Perezida Trump yahaye Iran gasopo ayibwira ko nigaba igitero kuri Amerika izakubirwa inshuro 1000

Yanditswe na Iradukunda Serge
Kuya 15 Nzeri 2020 saa 08:25
Yasuwe :
0 0

Perezida wa Leta Zunze Ubumwe za Amerika,Donald Trump yihanangirije Iran ayibwira ko niramuka igabye igitero kuri iki gihugu izakubirwa inshuro 1000.

Ibi Perezida Trump abivuze nyuma y’iminsi mike ishize hari amakuru agiye hanze avuga ko Iran yari ifite umugambi wo kwica Ambasaderi wa Amerika muri Afurika y’Epfo.

Ikinyamakuru Politico cyatangaje aya makuru cyavugaga ko Iran iri gutegura uyu mugambi wo guhitana Ambasaderi Lana Mark usanzwe ari n’inshuti ya Perezida Trump, mu rwego rwo kwihimura ku rupfu rw’umusirikare wayo mukuru General Qasem Soleimani wiciwe muri Iraq na Amerika muri Mutarama 2020.

Nubwo Iran yahakanye aya makuru, abinyujije kuri Twitter Perezida Trump yagize icyo ayavugaho anihanangiriza iki gihugu akibwira ko nikiramuka kigabye igitero kuri Amerika kizakubirwa inshuro 1000.

Yagize ati “Hashingiwe ku bivugwa n’ibinyamakuru, Iran ishobora kuba iri gutegura ubwicanyi cyangwa ikindi gitero kuri Leta Zunze Ubumwe za Amerika mu guhorera ukwicwa k’umuyobozi w’icyihebe Soleimani, wishwe kubera gutegura ibitero byo kwica abasirikare b’abanyamerika[..] igitero icyo ari cyo cyose gikozwe na Iran mu buryo ubwo ari bwo bwose kuri Leta Zunze Ubumwe za Amerika kizahura n’igitero kuri Iran kizaba kisumbuyeho inshuro 1000 mu bukana!”

Iran na Amerika byari bisanzwe bidacana uwaka ariko byarushijeho kureba ay’ingwe muri Mutarama ubwo Amerika yicaga uyu musirikare wayo mukuru hifashishijwe indege zitagira abapilote.

Perezida Donald Trump yabwiye Iran ko niramuka igabye igitero kuri Amerika nayo izakubirwa inshuro 1000

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .