Abahanga mu bya siyansi mu ihurizo ryo gusobanura impfu nke za COVID-19 muri Afurika, bitandukanye n’ibyo bari biteze

Yanditswe na Jeannette Umutoni
Kuya 30 Nzeri 2020 saa 07:27
Yasuwe :
0 0

Kurengerwa k’ubushobozi bw’inzego z’ubuzima, ubushobozi buke mu gupima COVID-19 n’imiterere y’uburyo abantu batuye, biri mu byatumye bamwe baraguza umutwe ko Afurika izahura n’akaga gakomeye na mbere y’uko iki cyorezo kihagaragara bwa mbere muri Gashyantare.

Iki cyorezo cyahungabanyije ubuzima bw’abantu n’ubukungu gihereye muri Aziya aho cyabonetse ku ikubitiro, gikomereza mu Burayi na Amerika, bigera muri Mata abashakashatsi batangiye kuvuga ko n’iyo hakubahirizwa guhana intera hagati y’umuntu n’undi, kitazabura guhitana Abanyafurika basaga 300 000 uyu mwaka.

Muri Gicurasi 2020, Ishami ry’Umuryango w’Abibumbye ryita ku Buzima, OMS, ryaburiye Afurika ko mu gihe ingamba zo gukumira COVID-19 zananirwa, izahitana abantu 190 000 muri uyu mwaka.

Nyamara mu gihe abamaze guhitanwa n’iki cyorezo ku Isi buzuye miliyoni imwe, Afurika ihagaze neza kurusha indi migabane kuko ijanisha ry’abayituye kimaze guhitana, ugereranyije n’abanduye, riri hasi ukurikije uko ahandi bimeze n’ibyo bamwe bibwiraga.

Imibare yakusanyijwe na Reuters igaragaza ko abamaze guhitanwa na COVID-19 ku Mugabane wa Afurika ari 2.4% by’abanduye bose, ni ukuvuga abasaga 35 000 mu barenga 1 400 000 banduye. Urebye ku yindi migabane ho impuzandengo y’abapfa iri hejuru, kuko muri Amerika ya ruguru ni 2.9%, mu Burayi ho ni 4.5%.

Naho urebye mu bihugu byashegeshwe cyane n’iki cyorezo nk’u Butaliyani n’u Bwongereza, abapfuye bari ku ijanisha rya 11.6% na 9.0% nk’uko bikurikirana, bitandukanye cyane n’ibyabaye mu bihugu bifite abanduye benshi muri Afurika nka Ethiopia ifite 1.6% bapfuye, Nigeria ni 1.9% naho Afurika y’Epfo ni 2.4%.

Magingo aya ibitaro mu bihugu byinshi bya Afurika birimo gutangaza ko abarwayi barembye kubera Coronavirus bakomeje kugabanuka.

Umwalimu mu Ishuri ry’Ubuvuzi mu Bwongereza unakora muri Parirenyatwa Group of Hospitals i Harare mu Murwa Mukuru wa Zimbabwe, Rashida Ferrand, yagize ati “Dushingiye ku byo tumaze kubona, biragoye ko twazagera ku rwego rwo kubona nk’ibirimo kuba mu Burayi – haba ku bijyanye n’ubwandu n’igipimo cy’abapfa.”

  • Hari impamvu zasobanura umubare muto w’abapfa

Igipimo cy’abapfa kiri hasi muri Afurika gikomeje gutuma bishakirwa impamvu, bamwe bakavuga ko bishoboka ko imibare itangazwa kuri COVID-19 muri Afurika ishobora kuba ituzuye, bashingiye ku buryo ubushobozi bwo gupima n’umubare w’abapimwa biri hasi, bityo ngo impfu zimwe ntizimenyekana.

Hatangwa urugero rw’uburyo muri Afurika y’Epfo, hagati ya Gicurasi na Nyakanga habonetse impfu 17 000 z’abazize uburwayi busanzwe, zizamuka 59% ku zari zitezwe, bituma hari abakeka ko COVID-19 yishe abantu baruta 16 000 bitangazwa.

Zimwe mu mpamvu zihurizwaho n’abahanga mu by’ubuzima, zigaragaza ko nubwo umubare w’abicwa na COVID-19 muri Afurika waba udatangazwa uko wabakabaye, hari ibimenyetso bigaragaza ko nanone udakabije nk’uko byari byitezwe.

Harimo kuba igice kinini cyabatuye Afurika ari urubyiruko, mu gihe ubushakashatsi bukomeje kugaragaza ko COVID-19 yibasira cyane abageze mu za bukuru cyangwa abafite ubundi burwayi bukomeye.

Raporo y’Umuryango w’Abibumbye mu 2019 yagaragaje ko 62% by’abatuye Afurika yo Munsi y’Ubutayu bwa Sahara bafite munsi y’imyaka 25, mu gihe 3% aribo barengeje imyaka 65. Bitandukanye no mu yindi migabane nk’u Burayi na Amerika ya Ruguru, aho 28% aribo bari munsi y’imyaka 25, naho 18% bafite imyaka 65 kuzamura.

Ibyo bikiyongeraho ko Guverinoma z’ibihugu bya Afurika zagize umwanya uhagije wo kwitegura guhangana n’icyorezo cya COVID-19, kuko cyageze muri Afurika nyuma y’indi migabane, ibihugu bya Afurika bigira umwanya wo kwigira ku masomo y’ibyabereye ahandi, mu buryo bwo kwirinda indwara no gushaka ibikenewe mu kwita ku banduye.

Ibihugu bya Afurika byihutiye gushyiraho uburyo bwo gusuzuma abantu ku bibuga by’indege, ingendo z’indege zihagarikwa mu bihugu byagezemo uburwayi, hashyirwamo amabwiriza yo guhana intera no kwambara udupfukamunwa n’amazuru.

Uyu mugabane kandi wihutiye kugenda ushyiraho gahunda za Guma mu Rugo, hagamijwe gukumira iki cyorezo n’ubu kitararangira.

Uretse umusaruro w’ingamba zafashwe, abahanga bamwe mu bijyanye n’ubumenyi bakomeje gusuzuma niba urukingo rw’igituntu rukunze guhabwa abana mu bihugu byinshi bya Afurika, rutaba rurimo kugira uruhare mu igabanuka ry’umubare w’abahitanwa na COVID-19.

Indi impamvu irimo kwibazwaho ni ukumenya niba nta ruhare nk’izindi Coronavirus zabanjirije iya COVID-19 zibasiye Afurika, zirimo n’izitera ibimenyetso bijya kumera nk’iby’iyadutse mu mwaka ushize, zaragize uruhare mu gutuma umubiri w’abatekerezwaga ko bazazahara cyane, wubaka ubudahangarwa.

Umuyobozi wa OMS muri Afurika, Matshidiso Moeti, we yongeyeho ko bishobora no guterwa n’uburyo mu bihugu byinshi bya Afurika, hadakorwa ingendo nyinshi mpuzamahanga, urujya n’uruza rw’abantu rukaba rudakabije.

Ingamba zafashwe n’ibihugu bya Afurika kandi zahuye n’ubunararibonye byari bimaze kugira mu guhangana n’ibyorezo bikomeye birimo Ebola, yishe abasaga 11 000 muri Afurika y’Iburengerazuba hagati ya 2013-16.

COVID-19 yagaragaje ingaruka nke muri Afurika ku bantu yishe, ugereranyije no ku yindi migabane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .