Uburyo Perezida Kagame ahuza akazi kenshi agira n’ubuzima busanzwe; ibiteye amatsiko ku miterere y’umunsi we

Yanditswe na Philbert Girinema
Kuya 11 Nyakanga 2020 saa 01:21
Yasuwe :
0 0

Amatsiko ku buzima bwite bwa Perezida Kagame yashize! Inshuro nyinshi abantu bakunze kwibaza uburyo ahuza akazi kenshi aba afite n’ubuzima bwe bwite, ku buryo hari aho byageraga bamwe bakibaza niba abona umwanya wo kuruhuka.

Urugero rwa vuba muri nyinshi, ni urwo muri Mutarama 2019 ku itariki ya 24. Icyo gihe saa yine z’ijoro [saa tatu zo mu Busuwisi], Perezida Kagame yari mu Busuwisi mu Mujyi wa Davos, kandi mu masaha y’igitondo ategerejwe nk’umushyitsi mukuru mu gutaha Kaminuza Mpuzamahanga y’Ubuvuzi, University of Global Health Equity, UGHE, i Burera mu Ntara y’Amajyaruguru.

Icyo gihe indege ye yari ku Kibuga Mpuzamahanga cy’Indege i Zürich. Ubusanzwe gifunga imiryango saa tanu z’ijoro kandi kuva i Davos aho inama yaberaga kugera kuri icyo kibuga mu modoka, ni urugendo rw’amasaha abiri n’igice.

Umunaniro wo mu nama, urugendo rurerure rw’amasaha arenga 8 ntibyamubujije ko mu masaha y’igitondo aba ari i Burera, nta mwanya na muto yigeze abona wo kuruhuka.

Kuri uyu wa Gatanu tariki 10 Nyakanga, Perezida Kagame yagarutse ku buzima bwe bwite mu kiganiro yagiranye n’urubyiruko. Ni ikiganiro yahishuriyemo byinshi ku miterere y’umunsi we mu buryo butari bumenyerewe.

Ni ku nshuro ya mbere Perezida Kagame aganiriye n’abantu hifashishijwe urubuga rwa Instagram, gusa ku rundi ruhande ubirebye neza impamvu irumvikana. Ikiganiro cyari kigenewe cyane urubyiruko, kandi umubare munini warwo muri iki gihe ukoresha uru rubuga nkoranyambaga.

Binakubitana n’uko Perezida Kagame ari umwe mu bakuru b’ibihugu ku Isi bajyana n’igihe, bakoresha imbuga nkoranyambaga mu kuganira n’ababakurikirana. Kuri Instagram, aho iki kiganiro cyanyuze, Perezida Kagame akurikirwa n’abantu barenga ibihumbi 600.

Usibye kugikurikirana binyuze kuri Instagram, urubyiruko rwiganjemo urukoresha imbuga nkoranyambaga rwari rwahuriye mu Nteko Ishinga Amategeko mu Ngoro y’Amateka ku guhagarika Jenoside, aho rwahabwaga umwanya rukabaza ibibazo.

Ibibazo byinshi byabajijwe byari byihariye! Ntabwo harimo politiki nyinshi nk’uko bijya bigenda mu bindi, ahubwo byavugaga ku ngingo nyinshi zigenewe urubyiruko cyangwa za ngingo zirushishikaza; hari nk’uwabajije uko bimera kuba Perezida ku buryo nk’umwana ufite izo ndoto atangira kwitoza. Perezida Kagame yirekuye asubiza n’ibibazo byoroshye ariko abazwa gake, kugeza aho avuga urukundo yakundaga inyama mu gihe cyashize.

Umwe mu bakurikiranaga iki kiganiro, yasabye Perezida Kagame kumusubiza mu buryo bworoheje, akamubwira uko umunsi we uba umeze, guhera mu gitondo kugera mu ijoro.

Perezida Kagame yavuze ko akazi ke kibanda ku gakorerwa mu biro nk’inama, nyuma hakabaho gusura ibikorwa remezo, inganda n’ibindi cyangwa se guhura n’abaturage.

Amasaha y’akazi kuri we arahindagurika bitewe n’ibihe ku buryo ngo rimwe na rimwe abyuka mu museso wa kare; mu kugaragaza uburyo agorwa n’amasaha yanyujijemo aratebya asaba urubyiruko ko uwaba azobereye mu byo gukoresha neza igihe, yazamugoboka, maze Robert Mckenna Cyubahiro wari uyoboye ikiganiro ati “Ndahari rwose nyakubahwa."

Perezida Kagame utajya urobanura ibyo kurya, yavuze ko akenshi bimugora kubahiriza amasaha yo kurya ku buryo yisanga inshuro nyinshi yabuze umwanya wo kurya saa sita, byagera na nijoro akarya atinze.

Ati “Yewe n’ibyo kurya, hari igihe ndenza amasaha, rimwe na rimwe bikaba kare ubundi ku mugoroba bwije mu ijoro.”

Kimwe mu bintu Perezida Kagame ashakira umwanya uhoraho, ni siporo, binumvikanisha uburyo ayiha agaciro, n’impamvu ari umuntu ukomeye kandi ukurikirana ibintu byinshi icya rimwe kandi ntihagire ikimwisoba. Ntiwapfa kubishobora udakora siporo.

Ati “Ariko buri gihe nshaka umwanya wa siporo. Rimwe na rimwe nkina Tennis, nkagorora ingingo, nkunda kureba basketball cyangwa se umupira w’amaguru, imikino itandukanye mu gihe iri kwerekanwa aho ndi, niba ari ukuyikurikira kuri televiziyo ndabikora.”

Perezida Kagame ubusanzwe ni umufana wa Arsenal ndetse na Golden State Warriors yo muri NBA.

Perezida Kagame yavuze ko mbere atakundaga kubonera umwanya umuryango we ariko ko ubu byahindutse

Asigaye abonera umwanya umuryango kurusha mbere

Umuryango ni ingenzi kuri Perezida Kagame. Mu bihe byashize yigeze kuvuga uburyo byageze aho umuhungu we w’imfura ubwo yari afite imyaka ine, amubwira ko amukumbura akamubura, abura uko yifata, amarira aragwa ariko amwe y’umugabo atemba ajya mu nda.

Icyo gihe hari muri Werurwe 2019 ubwo yari muri Afurika y’Epfo mu nama y’Umuryango w’Abayobozi bakiri bato izwi nka ‘YPO EDGE’, avuga kuri icyo kintu cyabaye mu 1995 cyatumye yiyemeza ko iteka azajya abonera umwanya umuryango.

Ati "Hari ubwo hashize icyumweru cyose ntarabona umwana, umunsi umwe nari ndyamye nka saa kumi n’igice z’urukerera haza umuntu akomanga ku cyumba nari ndyamyemo, nahise ntekereza ko ari abashinzwe umutekano wanjye banzaniye amakuru mabi.”

“Ubwo nakinguraga nasanze ari umuhungu wanjye, aravuga ati “Daddy, umaze iminsi uri he?” Ntabwo nafashe umwanya wo gusobanura byinshi, nageze aho amarira atemba ajya imbere aho kujya hanze.”

Perezida Kagame yabwiye urubyiruko ko ubu ibi byahindutse, kuko buri mpera z’icyumweru cyangwa se buri mugoroba aba ari kumwe n’umuryango we.

Ati “Byatangiye vuba, kera ntabwo ariko byari bimeze. Hari umwanya w’umuryango. Niba bahari, bamwe ntabwo bakunze kuba bahari, baba bari ahantu hatandukanye mu bintu binyuranye, ariko iteka haba hari umwe cyangwa babiri bo mu muryango tuba turi kumwe.”

Perezida Kagame yatanze n’inama ku bato ku mirire iboneye, abashishikariza kujya banywa amata, kuko abamo intungamubiri nyinshi bakeneye, nubwo we ku myaka ye atangiye kujya ayagabanya.

Ibyo akunda kurya, hafi ya byose ni ibiribwa byera mu Rwanda cyangwa se bihaboneka, ku buryo uwashaka kurya nk’Umukuru w’Igihugu, yahera mu gitondo.

Ati “Umuceri, ibijumba, ibitoki, ibishyimbo, imboga, nkarya n’imbuto nyinshi.” Kera bwo, ngo yakundaga kurya inyama cyane.

Perezida Kagame nubwo agira akazi kenshi gakunze kubamo ibyiza n’ibibi, asobanura ko abayeho mu buzima yishimiye.

Hanze y'ibiro, Perezida Kagame asura ibikorwa remezo bitandukanye. Aha yatangizaga umushinga w’umuherwe Howard Buffet wo kuhira imyaka i Kirehe
Perezida Kagame agira akazi kenshi karimo inama nyinshi agirana n'abayobozi batandukanye
Perezida Kagame yatangaje ko iteka ashaka umwanya wo gukora siporo, aho akunda gukina tennis
Perezida Kagame ni umukunzi wa Basketball cyane. Aha ni umwaka ushize ubwo yari muri Oracle Arena ku mukino wa mbere wa Playoffs wahuje Golden State Warriors na Huston Rockets
Perezida Kagame ni umukunzi w'umupira w'amaguru, by'umwihariko ni umufana ukomeye wa Arsenal
Umukuru w'Igihugu ni umukunzi w'umukino w'amagare, ibintu byatumye ari imwe muri siporo isigaye ikundwa cyane mu gihugu
Perezida Kagame agaragara muri filimi mbarankuru yiswe "Rwanda: The Royal Tour", atembera mu Kiyaga cya Kivu
Mu ifatwa ry'amashusho ya filimi "Rwanda: The Royal Tour", Perezida Kagame yagaragaye agerageza gushushanya
Aha Umukuru w'Igihugu yari muri Pariki ya Nyungwe, ku kiraro cyo mu kirere cyubatsweyo, kimwe mu bikurura ba mukerarugendo
Umukuru w'Igihugu ahorana akazi kenshi ariko ntibimubuza gufata ingendo akazenguruka ibice bitandukanye by'igihugu areba ishyirwa mu bikorwa ry'ibyo yasezeranyije abaturage
Perezida Kagame ajya anyuzamo akanakina Basketball nk'umwe mu mikino akunda
Perezida Kagame ubwo yasubizaga ibibazo by'urubyiruko rutandukanye
Umunyamakuru akaba n'Umunyarwenya, Arthur Nkusi, abaza ikibazo Umukuru w'Igihugu
Umunyamakuru Makeda Mahadeo abaza ikibazo Perezida Kagame
Jackie Lumbasi ukora kuri Royal FM ni umwe mu bahawe umwanya bakabaza ikibazo Umukuru w'Igihugu
Umunyamakuru David Bayingana ni umwe mu rubyiruko rwakurikiranye iki kiganiro cyaberaga kuri Instagram
Robert Mckenna Cyubahiro niwe wari uyoboye iki kiganiro
Sandrine Ishije ukora kuri Kiss FM akurikiye impanuro z'Umukuru w'Igihugu
Umufotozi Plaisir Muzogeye, ari mu bari mu Nteko Ishinga Amategeko akurikiye iki kiganiro
Perezida Kagame yasubizaga ibibazo ari mu Biro bye muri Village Urugwiro

Amafoto: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .