Ese koko abagore ni abakunzi b’ifaranga cyangwa ni icyasha bambitswe?

Yanditswe na Dufitumukiza Salathiel
Kuya 30 Nzeri 2020 saa 08:33
Yasuwe :
0 0

Muri rubanda humvikana kenshi imvugo zigaruka ku bubasha bw’amafaranga, bamwe ndetse ntibatinye kuvuga ko ‘akora byose’. Ibyizerwaga mbere nk’aho bigenwa n’Imana, nta ruhare abantu babigizemo birimo n’urukundo, abenshi ku munsi wa none basigaye bemeza ko amafaranga umuntu yakoreye abyubaka neza.

Wigeze kumva, wasomye cyangwa wabonye inkuru z’urukundo zibabaje ahanini zishingiye ku gutandukana uruhande rumwe rutabyifuza. Izi nkuru zigarukwaho umunsi ku munsi muri filime, indirimbo, ikinamico, ibisigo n’izindi ngeri z’ubuvanganzo zitandukanye.

Mu bigarukwaho kenshi kuba imbarutso y’izi nkuru zishegesha umutima ukunda, harimo amafaranga cyangwa ubutunzi. Ese amafaranga n’ubutunzi bihura bite no kubaka urugo cyangwa urukundo rurambye? Kuki igitsina gore kivugwaho gukunda ubutunzi cyane? Ubundi se barabukunda koko cyangwa baraharabikwa?

Raporo yashyizwe hanze n’Ishuri ryigisha Ubukungu muri Kaminuza ya Oxford mu 2015, ivuga ko muri uwo mwaka abagore bo mu bihugu byinshi by’i Brurayi bagiye bahitamo kurwubakana n’abagabo babona ko bazahaza ibyifuzo byabo mu buryo bw’amafaranga kurusha mu bindi bihe.

Catherine Hakim wakoze iyo raporo ifite umutwe ugira uti ’Do women really want to marry for money?’ yagize ati” Abagore benshi bakomeje kwifashisha kurongorwa nk’andi mahitamo cyangwa inyongera ku mirimo yabo.”

Iyi raporo kandi yifashishije ubushakashatsi bwakozwe na National Centre for Social Research hagaragazwa ko kimwe cya gatatu cy’abagore bareka akazi kabo babaye bafite amafaranga ahagije yabafasha kwishyura ibyo bashaka. Ni mu gihe bitatu bya gatanu by’abagore bo bagaragaje ko baba bashaka gukora amasaha make cyane.

Umunyamakuru wa The Telegraph, Jemima Lewis, ni umwe mu bakoreweho ubu bushakashatsi. Yagize ati” Yego, abagore bifuza abagabo b’abakire. Byashoboka ko tutabivuga kenshi bitewe n’uko tutanakunda kubyiyumvisha nk’ukuri; ariko abagore ni ibiremwa byibanda cyane ku bikorwa bigaragara. Umugabo w’umukire aguha amahitamo.”

Mugenzi we w’umunyamakuru akaba n’umwanditsi w’inkuru z’urukundo JoJo Moyes, we yavuze ko atari ko bimeze, ndetse ko ushinga urugo akurikiye amafaranga “aba atari kubaka ahubwo aba ari mu mushinga”.

Siyansi isobanura ite iyi ngingo?

Ku wa 2 Mata 2014 urubuga rwa Science Blog rusanzwe rutangaza amakuru n’ubushakashatsi bishingiye kuri science, rwashyizweho ubushakashatsi bufite umutwe ugira uti ”The Real Difference Between How Men And Women Choose Their Partners”.

Ni ubushakashatsi bwakozwe hashingiwe ku cyitwa ‘Framing effect’ kizwi cyane mu isomo rihuza imitekerereze n’imyitwarire Psychology.

Framing effect ivuga ko ubwenge bw’umuntu bumufatisha umwanzuro hagati y’amahitamo yahawe bugendeye ku bisobanuro by’ayo mahitamo bigaragarira amaso.

Ubu bushakashatsi bwakoresheje ingeri esheshatu z’ibanze zishobora kwibandwaho umuntu ahitamo umufasha ku mpande zombi, arizo: umubiri ugaragara neza, isura igaragara neza, kwinjiza agatubutse, intego ikomeye, ubugwaneza, n’ubuhanga.

Bwagaragaje ko umubiri ugaragara neza ni ingenzi cyane ku bagabo, isura igaragara neza ni ingenzi yane ku bagabo, kwinjiza agatubutse ni ingenzi cyane ku bagore, intego ikomeye ni ingenzi cyane ku bagore, ubugwaneza ni ingenzi kuri bombi ku rwego rumwe, ubuhanga ni ingezi kuri bombi ku rwego rumwe.

Umwarimu mu bijyanye n’inzara, ubukene n’ibidukikije muri Kaminuza ya Pennsylvania, David Ludden, nawe avuga ko mu nyigo zitandukanye zikorerwa mu bihugu binyuranye abahanga mu guhuza imyitwarire y’umuntu n’imitekerereze ye “bagaragaza ko abagabo bita k’uko umuntu bifuza ko babana agaragara kurusha ibyo atunze; mu gihe abagore bibanda ku kureba ibyo atunze kurusha uko agaragara.”

Mu nyandiko Ludden yasohoye mu, 2019 akayiha umutwe ugira uti ”Do women really prefer men with money over looks” [Ese mu by’ukuri abagore bahitamo abagabo bafite amafaranga kurusha uburanga] yasobanuye icyo abagabo bagenderaho bahitamo abagore bazabana n’impamvu abagore bakunze guhitamo abagabo bafite amafaranga.

Ludden yavuze ko iyo abagabo bajya guhitamo abagore bazabana “bashyira imbere ukuba yaba afite ubuzima bwiza n’uburumbuke ku buryo yazababyarira umwana mwiza.”

Ngo ibindi bishobora gukurura umugabo mu gihe ahitamo umugore babana, ni ubwiza bugize umugore nk’imisatsi myiza, uruhu runoze ndetse n’umubyimba uringaniye.

Ibi bibusanye cyane n’icyo abagore barebaho. Ludden avuga ko abagore ari abanyantege nke ndetse ibi bikagaragara cyane igihe bageze mu nshingano zijyanye no gutwita no kurera abana. Iyi ngo akaba ari nayo mpamvu ituma abagore bumva bo n’abana babo bagomba kwitabwaho n’abagabo, bigatuma baha agaciro ubutunzi kurusha uko uwo bazabana yagaragara neza.

Ni iki amateka abivugaho?

Kuba muri kamere y’abagore n’abakobwa abashakashatsi bagaragaza ko bareba cyane ubutunzi iyo bajya guhitamo uwo bazabana akaramata, amateka yerekana ko n’ababyeyi babo babatsindagiramo ibyo bitekerezo.

U Buhinde ni kimwe mu bihugu bituwe cyane mu Isi. Mu kinyejana cya 19, muri iki gihugu ni ho hakoreshejwe bwa mbere ijambo “Hypergamy” rikoreshwa iyo bavuga umuntu washyingiranywe n’undi umurusha ubutunzi.

Iri jambo rifatwa nk’amahirwe yo kugera ku majyambere mu duce tw’ibyaro tw’iki gihugu, ryakunze gukoreshwa ubwo abahinzi bashishikarizaga abana babo gushyikirana n’abanyamujyi.

Kuba umukobwa wo mu cyaro yarongorwa n’umunyamujyi, mu myizerere y’abo bahinzi ngo byatuma umuryango we urushaho gukomera, ndetse akabera na barumuna be ikiraro kuko bashobora kuzajya kuba iwe bakabasha kwiga neza.

Nubwo abantu benshi bakunze kumvikana bavuga ko abagore bakunda amafaranga ku buryo bayagenderaho no mu guhitamo abo bazabana, hari n’abandi bavuga ko atari urwumwe cyane ko hari n’abasore basigaye batoranya inkumi bazabana bagendeye ku butunzi bafite.

Ubushakashatsi bwagiye bugaragaza ko amafaranga ari mu bigenderwaho n'ab'igitsinagore igihe bahitama uwo bazabana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .