Amafaranga asohoka muri Afurika mu buryo butemewe yageze kuri miliyari hafi 89$ ku mwaka

Yanditswe na Rabbi Malo Umucunguzi
Kuya 30 Nzeri 2020 saa 09:24
Yasuwe :
0 0

Raporo yakozwe n’Inama y’Umuryango w’Abibumbye ku Bucuruzi n’Iterambere, UNCTAD, yagaragaje ko amafaranga Afurika ihomba mu mwaka kuko ayisohokamo mu buryo butemewe yageze kuri miliyari 88.6$, zingana na 3.7% by’umusaruro mbumbe w’uyu mugabane.

Iyi raporo ya paji 248 yasohotse ku wa Mbere, ivuga ko ibyo bihombo bituruka mu mafaranga ashorwa hanze rwihishwa, amanyanga mu misoro nko kumenyekanisha ibicuruzwa bike byoherezwa hanze bikaba ari byo byishyurirwa imisoro kandi ari bike ku byoherejwe, amasoko atemewe, ruswa, ubujura n’ibindi.

Yakozwe hasesengurwa ibikorwa byose ku ihererekanya ry’amafaranga rikorwa mu buryo butemewe (Illicit financial flows), bihurizwa muri raporo yiswe "Tackling illicit financial flows for sustainable development in Africa."

Igaragaza ko igihombo cya miliyari 88.6$ ku mwaka ari amafaranga menshi cyane kuri Afurika, kuko ajya kungana n’igiteranyo cya miliyari 48$ ibona mu nkunga z’iterambere mu mwaka na miliyari 54$ zinjira mu ishoramari ry’abanyamahanga, nk’impuzandengo y’ishoramari hagati ya 2013 na 2015.

Umunyamabanga Mukuru wa UNCTAD, Mukhisa Kituyi, yavuze ko "uru ruhererekane rw’amafaranga rukorwa mu buryo butemewe rubuza Afurika n’abaturage kugera ku iterambere, rugatuma hatabaho gukorera mu mucyo no kubazwa inshingano, n’icyizere kikagabanuka mu nzego za Afurika."

Bibarwa ko kuva mu 2000 kugeza mu 2015, amafaranga yagiye mu buryo butemewe ari miliyari 836$, mu gihe bibarwa ko uyu mugabane wose hamwe mu 2018 wari ufitiye amahanga amadeni angana na miliyari 770$, ku buryo wakabaye wishyura ayo madeni ndetse ukanasagura.

Amafaranga yagiye hanze mu buryo butemewe binyuze mu bicuruzwa byoherezwa mu mahanga birimo amabuye y’agaciro nka zahabu na diyama (diamond) yageze kuri miliyari 40$ mu 2015, ari nayo afite umugabane munini mu mafaranga yasohotse muri Afurika mu buryo budaciye mu mategeko.

Nk’urugero zahabu yihariye 77 ku ijana by’ibicuruzwa byamenyekanishijwe ingano nto ku byoherejwe mu mahanga, hagakurikiraho diyama (12%) na platinum (6%).

Ibyo byose ngo bigira uruhare mu guhisha inyungu ituruka mu bucuruzi, bigatuma bya bihugu bitabona amadovize ndetse n’imisoro byakabaye byinjiza igakoreshwa mu iterambere ryabyo.

Bibarwa ko mu 2014, Afurika yahombye miliyari $9.6 zanyuze mu misoro itarabashije kwinjira, bingana na 2.5% by’imisoro yose hamwe.

Iki kibazo kigaragazwa nk’igikomeye, ku buryo ngo cyatuma bigorana ko Afurika igera ku ntego zigamije iterambere rirambye, SDGs, kuko ikeneye kuziba icyuho cya miliyari $200 mu mwaka mu ngengo y’imari yayo, kandi ngo biragoye ko zaboneka mu mafaranga guverinoma zinjiza n’inkunga zihabwa, igihe cyose hatavuguruwe imikorere ngo amafaranga yakabaye yinjira yose aboneke.

Iyi raporo igaragaza ko igisubizo cyava mu bufatanye mpuzamahanga mu bijyanye n’imisoro no kurwanya ruswa, hakabaho kubaka ubushobozi bw’inzego z’imisoro na za gasutamo mu bihugu biri mu nzira y’amajyambere.

Ibihugu bya Afurika kandi ngo bikwiye kwitabira amavugurura mpuzamahanga ajyanye n’imisoro, ndetse amabwiriza ajyanye n’imisoro imbere mu bihugu agahuzwa n’ibiteganywa n’Isoko Rusange rya Afurika, AfCFTA.

Amafaranga asohoka muri Afurika mu buryo butemewe akomeje kuba menshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .