Imvano y’umubare munini w’abavuga Ikinyarwanda batuye mu Burasirazuba bwa RDC

Yanditswe na IGIHE
Kuya 26 Ukwakira 2020 saa 07:07
Yasuwe :
0 0

U Burasirazuba bwa Repubulika Iharanira Demokarasi ya Congo, ni kamwe mu duce tubarizwamo umubare munini w’abantu bavuga Ikinyarwanda nubwo atari abanyarwanda mu bwenegihugu.

Intandaro yo kuba mu batuye Uburasirazuba bwa Congo harimo abavuga ikinyarwanda ni iya kera cyane kuko yahereye mu igabanwa rya Afurika. Inama yateye imirwi ibihugu bya Afurika yabereye i Berlin mu Budage hagati ya tariki 15 Ugushyingo 1884 n’iya 26 Gashyantare 1885 n yo yabaye izingiro ryo gutuma abari abanyarwanda bisanga bitwa aba-Zayirwa.

Mbere y’iyo tariki ibice bya Goma, Masisi, Rutshuru n’Ikirwa cya Idjwi byari mu bice bigize u Rwanda. Utwo duce twaje kwegurirwa Congo-Belge mu masezerano anyuranye yabaye hagati y’ u Bubiligi n’u Budage ku wa 14 Gicurasi 1910.

Usibye ibyo bice byahawe Congo, ibindi nabyo mu Majyaruguru n’u Burasirazuba bw’u Rwanda, byashyizwe kuri Uganda. Byatumye u Rwanda rutakaza umubare munini w’abaturage bisanze ku mu bindi bihugu gusa bagumana umuco wabo n’ururimi, bakomeza kuvuga ikinyarwanda nubwo batari bakiri abanyarwanda mu buryo bw’ubwenegihugu.

Usibye umubare munini w’abisanze muri Congo kubera igikorwa cyo guhindura imipaka, hari n’abandi abakoroni bimuriye muri Congo hagati ya 1937 na 1954, muri gahunda yiswe “Mission Immigration Banyarwanda”.

Iki gikorwa cy’abakoloni cyari kigamije guhima u Rwanda, kuko babonaga ko rwungukira mu kuba rufite abaturage benshi, bakumva ko bashobora kubohereza mu bindi bice kugira ngo babibyaze umusaruro cyane ibitari bifite abaturage benshi. Muri ibyo bice, harimo no mu Burasirazuba bwa Congo, ahantu hatari hatuwe cyane.

Iyo gahunda yatumye mu 1937 hasinywa amasezerano hagati y’Ubuyobozi bw’u Rwanda, ubwa Kivu ndetse na Sosiyete yo muri Kivu yari ishinzwe gutuza abantu muri Kivu mu gihe cy’Abakoloni b’Ababiligi.

Ayo masezerano yarimo ko mu gace gatuwe n’Abahunde hatuzwa abanyarwanda, icyo gihe uwari chef wabo, Bahunde Kalinda, yahawe amafaranga y’Amabiligi 29600 nk’ingurane yemera gutanga ubutaka bungana na kilometero kare 350 kugira ngo zituzweho abanyarwanda.

Icyo gihe abanyarwanda bagiye gutuzwa muri Congo mu byiciro bitatu, icya mbere cyagiye hagati ya 1937 na 1949, hagenda umubare muto w’abanyarwanda batujwe i Gishari muri Masisi. Abandi bagiye hagati ya 1949 na 1953 ku buryo byageze mu 1950 abanyarwanda barenga 6000 bamaze gutura i Gishari.

Byageze mu 1958 abanyarwanda barenga ibihumbi 25 bamaze gutura muri ako gace. Gusa ariko n’ubwo umubare w’abaturage wiyongereye muri ibyo bice, byatangiye guteza ubwumvikane buke mu baturage ba kavukire, bamwe bagaragaza ko amasambu yabo ari gutwara n’abimukira.

Binyuze muri Mission Immigration Banyarwanda (M.I.B), abanyarwanda batujwe muri Kivu y’Amajyaruguru, i Masisi (Gishari, Mokoto, Muvunyi, Bigiri na Bafuna) na Rutshuru (Mushari na Bwito).

Uko u Rwanda rwanganaga mbere y'umwaka wa 1900

Abavuga Ikinyarwanda bahuye n’ingorane zo kubona ubwenegihugu

Raporo ku karengane gakorerwa u Rwanda hashingiwe ku mutekano muke mu Burasirazuba mwa RDC yakozwe n’Inteko Ishinga Amategeko y’u Rwanda, igaragaza ko iteka ryo ku wa 27 Ukuboza 1892 ariryo rya mbere ryasobanuye ubwenegihugu bw’abaturage ba Congo-Belge.

Mu ngingo yaryo ya mbere ryemeje ko “ubwenegihugu bwa Congo bukomoka ku mavuko ku bana bavukiye muri Congo, babyawe n’ababyeyi b ‘abanye-Congo” ndetse ko Abanye-Congo bavuga Ikinyarwanda bari muri Congo-Belge mbere ya 1885 nta kibazo bakwiye kugira kuko bo ari abanye-Congo nk’abandi bose hamwe n’abana babyaye.

Nyuma y’aho kandi haje gushyirwaho andi mategeko arimo nk’icyemezo cy’inama yabereye i Bruxelles mu 1960, cyemereye abimukira bamaze nibura imyaka 10 gutora no gutorwa. Haje gushyirwaho kandi Itegeko Nshinga ryiswe irya Luluabourg, mu 1964 ryemeje ko ubwenegihugu bwa Congo buhawe umuntu wese ufite umwe mu basekuru ukomoka mu bwoko cyangwa igice cy’ubwoko (partie de tribu) bwari butuye ku butaka bwa Leta ya Kongo mbere y’itariki ya 18 Ukwakira 1908.

Hashize imyaka irindwi ku w 28 Werurwe 1971 hagiyeho itegeko ryemeje ku buryo bw’umwihariko ko abantu bakomoka muri Ruanda-Urundi bari batuye muri Congo ku itariki ya 30 Kamena 1960 babonye ubwenegihugu (Zairoise).

Gusa bitangijwe n’abanyapolitiki bo muri Kivu zombi bafatanyije n’imiryango itari iya Leta, haje gutegurwa irindi tegeko ryatowe mu Nteko Ishinga Amategeko kuri 26 Ukuboza 1978 rivuga ko abanyamahanga bose bahawe ubwenegihugu mu ngingo ya 15 y’itegeko rindwi ryagiyeho mu 1972 [ryitsaga ku bavuye muri Rwanda-Urundi] ko babutakaje.

Iri tegeko rimaze gutorwa n’Inteko Ishinga Amategeko ya Congo, Perezida wa Repubulika yanze kurisinya asobanura ku buryo burambuye, mu ibaruwa yandikiye Inteko Ishinga Amategeko, impamvu abona rizatera umutekano muke mu gihugu.

Yavuze ko abona rizabangamira umutekano w’igihugu n’umudendezo w’abaturage ryambuye uburenganzira kandi rikabangamira umubano n’ibihugu bituranye na Congo. Yarishubije Inteko Ishinga Amategeko, ariko irarenga iraritora bwa kabiri uko ryakabaye.

Masisi ni kamwe mu duce twa Congo twatujwemo abanyarwanda mu myaka ya 1930

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .