Amerika yakumiriye visa z’abanyeshuri bava mu bihugu bya Afurika n’ibishyigikira iterabwoba

Yanditswe na Dufitumukiza Salathiel
Kuya 25 Nzeri 2020 saa 10:00
Yasuwe :
0 0

Leta Zunze Ubumwe za Amerika zashyizeho umushinga w’itegeko rikumira abanyeshuri bava mu bihugu byiganjemo ibyo muri Afurika na Asia, aho bagomba guhabwa uruhushya rwo kuba muri icyo gihugu (visa) rutarengeje imyaka ibiri.

Ni icyemezo gishingiye ku kuba bamwe mu banyeshuri barangiza amasomo ntibasubire iwabo, abandi bakaba bava mu bihugu bishyigikira iterabwoba.

Iri tegeko rizakumira abanyeshuri bose bo mu Karere ka Afurika y’Uburasirazuba (EAC) biga muri Amerika kuko ibihugu bigize uyu muryango birimo n’u Rwanda, byashyizwe ku rutonde rwasohowe na Amerika rugaragaza ibihugu byakumiriwe.

Ishami rishinzwe Umutekano w’Imbere mu Gihugu muri Amerika (DHS) ryavuze ko “ibihugu biri ku rutonde rw’ibishyigikira iterabwoba nka Iran, Syria, Sudan na Koreya ya Ruguru n’ibifite abanyeshuri badasubira iwabo barengeje 10%”, ari byo iri tegeko rireba.

N’ubwo bimeze bityo ariko, ubusesenguzi bwa DHS bugaragaza ko mu mwaka ushize abanyeshuri 32 023 ari bo bonyine bahinduje visa zabo.

Ikindi cyibazwaho ni uko ibihugu bifite umubare munini w’abanyeshuri bahinduza visa ntibatahe nk’u Bushinwa, Canada, u Buhinde na Brezil bitari ku rutonde rwashyizwe ahagaragara.

Urutonde rw’ibihugu birebwa n’itegeko ryasohowe na Amerika rugaragaraho u Rwanda, Uganda, Tanzania, u Burundi, Sudan y’Epfo, Somalia, Ethiopia, Benin, Burkina Faso, Cameroun, Repubulika ya Centrafrique, Chad, RDC, Congo Brazaville, Côte d’Ivoire, Djibouti, Guinée Equatorial, Eritrea, Gabon, Gambia na Ghana.

Hari kandi na Guinée Conakry, Guinée-Bissau, Liberia, Libya, Malawi, Mali, Mauritania, Niger, Nigeria, Koreya ya Ruguru, Guinea Papua, Sénégal, Sierra Leone, Sudan, Togo na Zambia.

Ibindi ni Afghanistan, Bhutan, Guyana, Haiti, Iran, Iraq, Kosovo, Kyrgyzstan, Moldova, Mongolia, Nepal, Korea ya Ruguru, Philippines, Samoa, Syria, Tajikistan, Tonga, Turkmenistan, Tuvalu, Uzbekistan, Vietnam na Yemen.

The EastAfrican ivuga ko muri Nyakanga uyu mwaka, Urwego rushinzwe Gasutamo n’Abinjira muri Amerika (ICE) rwari rwavuze ko abanyeshuri b’abanyamahanga batari abimukira batagombye kuguma muri iki gihugu kandi amashuri bigamo ari gutanga amasomo hifashishijwe ikoranabuhanga.

Ku rutonde rw’abanyeshuri b’abanyamahanga biga muri Amerika ruheruka gukorwa n’urubuga Education.Org umwaka ushize wa 2019, Nigeria niyo iri imbere mu bihugu bya Afurika, aho ihafite abanyeshuri 13 229; naho Vietnam ikaba ari iya mbere muri ibi bihugu byakumiriwe n’abanyeshuri 24 392.

Abanyeshuri b'ibihugu byinshi bya Afurika birimo n'u Rwanda, bagabanyirijwe visa yo kujya kwiga muri Amerika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .