Kenya: Perezida w’Urukiko rw’Ikirenga yasabye ko Inteko Ishinga Amategeko iseswa

Yanditswe na Uwimana Abraham
Kuya 22 Nzeri 2020 saa 04:04
Yasuwe :
0 0

Perezida w’Urukiko rw’Ikirenga muri Kenya, David Maraga, yasabye Perezida Uhuru Kenyatta gusesa Inteko Ishinga Amategeko kuko yananiwe kubahiriza ibiteganywa n’Itegeko Nshinga ku ihame ry’uburinganire, ko kimwe cya gatatu cy’imyanya iharirwa abagore.

Mu 2010 hatowe itegeko ryavugaga ko kuri buri mwanya utorerwa cyangwa ushyirwamo abayobozi muri Kenya, bitemewe ko bibiri bya gatatu baba ari ab’igitsina kimwe. Ubu mu Nteko Ishinga Amategeko umutwe w’Abadepite abagore ni 22%, mu gihe muri Sena ari 31%.

Mu myanzuro y’Urukiko rw’Ikirenga yagiye isohoka kuva mu 2012, yasabaga Inteko Ishinga Amategeko kwihutira gushyira mu bikorwa iri tegeko ryiyimakaza uburinganire, bitaba ibyo ikazisanga yasheshwe.

Gusa ibyo yagiye igerageza ntibyatanze umusararo, aho abagore bari mu nteko bashinja abagabo gutambamira ishyirwa mu bikorwa ryabyo.

Maranga yavuze ko gusesa Inteko Ishinga amategeko bizateza ibibazo bitandukanye by’umwihariko ku bukungu ndetse ko kuba igihugu gihanganye na Coronavirus, bizatuma birushaho gukomera, ariko ko nta bundi buryo ikibazo cyakemurwamo.

Ati “Gusa nicyo abaturage ba Kenya bifuza ku Nteko Ishinga Amategeko yananiwe gushyira mu bikorwa itegeko bafataga nk’iry’ingenzi. Ntitugomba kwibagirwa ko ntacyo wageraho utakivunikiye.”

Bamwe mu basesenguzi muri Politiki bavuga ko iyo baruwa ya Maraga itatuma Perezida Kenyatta hari ikidasanzwe akora, gusa amwe mu matsinda aharanira uburenganzira bw’abagore yiganjemo abagiye biyamamariza kujya mu Nteko Ishinga Amategeko, avuga ko iyi ari intambwe nziza mu guharanira ihame ry’uburinganire.

Imibare y’abagore bari mu Nteko Ishinga Amategeko ya Kenya, iri hasi cyane ugereranyije n’ibihugu bituranye birimo u Rwanda, u Burundi, Ethiopia na Sudani y’Epfo.

U Rwanda rufite abagore mu Nteko Ishinga Amategeko bangana na 61.25%.

Uburinganire ni ikibazo gikomeye mu Nteko Ishinga Amategeko ya Kenya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .