RDF yasimbuje Umutwe w’Ingabo zirwanira mu kirere zari muri Sudani y’Epfo

Yanditswe na IGIHE
Kuya 9 Ukwakira 2020 saa 04:36
Yasuwe :
0 0

Ingabo z’u Rwanda zasimbuje abasirikare bagize Umutwe w’Ingabo zirwanira mu kirere bari mu butumwa bw’Umuryango w’Abibumbye bwo kubungabunga amahoro muri Sudani y’Epfo (UNMISS).

Iri tsinda ry’ingabo rigizwe n’abagera ku 162 barimo abapilote, abenjeniyeri mu by’indege n’abakozi bazasimbura bagenzi babo basoje inshingano bari bahawe muri UNMISS.

Icyiciro cya mbere cy’aboherejwe muri Sudani y’Epfo cyahagurutse mu Mujyi wa Kigali cyerekeza mu wa Juba ahagana saa Kumi n’Ebyiri ndetse bagenzi babo nabo bagarutse mu gihugu cyabo.

Ubwo yaganirizaga abagiye mu butumwa bw’amahoro ku Kibuga Mpuzamahanga cy’Indege cya Kigali, Col Louis Kanobayire, yabasabye kurangwa n’ikinyabupfura no gushyira umutima ku ntego bafite yo kubungabunga amahoro.

Yagize ati “Muzahore murangwa n’indangagaciro za RDF, muzakorere hamwe kandi murinde isura nziza y’u Rwanda mukora inshingano zanyu ku rwego rushimishije.’’

Umutwe w’Ingabo z’ u Rwanda zirwanira mu kirere mu butumwa bwa Loni muri Sudani y’Epfo ufite inshingano zirimo kugenzura umutekano wo mu kirere, gutanga ubutabazi n’ubufasha mu buvuzi, gutwara ingabo mu gihe ziri gusimburana, gutwara abakozi b’Umuryango w’Abibumbye n’imitwaro yabo ndetse n’ibindi.

Uwari uyoboye Umutwe wa Munani w’Ingabo za RDF zirwanira mu Kirere (RAU), Lt Col Christophe Semuhungu, yavuze ko ingabo zivuye mu butumwa bw’amahoro zakoze amezi 14 aho kuba 12 kubera ibijyanye n’ingendo z’indege zari zarahagaze kubera COVID-19.

Ati “Mu mezi 14 ashize, RAU 8 yakoze inshingano yari ishinzwe kandi nta kibazo kibayeho.’’

Umutwe w’ingabo zirwanira mu kirere ufite ibirindiro bikuru mu Mujyi wa Juba n’ibindi biri mu Mujyi wa Malakal.

Ingabo z’u Rwanda zifite batayo eshatu, hakiyongeraho n’umutwe urwanira mu kirere ufite kajugujugu esheshatu zitanga ubufasha mu butumwa bwa UNMISS muri Sudani y’Epfo.

RDF ijya mu bikorwa byo kugarura amahoro ifite umuhate yaba uwo ikomora mu mateka yo kwihangana n’indangagaciro zayo nk’urwego, byiyongera ku kuba yemera agaciro kabyo nka rimwe mu mahame umunani yo kurinda abasivili yemerejwe i Kigali.

Mu bihugu bitanga ingabo nyinshi mu bikorwa bya Loni byo kugarura amahoro, u Rwanda ruri ku mwanya wa gatatu. Ubu rufite ingabo 5337 ziri mu butumwa bw’amahoro muri Darfur, Sudani y’Epfo na Centrafrique.

Ingabo z'u Rwanda zibarizwa mu Mutwe w’izirwanira mu kirere zoherejwe muri Sudani y’Epfo mu butumwa bwo kubungabunga amahoro
Ingabo zari mu butumwa bw'amahoro zashimwe ubunyangamugayo bwaziranze mu mezi zamaze muri Sudani y'Epfo
Ingabo zoherejwe mu butumwa bw'amahoro zahanuwe uburyo zikwiye kwitwara no guhesha u Rwanda ishema

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .