U Bwongereza bwifurije Donald Trump gukira vuba COVID-19

Yanditswe na Tuyishimire Raymond
Kuya 2 Ukwakira 2020 saa 10:58
Yasuwe :
0 0

Nyuma yaho Perezida wa Leta Zunze Ubumwe za Amerika, Donald Trump n’umugore we batangaje ko banduye COVID-19, Guverinoma y’u Bwongereza yaboherereje ubutumwa bubifuriza gukira bwangu.

Mu gitondo cyo kuri uyu wa Gatanu, Trump yemeje ko we n’umugore we Melania Trump baraye banduye COVID-19.

Yagize ati “Turahita twishyira mu kato dutangire urugendo rwo gukira. Ibi tuzabasha kubinyuramo turi hamwe.’’

Leta y’u Bwongereza yabaye igihugu cya mbere cyifurije Trump n’umugore we gukira.

Avugana n’ikinyamakuru Sky, Minisitiri ushinzwe Imyubakire n’Ubutegetsi bw’Igihugu, Robert Jenrick, yatangaje ko bifuriza uyu Mukuru w’Igihugu gukira vuba.

Ati “Twese twifurije Perezida Donald Trump, umugore we hamwe n’umuryango we gukira vuba.’’

Trump hamwe n’umugore we Melania Trump basanzwemo COVID-19 ndetse bahita bafata icyemezo cyo kuba bishyize mu kato.

Ibi byabaye mu gihe muri Werurwe 2020, Minisitiri w’Intebe w’u Bwongereza, Boris Johnson, yapimwe bakamusangana COVID-19. Icyo gihe Robert Jenrick yashimiye abaganga kuko barakoye ubuzima bwe.

Yakomeje ati “Tuzi uko bimera, Minisitiri w’Intebe na we bayimusanzemo, aba ashyize ku ruhande ibikorwa bya Politiki, twese twifuzaga ko we n’umugore bakira vuba.’’

Jenrick yongeyeho ko Amerika ifite abazobereye mu kwita ku mukuru w’igihugu avuga ko ari ngombwa kumukurikirana.

Kuba Donald Trump yanduye Coronavirus, bishobora kugira ingaruka ku ngengabihe y’ibiganiro mpaka byamuhuzaga na Joe Bien bahanganye mu matora ya Perezida wa Amerika muri uyu mwaka.

Kugeza ubu imibare y’abanduye Coronavirus muri Amerika ikomeje gutumbagira aho igeze kuri miliyoni 34,4 mu gihe abamaze gupfa ari 212 660.

Perezida Donald Trump yanduye COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .