Uganda: Abagororwa 219 batorotse gereza baniba intwaro

Yanditswe na Ndahayo Emmanuel
Kuya 17 Nzeri 2020 saa 11:36
Yasuwe :
0 0

Inzego zishinzwe umutekano muri Uganda ziri mu mukwabu ukomeye cyane nyuma y’uko abagororwa 219 bacitse gereza ya Singila iherereye mu gace ka Moroto mu Majyaruguru ashyira Uburengerazuba bw’icyo gihugu.

Aba bagororwa mbere yo gucika, babanje kwiba intwaro zirimo imbunda zo mu bwoko bwa AK-47 zigera kuri 15, magazine z’amasasu 20 ndetse n’ibindi bikoresho bya gisirikare mbere yo kwirukira mu ishyamba riri hafi ya gereza.

Abagororwa babiri mu bacitse bamaze gufatwa, mu gihe abandi babiri bapfuye ubwo igisirikare cya Uganda cyageragezaga kubafata. Ku ruhande rw’Ingabo za Uganda, umusirikare umwe yahasize ubuzima.

Aba bagororwa bari guhigishwa uruhindu ndetse inzego z’umutekano zasabye abatuye agace iri sanganya ryabereyemo kwitonda, kuko aba bagororwa bafite intwaro bityo ko bashobora guteza umutekano muke.

Bamwe mu bacitse bari mu gihano cy’ibyaha birimo kwica, gufata ku ngufu no kwiba. Bisa nk’aho uyu mugambi bari bawuteguye kuko nyuma yo gutoroka, bahise bakuramo imyenda ibaranga, ibituma n’ibikorwa byo kubafata bigorana.

Ni ubwa gatatu abagororwa bacitse gereza kuva Uganda yashyiraho gahunda ya guma mu rugo. Abenshi muri aba ngo bikanga kwandura Coronavirus, dore ko gereza z’iki gihugu zimaze kugaragaramo abantu batatu bayanduye.

Indi mpamvu ikekwa ni ubucucike buri muri gereza za Uganda, kuko kuva Coronavirus yagera muri icyo gihugu, imfungwa ziyongereyeho 10% ugeranyije na mbere yayo, bitewe no gufunga benshi mu bafashwe barenze ku mabwiriza yo kwirinda iki cyorezo.

Inzego z'umutekano zakajije ibikorwa byo gushaka imfungwa zatorotse gereza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .