

Prof Binagwaho yashyizwe mu bahanga 100 bagira uruhare muri politike za Guverinoma

Yanditswe na Iradukunda Serge
Kuya 23 Ukuboza 2021 saa 06:11
Yasuwe :

Prof Agnes Binagwaho usanzwe ari Umuyobozi Mukuru wa Kaminuza itanga amasomo ajyanye n’ubuvuzi, University of Global Health Equity (UGHE) iherereye i Butaro mu karere ka Burera yashyizwe ku rutonde rw’abarimu n’abashakashatsi 100 bagira uruhare mu gushyiraho ibyemezo bimwe na bimwe Guverinoma zigenderaho.

Uru rutonde ruzwi nka ‘100 Most Influential Academics in Government’ rwakozwe n’ikigo cyo mu Bwongereza gitanga ubujyanama kuri Guverinoma z’ibihugu cya Apolitical.

Uyu mwaka iki kigo cyakoze urutonde rw’abantu bigisha muri kaminuza cyangwa b’abashakashatsi bakora mu nzego zikunda kwibandwaho na Guverinoma igihe zifata ibyemezo.

Izi nzego n’izijyanye n’izafasha abantu kurenga ingaruka za COVID-19, guhanga umurimo no gutanga ubumenyi, imibereho, ibihe n’iterambere rirambye ndetse n’ishyirwaho rya politike.

Abari kuri uru rutonde ni abahanga baharanira kugira uruhare mu kunoza ibikorwa bya Guverinoma z’ibihugu byabo ndetse ubushakashatsi bwabo bukaba bwaratanze umusanzu ukomeye muri uwo murongo.

Uru rutonde rwakozwe hashingiwe ku makuru yatanzwe n’abantu bakora muri Guverinoma zo hirya no hino ku Isi.

Mu cyiciro cy’abakora mu rwego rw’ubuzima na serivisi zigamije kurenga ingaruka z’icyorezo cya COVID-19, hagaragayeho Umunyarwandakazi Prof Agnes Binagwaho.

Prof Agnes Binagwaho kuri ubu ni Umuyobozi Mukuru wa University of Global Health Equity itanga amasomo ajyanye n’ubuvuzi ariko yanagiye ahabwa inshingano zitandukanye muri Guverinoma y’u Rwanda zirimo no kuba Minisitiri w’Ubuzima.

Abinyujije kuri Twitter, Prof Binagwaho yavuze ko atewe ishema no kuba yashyizwe kuri uru rutonde ariko agaragaza ko hakiri byinshi byo gukorwa mu rwego rw’ubuzima no kurwanya COVID-19.

Yagize ati “Ntewe ishema no kuba ndi kuri uru rutonde rwa Apolitical. Twakoze bike ugereranyije n’ibyashoboraga gukorwa. Benshi barapfuye kandi byashoboraga gukumirwa kuri benshi. abandi barazahajwe bikomeye. Dufite urugendo rurerure, muri iki gihe hakiri akarengane ku Isi.”

Dr. Agnes Binagwaho, ubusanzwe ni umuganga w’inzobere mu kuvura abana. Yakoze mu myanya itandukanye mu nzego z’ubuzima. Kuva mu 2002 kugeza 2008, Dr Binagwaho yabaye Umunyamabanga Nshingwabikorwa wa Komisiyo y’igihugu ishinzwe kurwanya Sida, kuva mu 2008 kugeza muri Gicurasi 2011 agirwa Umunyamabanga Uhoraho muri Minisiteri y‘Ubuzima, umwanya yavuyeho agirwa Minisitiri w’Ubuzima.

Mu mirimo yindi izwi ya Binagwaho, harimo ko ari umwarimu mu ishuri ry’ubuvuzi rya Harvard muri Amerika, yigisha ubuvuzi bw’abana muri Geisel School of Medicine i Dartmouth muri Amerika, akaba yarahawe impamyabumenyi y’icyubahiro muri Dartmouth College mu 2010.

Yahawe impamyabumenyi y’ikirenga, PhD mu 2014, ayiboneye muri kaminuza y’u Rwanda.

Binagwaho kandi yagiye yegukana ibihembo bitandukanye birimo n’icyo yahawe kubera umuhate yagaragaje mu kugabanya imfu z’abana. Yahawe kandi ‘Roux Prize’ kubera uruhare yagize mu guhindura ubuzima akoresheje ibipimo ngenderwaho. iki gihembo cyari gifite agaciro k’ibihumbi 100 by’amadolari ya Amerika.

Prof Binagwaho yashyizwe mu bahanga 100 bagira uruhare muri politike za Guverinoma

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .