Dr Rwigamba washinze ULK yatanze inama zikwiriye kubakirwaho ubuzima

Yanditswe na Twarabanye Venuste
Kuya 22 Nyakanga 2020 saa 08:03
Yasuwe :
0 0

Prof. Dr Rwigamba Balinda ni Umurezi muri Kaminuza kuva mu 1974. Akomoka mu Murenge wa Cyanika mu Karere ka Burera gusa yavukiye i Masisi muri Repubulika Iharanira Demokarasi ya Congo kubera impamvu z’amateka y’igihugu.

Kuva ku mashuri abanza kugeza kuri Kaminuza yize muri RDC ndetse aba ari naho atangirira kwigisha i Lubumbashi mu 1974. Yabonye Impamyabumenyi y’Ikirenga, mu 1982 akomeza ubushakashatsi no kwandika ibitabo aba ‘Professeur’ mu 1991.

Muri urwo rugendo, Dr Rwigamba avuga ko yasabaga Imana ko yamufasha kugira ngo azafashe abandi benshi. Icyo nicyo cyatumye Jenoside ikimara guhagarikwa ataha mu gihugu cye.

Mu kiganiro yagiranye n’urubuga rwa Youtube rwitwa Izingiro, yagize ati “Ntabwo nize mfite umugambi wo kugira ngo mbe umukire, mbe umuherwe, numvaga inshingano zanjye ari ukuba umugaragu w’Imana n’umugaragu w’abantu, niyo mpamvu natahutse mu 1994.”

Intego ye kwari ukureba umusanzu yatanga mu kubaka igihugu cyari cyasenyutse, by’umwihariko kwita ku bacitse ku icumu rya Jenoside.

Ati “Intego yanjye yari ukugira ngo ndebe ukuntu nanjye natanga inkunga mu gusana igihugu cyacu cy’u Rwanda. Ntahuka mvuga nti icyo Imana yampaye cyo kugira ngo mfashe abantu, reka njye mu Rwanda ndebe ukuntu twaramira abacitse ku icumu, ukuntu twakwakira n’abandi, ukuntu twakubaka u Rwanda rushya.”

Iyo bitaba ibyo ngo yashoboraga kujya mu bihugu nka Leta Zunze Ubumwe za Amerika yari yarabayemo, iby’i Burayi, Afurika y’Epfo cyangwa Sénégal n’ahandi agategereza igihugu kikiyubaka.

Dr Rwigamba wari ufite imyaka 46 y’amavuko, we n’abandi barimu bari bake, boherejwe i Butare [Huye y’ubu] kugira ngo bafatanye, batekereze uko bazahura Kaminuza Nkuru y’u Rwanda, UNR, ndetse iza gutangira muri Mata 1995.

Ishingwa rya ULK n’impamvu umuhungu wambaye amaherena n’umukobwa wambaye ikanzu ngufi batakirwa

Bamaze kuzahura UNR, yatangiye kuyigishamo kugeza ubwo nyuma yaje gutekereza ku babyeyi bafite abana badafite ubushobozi bwo kwiga i Butare no kuba abana bose batarashoboraga kujya kwigayo, ashinga Kaminuza yigenga ya Kigali (ULK).

Yifashishije bamwe mu barimu bakoranaga muri UNR; ULK yatangije akodesha ibyumba bibiri muri St Paul i Kigali yaje kugenda ikomera. Nyuma yaje kwimukira kuri Yamaha, aho yavuye ijya Murenge wa Kacyiru muri Gasabo nyuma y’inguzanyo yo kwagura ibikorwa yahawe na BCR [I&M Bank].

Kubera ko hari mu gishanga naho yaje kuhimuka ijya ku Gisozi, ahari icyicaro cyayo gikuru kugeza ubu. Dr Rwigamba avuga ko kumenyekana kwa ULK aribyo byatumye aba Umusenateri uhagarariye amashuri makuru yigenga kuva mu 2003 kugeza 2011, bikaba byaramubereye amahirwe yo kubaka igihugu ari mu nzego zo hejuru.

Dr Rwigamba yigisha isomo ry’imyitwarire, abanyeshuri bose bahuriraho muri ULK. Ryerekeye guhindura imyifatire y’abantu, hagamijwe kugororoka, kuba umuntu muzima no kugira ubumuntu.

Aha ngo niho hakomoka kutakira abagaragaza imyitwarire imwe n’imwe. Nubwo bahindura imyitwarire ngo hari abajya guhinduka baranduje abandi.

Ati “Niyo mpamvu mu mategeko ya Kaminuza urugero abasore baje basutse imisatsi ntabwo wakwinjira hariya. Uravuga uti nje kwiyandikisha bati hano ntabwo twandika abanyeshuri nkawe, ntiwinjira, umukobwa wambaye akagutiya gato cyane ntabwo yinjira.

“Umuntu ugeze kuri urwo rwego yakwanduza abandi, byatugora ngo tumugorore yajya kwiga ku bigo bindi. Umuhungu watoboye amatwi akaza yambaye amaherena akaza yasutse imisatsi, kuzamugorora yaba amaze kwangiza abandi benshi.”

ULK igeze kuri 70% mu byo yateganyaga, Dr Rwigamba avuga ko bifuza kongera amashami; arimo ay’ubuvuzi bw’abantu, ubuhinzi n’ubworozi, iterambere ry’icyaro n’andi, gutangira icyiciro cya Gatatu cya Kaminuza no gutanga impamyabumenyi z’ikirenga kandi ngo ibikorwaremezo birahari.

Kuva ULK yatangira ngo ibikorwa byose ni ukwigira kuko inkunga z’amahanga zigira amabwiriza ataha Dr Rwigamba kwigenga.

Ati ‘Kuva twatangira ntabwo turabona inkunga kandi ntabwo tuyikeneye ni ukwigira. Kenshi na kenshi abatanga inkunga, bashyiramo ibyo na we utanga, ntiwafata ibyemezo utabagishije inama, baguha umurongo ukurikira wakwanga bikaba ari ikibazo. Narya duke ariko nkigenga.”

Iyobokamana, isanamitima no guharanira ko ibitekerezo byiza biganza ibibi

Dr Rwigamba avuga ko yavutse mu muryango wa gipagani w’abakire, batunze inka n’amasambu. Gusa ngo yaje kuba umukirisitu kubera isanamitima.

Yashinze ‘Itorero ry’Umugeni wa Kristo’ kugeza ubu riri i Kinazi mu Karere ka Ruhango, i Muyira mu Karere ka Nyanza, Byimana mu Karere ka Ruhango, Ntarama mu Karere ka Bugesera, Mageragere na Mwendo mu Karere ka Nyarugenge.

Ati “Iby’Imana byaje nyuma ndetse ubu mbirimo cyane. Ubu mfite amatorero menshi. Ubwo rero ni ibintu natekerejeho bifasha abantu kwizera Imana, iyo ugize kwizera ni ikintu gikomeye cyane, ukwizera kuguha imbaraga nyinshi z’imbere, imbaraga nyinshi z’inyuma ndetse ni nayo masomo nigisha iyi myaka yose.

Nko kubahuye n’ihungabana, avuga ko iyo umuntu yizera agira imbaraga zo gutsinda ibibazo byinshi birimo kwiheba cyangwa icyerekezo kibi [aha yavugaga ku bashobora gutekereza kwiyahura].

Asaba abantu kugira ibitekerezo byiza bitsinda ibibi. Abiyahura ngo ni uko baba batarahura n’ababaganiriza ngo bababwire ko nta muntu utagira ibibazo.

Ati “Abo bantu biyica, bafata ibiyobyabwenge cyangwa se n’ibindi ni uko ari abantu batarahura n’abantu babaganiriza ngo babafashe babereke ko nta muntu utagira ibibazo hano ntabwo ari paradizo.”

“Nanjye ubu undeba kuri televiziyo aravuga ngo mbega umuntu wahiriwe ariko ubu mba mfite ibibazo, mba mfite imbogamizi mu buzima bwanjye. Ariko izo mbogamizi mba mfite ibitekerezo byiza bizirusha imbaraga inshuro 100 nta hantu byahera.”

Avuga ko ku basenga, umuntu agira icyizere mu Mana, mu gihugu no muri we ubwe. Icyo gihe umuntu ngo agira imbaraga imbere mu mutima, yahura n’imbogamizi akongera gutekereza ko icyo adashoboye agiharira Imana.

Inama ku batarashaka

Dr Rwigamba yarongoye mu 1986 ubu afite abana batandatu; abakobwa batatu n’abahungu batatu. Abatarashaka abagira inama yo kurambagiza indangagaciro z’abo bagiye kubana kurusha kureba amaso meza cyangwa ibindi bijyanye n’ubwiza gusa, nubwo nabyo kubireba atari bibi.

Ati “Icyo nagira inama abahungu batarashaka ni ukwitonda mu kurambagiza. Ntibarambagize bihuta cyane ngo ni uko umukobwa azi guceza, ngo ni uko umukobwa afite amaso meza nabyo ni ikintu cyiza ariko barambagize ingangagaciro z’uwo muntu bagiye kubana.”

“Barambagize niba ari umuntu ufite amahame y’ubuzima, barambagize niba uwo muntu azaba ugufasha nawe ukamufasha mu buzima, umunyakuri, wicisha bugufi, wakwemera ubukire, umukeno waza akawemera. Wakunganira mbese umugabo we mu bintu byose mukaganira akaba inshuti yawe muhujwe n’indangagaciro n’icyerekezo kimwe atari ibindi umuntu ashaka ngo ni ubukire, ngo ni amafaranga ngo ni imodoka zateye n’ibindi.”

Umuhungu yakwishimira gushyingira yavuze ko “ari umuhungu muzima wicisha bugufi ufite icyerekezo, w’intwari, wakwirwanaho ahantu hose yaba ageze, ufite urukundo, ukunda umuryango we, ukunda umuryango ashatsemo, ukunda igihugu, ukunda Imana, ufite amahoro kandi afite ukwihangana, ufite ingeso nziza n’icyerekezo”. Ati “Uwo ni we musore muzima.”


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .