Umusozi wa Kilimanjaro ukomeje gushya

Yanditswe na Bukuru JC
Kuya 13 Ukwakira 2020 saa 09:01
Yasuwe :
0 0

Nyuma y’iminsi ibiri umusozi muremure muri Afurika wa Kilimanjaro wibasiwe n’inkongi y’umuriro, kuri ubu abari mu bikorwa byo kuzimya baravuga ko iyi nkongi ikomeje gufata indi ntera.

Nyuma yo kubona ko iyi nkongi ikomeje gufata indi ntera, Leta ya Tanzania yafashe icyemezo cyo kongera umubare w’abari mu bikorwa byo kuzimya uva 400 ugera kuri 600. Ni ibikorwa kandi byitabajwemo n’abaturage.

Umuyobozi ushinzwe itumanaho mu kigo kireberera pariki zo muri Tanzania, Patrick Shelutete, yavuze ko itsinda rihari ritarabasha kuzimya iyi nkongi.

Ati “Ubu tuvugana umuriro uracyaka ariko turi gukora cyane gusa ntiturabasha kuwuhashya, nubwo umubare w’abazimya wiyongereye.”

Zimwe mu mbogamizi abari kuzimya uyu muriro bari guhura nazo ngo ni ubuhaname bw’uyu musozi ndetse n’umuyaga mwinshi uwuriho, utuma inkongi ikwirakwira byoroshye.

Si ubwa mbere uyu musozi wibasirwa n’inkongi y’umuriro kuko no mu 2016 byigeze kubaho hashya ubuso bungana na hegitari 3200. Mbere y’imyaka ine nabwo mu 2012 uyu musozi wibasiwe n’inkongi yatewe n’umuvumvu, gusa kuri iyi nshuro icyateye iyi nkongi cyo ntikiramenyekana.

Umusozi wa Kilimanjaro ni wo muremure ku mugabane wa Afurika kuko ufite uburebure bwa metero 5895 uvuye ku nyanja ndetse ukagira na metero 4900 uvuye aho utangirira. Ni nawo muremure ku Isi mu misozi itari mu ruhererekane rw’iyindi.

Uyu musozi kandi ufite umwihariko wo kuba uri muri mike muri Afurika ihorana urubura ku gasongero, bikaba na bimwe mu bituma usurwa n’ibihumbi bya ba mukerarugendo buri mwaka.

Umuyaga n'ubuhaname ni bimwe mu bikomeje kugora abari kuzimya Kilimanjaro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .