Imibereho myiza y’abasirikare, uruganda rushongesha ibyuma, mu mihigo y’ingenzi ya MINADEF mu 2020/21

Yanditswe na Ferdinand Maniraguha
Kuya 17 Ugushyingo 2020 saa 01:22
Yasuwe :
0 0

Minisiteri y’Ingabo z’u Rwanda (MINADEF) irateganya ko mu mwaka w’ingengo y’imari wa 2020-2021, izashyira ingufu mu guteza imbere imibereho myiza y’abakozi bayo barimo abasirikare, bafashwa kubona inguzanyo ziciriritse no gukoresha ikoranabuhanga.

Tariki 30 Ukwakira 2020 nibwo uturere, ibigo bya Leta na za Minisiteri byasinyanye na Perezida wa Repubulika imihigo y’umwaka wa 2020/2021. MINADEF ni imwe muri Minisiteri zasinye iyo mihigo igashyirwaho umukono imbere y’Umukuru w’Igihugu.

Iyi minisitiri yahawe ingengo y’imari ingana na 14.079.322.398 Frw yo gukoresha mu kwesa iyo mihigo. Ku isonga y’ibyo iyo minisiteri yagaragaje ko izashyira mu bikorwa harimo guteza imbere imibereho myiza y’abakozi bayo no gukora ibikorwa by’iterambere birimo kubaka uruganda rushongesha ibyuma.

Abakozi ba MINADEF basanganywe banki yihariye ibafasha mu kubitsa no kugurizanya ya Zigama CSS. Muri uyu mwaka, iyo minisiteri yagaragaje ko izarushaho gufasha abakozi bayo kugera kuri serivisi za banki byoroshye banyuze muri iyo banki no gushyira isoko ry’abasirikare mu buryo bw’ikoranabuhanga.

Ibyo bizakorwa bahabwa serivisi z’imari zirimo inguzanyo ziciriritse, iziringaniye n’iz’igihe kirekire, gufasha abakozi ba RDF bageze mu gihe cy’izabukuru kubona pansiyo, gutanga serivisi z’ubuvuzi zigezweho n’ibindi.

MINADEF iteganya ko bizanyura mu bukangurambaga bugamije gukangurira abakozi ba RDF kwizigamira ku bushake no kwaka inguzanyo muri Zigama CSS, kubakangurira gukoresha uburyo bwo kwishyurana hakoreshejwe ikoranabuhanga no gushishikariza abagiye mu kiruhuko cy’izabukuru gukora imishinga ibyara inyungu.

Ibyo korohereza abasirikare kubona inguzanyo byo bisa nk’ibyatangiye kuko tariki 13 Ugushyingo 2020 Inteko rusange ya Zigama CSS, yagabanyije inyungu ku nguzayo y’inzu ku bagiye kuyitunga bwa mbere, iva kuri 15% igera ku 10 %, muri gahunda yo gufasha abanyamuryango bayo kubona aho gutura.

Uretse abagiye gutunga inzu bwa mbere, n’abagiye gutunga izirenze imwe nabo bagabanyirijwe, kuko inyungu ku nguzanyo yavuye kuri 15% igera kuri 14%, kandi mu gihe bashobora kwishyura kirazamurwa kigera ku myaka 20.

Abafite umushahara muto bakorana na Zigama CSS, nabo amafaranga fatizo bashobora kugurizwa yarazamuwe, ava kuri miliyoni 5 Frw agera kuri miliyoni 7 Frw, ndetse mu minsi iri imbere zishobora kongerwa.

Ibi bikorwa byo kwita ku mibereho myiza y’abasirikare mu ngengo y’imari y’uyu mwaka bizatwara 5.209,584.700 Frw.

Kubaka uruganda rushongesha ibyuma

Mu bindi bikorwa bidasanzwe MINADEF igaragaza ko izibandaho muri uyu mwaka harimo kubaka uruganda rushongesha ibyuma rukabivanamo ibikoresho bitandukanye.

Nk’uko biri mu mihigo iyo minisiteri iherutse gusinya, urwo ruganda ruzaba rwatangiye kubakwa mu gihembwe cya mbere cy’umwaka w’ingengo y’imari 2020/21.

Bigaragara ko bizagera mu gihembwe cya gatatu cy’umwaka w’ingengo y’imari ibikorwa n’urwo ruganda byatangiye gucuruzwa mu nzego zitandukanye zirimo ubuhinzi, ubwubatsi, ibitaro, amazi, ubucukuzi n’ibijyanye n’ibinyabiziga.

Minisiteri y’Ingabo niyo izakurikirana iyubakwa ry’urwo ruganda naho Sosiyete REMCO (Rwanda Engineering and Manufacturing Corporation) niyo yahawe gucunga uwo mushinga haba mu kubaka, gushaka abakozi, gushyira imashini mu ruganda, gushaka ibyuma bishongeshwa, kubibyazamo ibindi bikoresho no kubishakira isoko.

Nk’uko biri ku rubuga rwayo, iyi sosiyete guhera mu 2018 isanzwe ikora ibikorwa byo gushongesha ibyuma ikabivanamo ibikoresho byifashishwa mu nzego zitandukanye. Nko mu buhinzi, bakora imashini zifashishwa mu buhinzi nk’izihura ibinyampeke, izibagara, izihinga n’izindi.

Mu bijyanye n’ubuvuzi rukora ibitanda byo kwa muganga n’intebe z’abarwayi cyangwa abafite ubumuga. Mu bwubatsi urubuga rwabo rugaragaza ko bakora imashini zikora amatafari, izivanga sima n’ibindi.

Ibikorwa byo kubaka urwo ruganda hagaragazwa ko byagenewe ingengo y’imari ingana na 1.100.000.000 Frw.

Mu bindi bizakorwa muri uyu mwaka w’ingengo y’imari harimo kwita ku ngabo zoherezwa mu butumwa bwo kugarura amahoro mu mahanga, kongerera abasirikare ubumenyi boherezwa mu mashuri haba mu gihugu no hanze yacyo, gufatanya n’abaturage mu bikorwa bigamije iterambere ry’igihugu nko guteza imbere ibikorwa remezo hubakwa amashuri, ibitaro, imihanda, ibiraro, kubakira abatishoboye batuye mu manegeka n’ibindi.

MINADEF yiyemeje gukomeza korohereza ingabo n'abandi bakozi bayo kubona inguzanyo zihendutse
Ingabo z'u Rwanda nkuko bisanzwe, uyu mwaka zizatanga umusanzu mu bikorwa rusange bigamije iterambere n'imibereho myiza y'abaturage
Buri mwaka ingabo z'u Rwanda zifatanya n'abaturage mu kubaka ibikorwa remezo birimo amashuri
Mu ntego za MINADEF uyu mwaka kandi harimo kubaka uruganda rushongesha ibyuma rukabikuramo ibindi bikoresho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .