Abakozi babiri bahamijwe kunyereza umutungo muri Kaminuza ya Gitwe bakatirwa igifungo cy’imyaka irindwi (yavuguruwe)

Yanditswe na Prudence Kwizera
Kuya 31 Nyakanga 2020 saa 08:16
Yasuwe :
0 0

Urukiko rwisumbuye rwa Muhanga, kuri uyu wa Kane tariki ya 30 Nyakanga 2020, rwakatiye igifungo cy’imyaka irindwi abari abakozi ba Kaminuza ya Gitwe barimo uwari ushinzwe icungamutungo n’uwari ushinzwe kwishyuza amafaranga y’ishuri nyuma yo guhamwa n’ibyaha byo kuyanyereza.

Abo ni Ahobantegeye Charlotte wari ushinzwe kwishyuza amafaranga y’ishuri wakatiwe gufungwa imyaka irindwi no gutanga ihazabu ya zirenga 44 Frw, naho Ndahimana Gérard wari ushinzwe gucunga umutungo (Comptable) akatirwa gufungwa imyaka irindwi no gutanga ihazabu ya Miliyoni zirenga 13 Frw.

Bari bari bakurikiranyweho gukoresha inyandiko mpimbano no kunyereza umutungo w’ishuri.

Muri urwo rubanza abaregera indishyi ni abantu 46 barimo Kaminuza ya Gitwe mu izina ry’umuyobozi wayo, na bamwe mu banyeshuri bahize bagera kuri 45.

Ubushinjacyaha bwareze Ndahimana Gérard wari ushinzwe gucunga umutungo muri Kaminuza ya Gitwe, kuba yaranyereje amafaranga ya Kaminuza yakoreraga, kuko mu igenzura ryakozwe, ryerekanye ko yajyaga ashyira amafaranga ya bamwe mu bakozi ba Kaminuza abyita umushahara.

Bwatanze urugero aho yashyize amafaranga Miliyoni ebyiri kuri Konti za Ahobantegeye Charlotte ayita umushahara kandi arenga kuyo yagombaga guhembwa.

Muri uru rubanza kandi, Ubushinjacyaha bwareze Ahobantegeye Charlotte kuba yarakoze icyaha cyo kunyereza umutungo wa Kaminuza ya Gitwe, ugizwe n’amafaranga yishyurwaga n’abanyeshuri biga muri iyo Kaminuza angana na Miliyoni 10 n’ibihumbi 735 yagombaga kuyashyira kuri conti y’ikigo, ariko ngo akaba atarayashyizeho, ahubwo akayashyira ku mufuka we.

Ibyo ngo Ahobantegeye Charlotte yabikoze kuko yari umubitsi muri Kaminuza ya Gitwe, guhera ku itariki ya 01 Nyakanga 2008, akaba yari ashinzwe kwishyuza abanyeshuri amafaranga y’ ishuri n’andi mafaranga yose yishyurwa kaminuza kuri serivise zitandukanye cyangwa abayifitiye imyenda.

Nyuma y’aho kaminuza ya Gitwe imenyesheje bamwe mu banyeshuri ko hari amafaranga y’ishuri batishyuye, bihutiye kugaragaza inyemeza bwishyu (reçus) bahawe na Ahobantegeye Charlotte igihe bishyuraga.

Mu miburanire ya Ndahimana Gérard yahakanye icyaha, ariko yemera gusa ko koko hari amafaranga yashyize ku makonti ya Ahobantegeye Charlotte, ariko ko byabaye kubera kwibeshya.

Ahobantegeye Charlotte na we yaburanye ahakana icyaha ariko yemera ko hari amafaranga yahawe na Ndahimana Gérard, ariko agasobanura ko ayo mafaranga ari ayo yari aya Buruse ya Master’s yari yaremerewe na Kaminuza ya Gitwe, kandi ko bayamuhaye mu byiciro bibiri.

Umwanzuro w’urukiko

Urukiko rwisumbuye rwa Muhanga rwemeje ko ikirego cy’ubushinjacyaha buregamo Ndahimana Gérard na Ahobantegeye Charlotte gifite ishingiro, rwemeza ko Ndahimana ahamwa n’icyaha cyo kunyereza umutungo wa Kaminuza ya Gitwe ungana na 3,06,576 Frw ; naho Ahobantegeye na we agahamwa n’icyaha cyo kunyereza umutungo wa Kaminuza ya Gitwe ungana na 10,735,000Frw.

Rwahanishije Ndahimana Gerard igihano cy’igifungo cy’imyaka irindwi muri gereza hamwe no gutanga ihazabu ingana na Miliyoni icyenda n’ibihumbi 202 n’amafaranga 728 (9.202.728Frw) nk’inshuro eshatu z’agaciro k’amafaranga yanyereje.

Rwahanishije Ahobantegeye Charlotte igihano cy’igifungo cy’imyaka irindwi muri gereza hamwe no gutanga ihazabu y’amafaranga ingana na miliyoni 32 n’ibihumbi 205 (32.205.000Frw) nk’inshuro eshatu z’ayanyerejwe.

Urukiko rwisumbuye rwa Muhanga rwemeje ko ibirego bisaba indishyi byatanzwe na Me Mukarugema Anazarie mu mazina y’abanyeshuri 45 bigeze kwiga muri Kaminuza ya Gitwe bitagomba kwakirwa ngo bisuzumwe mu mizi.

Rwemeje ko ikirego cyatanzwe na Kaminuza ya Gitwe isaba indishyi gifite ishingiro; bityo rutegeka ko Ndahimana Gérard agomba kwishyura Kaminuza ya Gitwe indishyi zose hamwe zingana na miliyoni enye n’ibihumbi 77 n’amafaranga 576 (4.077.576Frw).

Rwemeje kandi rutegeka ko Ahobantegeye Charlotte agomba kwishyura Kaminuza ya Gitwe indishyi zose hamwe zingana na Miliyoni 11 n’ibihumbi 745 (11.745.000 Frw).

Urukiko rwisumbuye rwa Muhanga rwibukije ko uru rubanza rushobora kujuririrwa mu gihe kitarenze ukwezi rusomwe.

Muri Gicurasi 2018 Ahobantegeye Charlotte yari yari yarasezeye mu kazi ka Kaminuza ya Gitwe ku mpamvu yise ize bwite.

Ubwo umwanzuro w’urubanza wasomwaga kuri uyu wa Kane, abakatiwe bombi ntibari mu rukiko.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .