Kuki Inteko y’u Bubiligi ikomeje kwima amatwi abasaba ko Laure Uwase akurwa mu mpuguke ku bukoloni?

Yanditswe na IGIHE
Kuya 8 Ukwakira 2020 saa 09:30
Yasuwe :
0 0

Amezi abaye hafi atatu Inteko Ishinga Amategeko y’u Bubiligi ishyizeho Komisiyo idasanzwe izacukumbura ku ruhare rw’icyo gihugu mu bukoloni cyakoreye ku mugabane wa Afurika, mu bihugu bya Congo, u Rwanda n’u Burundi.

Ni komisiyo yitezweho kugaragaza ukuri ku makosa n’ibyaha bikomeye bishinjwa u Bubiligi byakozwe ubwo bwari bukolonije ibyo bihugu, aho bushinjwa ubwicanyi muri Congo, kubiba amacakubiri ashingiye ku moko mu Rwanda no mu Burundi n’ibindi.

Muri Nyakanga 2020 nibwo hashyizweho itsinda ry’impuguke ku mateka y’akarere k’ibiyaga bigari, rizafasha iyo Komisiyo gukora icukumbura.

Umunyarwandakazi Laure Uwase uba mu Bubiligi ni umwe mu bashyizwe muri izo mpuguke, gusa ishyirwaho rye ntiryavugwaho rumwe. Ni umwe mu bagize umuryango Jambo asbl ukorera mu Bubiligi, uzwiho guhakana no gupfobya Jenoside yakorewe Abatutsi, no guha rugari abayihakana n’abayigizemo uruhare binyuze mu kinyamakuru Jambo News.

Uretse ibyo kandi, Jambo asbl ifitanye imikoranire n’imitwe igamije guhungabanya umutekano mu Rwanda nka FDLR, ndetse yakunze guha umwanya abahamagarira abanyarwanda kujya muri iyo mitwe igamije kumena amaraso.

Mu baje ku isonga mu kwamagana ko Laure Uwase akurwa muri izo mpuguke harimo Amashyirahamwe y’Abanyarwanda mu Bubiligi, IBUKA Mémoire et Justice Asbl n’Umuryango w’Abanyarwanda baba mu Bubiligi, DRB-Rugari, Inteko Ishinga Amategeko y’u Rwanda, umuryango w’Abarundi baba mu mahanga, imiryango y’abayahudi, abadepite n’abandi.

Igitangaje, ayo majwi nta gaciro yigeze ahabwa, ahubwo Inteko y’u Bubiligi na Komisiyo idasanzwe bakomeje imirimo yabo ndetse kuri uyu wa Mbere tariki 5 Ukwakira abadepite bagize Komisiyo bateranye bwa mbere n’iryo tsinda bagezwaho raporo ya mbere.

Depite Björn Anseeuw, umwe mu bagize Komisiyo, yasabye ko bahera ku kibazo cya Laure Uwase udakwiriye kuba mu mpuguke, ariko bagenzi be barabyanga, basaba ko byazaganirwa ku wa Mbere utaha mu muhezo.

Nadia Kabalira, umunyarwandakazi uba mu Bubiligi akaba n’umuyobozi w’umuryango udaharanira inyungu Abacu-Solidarité-Rwanda, yabwiye IGIHE ko aho ibintu bigeze bigoye ngo Uwase akurwe mu mpuguke.

Abishingira ku bibazo bya politiki biri mu Bubiligi n’isura byagira ku bamushyizeho aramutse avuyemo.

Ati “Biragoye kuvuga ko ibyaganirwaho ubu byatuma Laure Uwase bamuvanamo. Ashyigikiwe bikomeye n’ishyaka rya gikristu CD&V ndetse n’irirengera ibidukikije Groen-Ecolo. Ikindi mu matora ya 2018, Uwase yatorewe kuba umudepite w’umusimbura mu nteko y’aba-Flammand, bikaba biteganyijwe ko azinjira mu nteko mu 2022.”

“Hari ibibazo byinshi muri politiki, nkaba mbona ko kumuvanamo mu maso y’abadepite benshi n’inzobere, byagaragara nko gutsindwa no kuba barakoze amakosa akomeye ubwo bamushyiragamo. Batinya ko bishobora gutesha agaciro iyo komisiyo.”

Ikindi Kabalira ashingiraho, ni uko bikimenyekana ko Uwase azajya mu mpuguke, Komisiyo ndetse n’Inteko Ishinga Amategeko baburiwe, bakandikirwa kenshi n’imiryango itandukanye itegamiye kuri Leta ariko byose bakabyima amatwi.

Muri Nzeri 2020, nibwo abagize Komisiyo bemeye guhura n’imiryango irimo Ibuka na DRB Rugari, bababwira ko Laure Uwase kumuvanamo bisa nk’ibidashoboka.

Ati “Ubwo bemeraga guhura n’abagize iyo miryango mu ntangiriro za Nzeri, urutonde rw’inzobere rwari rwaramaze kwemezwa. Abadepite bavuze ko twakererewe, icyakora bavuga ko ngo inzobere zizajya zimukurikiranira hafi.”

Mu bindi bituma Laure Uwase adakurwamo, ni imyumvire y’ishyaka rye CD&V ku Rwanda, aho ngo ryemera ko “hari ukuri kw’amoko abiri, ukuri kw’Abahutu n’ukuri kw’Abatutsi kandi ko bose ngo bakwiriye kumvwa.”

Kabalira yavuze ko iryo shyaka ryishyizemo ko abagaragaza ko Laure Uwase atakabaye mu mpuguke ari ababa batumwe n’u Rwanda, nubwo atari ko biri.

Laure Uwase kandi akoresha imbaraga zose ngo abagerageza kumunenga abacecekeshe. Ibyo bigaragara kuri Depite Björn Anseeuw ubwo yamenyaga ko atamushyigikiye.

Ngo yakoresheje aba hafi bo mu nshuti ze ngo bagerageze guhamagara uwo mudepite, bamwumvishe ko ibyo atekereza atari byo ndetse akwiriye guhindura ibitekerezo, undi arabahakanira.

Björn Anseeuw avuga ko guha rugari cyangwa guhagamarira abanyarwanda kujya mu mitwe y’iterabwoba bikorwa na Laure Uwase na Jambo asbl, bikwiriye gufatwa nk’uko imitwe y’iterabwoba irwanira muri Syria iza gushaka urubyiruko rw’abayisilamu mu Bubiligi, igamije kuruhindura imyumvire ngo rube ibyihebe.

Yavuze ko bitumvikana uburyo byaba ikibazo iyo bigeze ku mitwe y’iterabwoba igendera ku mahame y’idini ya Islam muri Syria, nyamara byagera ku mitwe y’iterabwoba mu karere k’Ibiyaga bigari, u Bubiligi bukinumira.

Ku wa Mbere utaha nibwo hitezwe guhura kw’abagize Komisiyo mu muhezo bakiga ku bibazo birimo n’icyo cya Laure Uwase, nubwo bigoye ngo hagire igihinduka.

Izindi nkuru bifitanye isano:

- Umudepite yagaragaje ko u Bubiligi bwarenze umurongo bugashyira Laure Uwase mu mpuguke ku mateka y’ubukoloni

- Inteko y’u Rwanda yagaragaje impungenge ku nzobere zizafasha u Bubiligi gucukumbura uruhare rwabwo mu bukoloni

Laure Uwase ashinjwa gukorana n'umuryango Jambo asbl uhakana Jenoside yakorewe Abatutsi, no guha rugari imitwe y'iterabwoba igamije guhungabanya umutekano mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .