Indege za Boeing 737 MAX zigiye gukorerwa isuzuma ry’iminsi ibiri mu kirere

Yanditswe na Twarabanye Venuste
Kuya 27 Kamena 2020 saa 12:47
Yasuwe :
0 0

Ikigo Gishinzwe Kugenzura iby’Indege muri Leta Zunze Ubumwe za Amerika (FAA) kigiye gukora igenzura ku ndege 737 MAX z’uruganda rukora rukanacuruza indege rwa Boeing, riganisha ku gusubukura ingendo nyuma yuko zihagaritswe muri Werurwe 2019 kubera impanuka ebyiri zikomeye zagize.

Mu ntangiriro z’icyumweru gitaha, FAA izagurutsa indege za Boeing 737 MAX, mu rwego rwo gusuzuma ko nta kibazo zifite kugira ngo zongere guhabwa uburenganzira bwo gukora ingendo.

Ku wa Gatanu, umuvugizi wa FAA Ian Gregor yavuze ko ‘barimo gusuzuma inyandiko za Boeing kugira ngo hamenyekane niba iyi sosiyete yujuje ibisabwa kugira ngo ijye mu cyiciro gikurikira cy’isuzuma.”

Yagize ati “Tuzakora isuzuma ryemeza tumaze kunyurwa n’ayo makuru.”

Reuters yatangaje ko abantu babiri bamenyeshejwe iby’ayo makuru bavuze ko iryo suzuma ryo kugira ngo bongere guhabwa uruhushya rizamara nibura iminsi ibiri mu Kirere, rishobora gutangira ku wa Kabiri nubwo bitaremezwa neza.

FAA igomba kandi kwemeza uburyo bushya bwo guhugura abapilote no kuzuza ibindi bisabwa kugira ngo indege za Boeing zizongere gutangira ingendo muri Nzeri 2020.

Izo ndege za Boeing zahagaritse ingendo kuva muri Werurwe umwaka ushize nyuma y’impanuka ebyiri zikomeye, imwe y’indege ya Lion Air yabaye mu Ukwakira 2018 n’iy’indege ya Ethiopian Airlines yo muri Werurwe 2019, zahitanye abantu 346.

Izo mpanuka zatwaye uruganda rwa Boeing miliyari z’amadolari zinatuma uwahoze ari umuyobozi mukuru, Dennis Muilenburg yegura.

Indege za Boeing 737 MAX zigiye gukorerwa isuzuma ry’iminsi ibiri mu kirere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .