COVID-19 ikomeje kwigarurira abakozi bo muri White House

Yanditswe na Bukuru JC
Kuya 7 Ukwakira 2020 saa 07:35
Yasuwe :
0 0

Nyuma y’iminsi mike Perezida wa Leta Zunze Ubumwe za Amerika, Donald Trump, asanganywe COVID-19 hakomeje kugaragara abandi bakozi bakorera mu biro bye, White House nabo bamaze kwandura iki cyorezo.

Mu bakozi bo muri White House basanganywe COVID-19 harimo Umujyanama Mukuru mu Biro bya Perezida, Stephen Miller, ni nyuma y’iminsi itanu yari amaze yarishyize mu kato ariko ubwo yapimwagwa ku wa 6 Ukwakira na we yaje gusanganwa iki cyorezo.

Miller yanduye mu gihe yakunze kugaragara ari iruhande rwa Perezida Donald Trump mbere y’uko byemezwa ko na we arwaye.

Mu bandi bakozi bo muri White House banduye iki cyorezo harimo, Umujyanama wa Melania Trump, Hope Hicks, Umunyamabanga ushinzwe Itangazamakuru mu Biro bya Perezida Kayleigh McEnany n’abandi batatu bakorana bya hafi barimo Chad Gilmartin, Karoline Leavitt na Jalen Drummond.

Aba bose bikekwa ko banduye ku wa 26 Nzeri ubwo bitabiraga ibirori byabereye mu busitani bwa White House. Uretse abakora muri iyi nzu biravugwa ko hari n’umubare munini w’abasenateri banduriye muri ibi birori.

Uretse abakora muri White House, BBC ivuga ko iki cyorezo cyatangiye no kugera mu basirikare bakuru ba Amerika, mu bafashwe hakaba harimo Umuyobozi wungirije w’Umutwe wa Gisirikare uzwi nka ‘US Coast Guard’ Adm Ray.

Kwandura k’uyu musirikare byatumye n’abandi bakuru barimo ukuriye Ihuriro ry’Ibiro bikuru by’Ingabo za Amerika rinagira inama Perezida Trump, Gen Mark Milley nabo batangira kwishyira mu kato.

Kugeza ubu umubare w’abanduye COVID-19 muri Leta Zunze Ubumwe za Amerika urenga miliyoni zirindwi, mu gihe abo imaze guhitana barenga ibihumbi 211.

Abakora muri White House bakomeje kwandura COVID-19 umusubirizo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .