Aba-républicains bateye utwatsi icyifuzo cya Perezida Trump cyo gusubika amatora

Yanditswe na Iradukunda Serge
Kuya 31 Nyakanga 2020 saa 11:00
Yasuwe :
0 0

Abasenateri bo mu ishyaka ry’Aba-Républicains bateye utwatsi icyifuzo cya Perezida wa Leta Zunze Ubumwe za Amerika Donald Trump, aherutse kugaragaza asaba ko amatora y’umukuru w’igihugu yakwigizwa inyuma kubera impungenge afitiye uburyo bwo gutora bw’ikoranabuhanga.

Mu butumwa Trump yanyujije kuri Twitter ku wa 30 Nyakanga yavuze ko nta cyizere afitiye uburyo bwatekerejweho bwo gutorera mu mabaruwa yoherezwa (mail-in voting) kubera icyorezo cya Covid-19 kuko asanga bwatuma habaho ubujura bw’amajwi, aheraho asaba ko amatora yakwigizwa inyuma.

Iki gitekerezo cya Trump cyaje mu gihe habura iminsi 95 ngo aya matora y’umukuru w’igihugu abe.

Iki gitekerezo cya Trump cyakiriwe n’abantu mu buryo butandukanye ariko mu bataracyishimiye harimwo abasenateri babiri b’aba-Républicains, Mitch McConnell na Kevin McCarthy bavuze ko Trump nta burenganzira afite bwo kwigiza amatora inyuma cyeretse mu gihe byaba bifashweho icyemezo n’inteko ishinga amategeko.

Senateri McConnell yavuze ko ibyo Trump ashaka bitigeze bibaho mu mateka ya Amerika.

Ati “Ntibyabayeho mu mateka y’iki gihugu, yaba no mu ntambara, ntitwigeze tureka gutorera ku gihe cyari cyateganyijwe. Tuzashaka uburyo bwo kubikora nanone ku wa 3 Ugushyingo”

Mu buryo bwo kumwunganira mu byo yari avuze, Senateri McCarthy na we yunzemo ati “nta na rimwe mu mateka y’amatora ya Perezida twigeze dusiba gutora kandi tugomba gukomeza na gahunda y’amatora yacu”.

Amagambo y’aba basenateri aje asanga aya Perezida wa Komisiyo y’Amatora, Ellen Weintraub, wavuze ko Trump nta bubasha afite bwo gusubika amatora, ndetse ngo "ntabwo akwiye kwimurwa", ahubwo asaba ko leta zihabwa ubushobozi ku buryo hakorwa "amatora atekanye kandi abanyamerika bose bakeneye".

Abayobozi benshi muri Amerika bakomeje kwamagana icyifuzo cya Trump cyo gusubika amatora ya Perezida

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .