U Burundi: Abantu 26 basanganywe Coronavirus, umubare w’abanduye bose ugera ku 144

Yanditswe na Twarabanye Venuste
Kuya 27 Kamena 2020 saa 02:36
Yasuwe :
0 0

Minisiteri y’Ubuzima mu Burundi kuri uyu wa Gatandatu yatangaje ko abandi bantu 26 banduye Coronavirus naho 22 mu bari bayirwaye barakira basezererwa mu bitaro.

Itangazo Minisiteri y’Ubuzima yashyize hanze kuri uyu wa 27 Kamena 2020 rivuga ko kuva ku wa 22-25 Kamena 2020 hafashwe ibipimo ku barwayi 50 bagaragayeho Coronavirus bari kwitabwaho, batanu bayiketsweho n’abantu 438 bahuye nabo, bose bangana na 493.

Ibisubizo byerekanye ko abantu 22 muri 50 bari barwaye bakize barasezererwa basubira mu miryango yabo, batanu bakekwaga basanga umwe ari we wanduye naho mu bipimo by’abantu 438 bahuye n’abo batanu, ibisubizo byerekanye ko 25 banduye icyo cyorezo.

Minisiteri y’Ubuzima yatangaje ko hari gushakisha abahuye n’abo bantu 26 bashya. Muri rusange mu Burundi hamaze kwandura abantu 144. Umwe niwe umaze gupfa azira Coronavirus naho 93 barayikize.

Abarundi basabwe gukomeza gukurikiza amabwiriza yo kwirinda arimo; gukaraba intoki n’amazi meza n’isabune cyangwa umuti wica udukoko [Hand-Sanitizer], kwirinda gusuhuzanya bahana ibiganza, gukororera cyangwa kwitsamura bakoresheje ahagana mu nkokora cyangwa bagapfukaho urupapuro rw’isuku rushobora guhita rujugunywa ahabugenewe hafunze neza bagahita bakaraba intoki.

Kwambara agapfukamunwa byasabwe gusa abaganga bari kwita ku bakekwa n’abamaze kwemezwa ko barwaye Coronavirus, abayirwaye n’abo bahuye nabo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .