Uwabaye Minisitiri muri Malawi yahamijwe icyaha cyo gutanga pasiporo ku barimo abakoze Jenoside mu Rwanda

Yanditswe na Ishimwe Alain
Kuya 14 Ukwakira 2020 saa 12:57
Yasuwe :
0 0

Visi Perezida w’ishyaka riharanira Demokarasi muri Malawi (DPP), Uladi Mussa n’uwahoze ashinzwe abinjira n’abasohoka mu Karere, David Kwanjana, bahamijwe n’Urukiko Rukuru rw’i Lilongwe ibyaha byo gutanga pasiporo ku banyamahanga barimo abagize uruhare muri Jenoside yakorewe Abatutsi mu Rwanda mu 1994.

Uladi Mussa yahamijwe icyaha cyo kuba yaratanze uburenganzira bwo gutanga pasiporo ku banyamahanga ubwo yari Minisitiri w’Ubutegetsi bw’Igihugu muri Malawi.

Mu bahawe izi pasiporo barimo ukekwaho gukora Jenoside yakorewe Abatutsi mu Rwanda, Murekezi Vincent.

Mu Kwakira 2019, Urukiko Rukuru rw’i Lilongwe rwasanze Uladi Mussa n’abandi bane bagomba kubazwa n’inkiko kuri icyo kirego.

Mu 2017, Urukiko rw’ibanze rwa Malawi rwahamije Murekezi Vincent igifungo cy’imyaka itanu nyuma yo guhamwa n’icyaha cya ruswa no kunyereza imisoro.

Yaregwaga kunyereza umusoro ufite agaciro ka miliyoni 2.2 by’amakwaca akoreshwa muri Malawi (miliyoni 2.38 Frw) ku misoro y’ibyatumijwe mu mahanga binyuze mu kigo cye mu 2007.

Murekezi ukurikiranyweho kugira uruhare muri Jenoside yakorewe Abatusi mu 1994, yoherejwe mu Rwanda muri Mutarama 2019 nyuma y’amasezerano yo guhana imfungwa yashyizweho umukono n’urwego rushinzwe amagereza mu Rwanda na Gereza ya Malawi.

Uyu mugabo yari amaze imyaka myinshi ashakishwa, ariko bikananirana kubera ko yakoreshaga bamwe mu bakomeye muri Leta ya Malawi kugira ngo bamukingire ikibaba ntafatwe, harimo no guhabwa ubwenegihugu bwa Malawi ndetse na pasiporo ariko binyuranyije n’amategeko.

Urukiko rw’Ibanze rwa Malawi, rwasanze kandi abanyamahanga babiri, Rwasa Pascal, ufite ubwenegihugu bw’u Burundi na Esili Kubwimana w’Umunyarwanda, hari inyungu babonye muri ubwo buryo binyuze mu gutanga amakuru atariyo.

Rwasa yatawe muri yombi ku ya 9 Werurwe 2017, azira gutanga amakuru y’ibinyoma avuga ko afitanye isano n’undi munyamahanga wasabye ubwenegihugu bwa Malawi, yerekana ko ari we wamureze kugeza agize imyaka 18 y’amavuko kandi badafitanye isano.

Kubwimana, we yatawe muri yombi azira gutanga amakuru atari yo ku bashinzwe abinjira n’abasohoka ubwo yasabaga uruhushya rwo gukora ubucuruzi ndetse n’ubwenegihugu bwa Malawi binyuranyije n’ingingo ya 122 n’iya 360 z’igitabo cy’amategeko ahana ibyaha muri Malawi.

Mussa na Kwanjana bashinjwa kutita ku nshingano z’akazi no gukoresha nabi imyanya ya Leta binyuranyije n’ingingo ya 25B (1) y’itegeko rihana ibyaba bya ruswa muri icyo gihugu.

Uwahoze ari Minisitiri w'Ubutegetsi bw'Igihugu muri Malawi, Uladi Mussa, yahamijwe ibyaha bu gutanga pasiporo ku banyamahanga harimo abakoze Jenoside mu Rwanda
Murekezi Vincent ukurikiranyweho ibyaha bya Jenoside yakorewe Abatutsi mu 1994, yabaga muri Malawi mbere yo koherezwa mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .