Amerika yahagaritse imbuga za internet 92 zo muri Iran

Yanditswe na Uwimana Abraham
Kuya 8 Ukwakira 2020 saa 07:13
Yasuwe :
0 0

Ubushinjacyaha bwa Leta Zunze Ubumwe za Amerika bwatangaje ko bwahagaritse imbuga za internet 92 zo muri Iran, zishinjwa gukwirakwiza amakuru y’ibihuha agamije kwangiza ubusugire bw’iki gihugu.

Izi mbuga ngo byamenyekanye ko zikoreshwa n’umutwe w’ingabo za Iran ushinzwe kurinda ubusugire bw’iyi Leta ishingiye ku mahame y’idini ya Islam, Islamic Revolutionary Guard Corps, mu gukwiza amakuru y’ibihuha kuri Leta Zunze Ubumwe za Amerika ku rwego rw’isi.

Ubushinjacyaha buvuga ko enye muri izo mbuga zari zariyoberanyije nk’izitangaza amakuru, nyuma ziza gutahurwa ko atari byo.

Ubuyobozi muri Leta Zunze Ubumwe za Amerika bwavuze ko zanyuzwagaho icengezamatwara rya Islamic Revolution Guard Corps (IRGC), rigamije guhungabanya ubusugire bwa Leta Zunze Ubumwe za Amerika.

Umuyobozi wa FBI wari ushinzwe iki gikorwa yavuze ko amakuru kuri izi mbuga 92 bayabonye ku bufatanye n’ibigo bikomeye by’ikoranabuhanga n’itumanaho by’aho muri Leta Zunze Ubumwe za Amerika.

Ati “Iri perereza ryatangiye bitewe n’amakuru twakiriye avuye muri Google, bikaba byarabaye ku bufatanye bwa FBI n’amasosiyete ya Google, Facebook na Twitter.”

Mu cyumweru gishize twitter yasibye inkuta 130 za ‘”fake” zifite aho zihuriye na Iran, zarimo zigerageza gushaka kuvangira amatora yo muri Leta Zunze Ubumwe za Amerika.

FBI yatangaje ko hari amakuru yahaye Twitter agamije gukumira “Ibikangisho biva mu mahanga”, cyangwa se kuba amahanga yakwivanga mu matora ateganyijwe ku wa 3 Ugushyingo.

Twitter na Facebook zakajije umurego kugira ngo zikumire ko amahanga yazivanga mu matora hifashishijwe izo mbuga.

Ku wa 3 Ugushyingo 2020, nibwo Leta Zunze Ubumwe za Amerika zizamenya uzayobora manda itaha nk’umukuru w’igihugu, hagati ya Donald Trump usanzwe ari perezida na Joe Biden wigeze kuba Visi Perezida w’iki gihugu cy’igihange ku isi.

Byakomeje kugenda bivugwa ko bimwe mu bihugu by’umwihariko ibidacana uwaka na Amerika cyangwa ibifite izindi nyungu zihariye bishaka, bishobora kuzivanga mu matora y’uyu mwaka muri Amerika kugira ngo bigere ku cyo bishaka.

Ibihugu byakunze kuvugwa cyane ni u Burusiya, u Bushinwa na Iran. U Burusiya kandi buvugwaho ko n’amatora aheruka mu 2016 bwaba bwarayivanzemo, binyuze mu ikoranabuhanga, aho ngo bwagiye bwinjira mu mabanga ya bamwe mu bayobozi bukayashyira hanze.

Ibi rero ngo bishobora kongera kuba cyangwa hakaba n’ibindi bihugu byabikora, ni yo mpamvu ibigo bikomeye by’ikoranabuhanga byakajije umurego mu kureba no gukumira icyaba inzira yose y’amahanga yo kwivanga muri ayo matora.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .