Perezida Lourenço wa Angola yavuze ko hari miliyari 24 $ zaburiwe irengero ku butegetsi bwa Dos Santos

Yanditswe na Tuyishimire Raymond
Kuya 13 Ukwakira 2020 saa 07:25
Yasuwe :
0 0

Perezida wa Angola, João Lourenço yatangaje ko Jose Eduardo Dos Santos yasimbuye ku butegetsi ashobora kuba yararigishije umutungo w’igihugu ugera kuri miliyari $24.

Mu kiganiro yagitanye na Wall Street Journal, yavuze ko muri ayo mafaranga, hari angana na miliyari$13.5 Jose Eduardo Dos Santos yatanze mu buryo butemewe mu masezerano yagiye asinywa n’ikigo gicuruza ibikomoka kuri peteroli cya Senangol.

Abayobozi ba Angola bavuga ko muri ayo mafaranga yanyerejwe kubwa Dos Santos, miliyari $5 arizo zimaze kugaruzwa.

Uwahoze ari Perezida wa Angola, Jose Eduardo Dos Santos, yavuye ku butegetsi mu mwaka wa 2017.

Ubwo yari ku butegetsi, hagaragajwe ko umuryango we wihariye ubukungu bw’igihugu gisanzwe gikungahaye ku bikomoka kuri peteroli, ariko abaturage bakaba bacyugarijwe n’ubukene bukabije.

Nyuma yo kuva ku butegetsi mu 2017, nibwo hagaragaye uburyo uyu muryango wari warihariye umutungo w’igihugu, bigera n’aho umukobwa we Isabel Dos Santos afatanyije n’umugabo we, Sindika Dokolo, babaye abaherwe bakomeye ku mugabane wa Afurika.

Hagaragajwe kandi inyandiko z’ibanga zigaragaza uko uyu muryango wabonye amafaranga mu buryo bunyuranyije n’amategeko witwaje ijambo rya Se.

Mu iperereza ryakozwe n’ikinyamakuru The Guardian cyo mu Bwongereza, BBC n’ibindi, ryagaragaje ko Isabel Dos Santos ari kumwe n’umugabo we, Sindika Dokolo, bagiye babona amahirwe adasanzwe babifashijwemo na José Eduardo dos Santos, mbere y’uko ava ku butegetsi muri Nzeri 2017.

Eduardo Dos Santos, Ufatwa nka Perezida wa kabiri warambye ku butegetsi nyuma ya Teodoro Obiang Nguema Mbasogo wa Guinea Equatorial, yabaye Perezida kuva mu 1979 asimbuye Agostinho Neto wagiyeho nyuma y’uko Angola ibona ubwigenge mu 1975.

Perezida João Lourenço asuhuzanya na Dos Santos yasimbuye ku butegetsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .