Abahinzi b’imyumbati babwiwe ibanga ryatuma beza toni 40 kuri hegitari imwe

Yanditswe na IGIHE
Kuya 29 Nzeri 2020 saa 01:23
Yasuwe :
0 0

Ubuhamya bw’abahinzi b’imyumbati mu Rwanda bwerekana ko uwabonye umusaruro mwiza kuri hegitari imwe uba ungana na toni hagati y’umunani n’icumi, ni mu gihe abashakashatsi kuri iki gihingwa bemeza ko hari ibyakorwa bakabona toni hagati ya 30 na 40 kuri hegitari.

Imyumbati ni igihingwa gifata umwanya wa gatatu mu birebana n’ubuso bwose buhinzeho mu gihugu, mu birebana n’umusaruro iza ku mwanya wa kabiri mu kwera byinshi kuri hegitari nyuma y’urutoki.

Abakurikiranira hafi igihingwa cy’imyumbati gihingwa cyane mu gice cy’Iburasirazuba n’Amajyepfo y’igihugu, bemeza ko umusaruro ushobora kwiyongera cyane mu gihe cyose abahinzi bakangukira gukoresha imbuto nziza, ifumbire kandi bakagirira isuku iki gihingwa.

Umuyobozi ushinzwe Igihingwa cy’Imyumbati mu Kigo cy’Igihugu gishinzwe guteza imbere Ubuhinzi n’Ubworozi (RAB), Dr Nduwumuremyi Athanase, yavuze ko kugira ngo umusaruro w’imyumbati wiyongere bisaba ko abahinzi bahindura imyumvire n’uburyo bahinga.

Yagize ati “Birazwi neza ko iyo uhinze imbuto nziza, ugashyiramo inyongeramusaruro ari bwo weza neza. Abahinzi bacu bafite imyumvire y’uko imyumbati ufata ingeri kwa mugenzi wawe ukayitera ntunashyiremo ifumbire, ntunayibagare rimwe na rimwe, icyo kintu kigomba gucika.”

“Niba bahingira isoko bakeneye kweza byinshi, ni ngombwa ko bajya gushaka imbuto y’indobanure y’imyumbati noneho bakanakoresha ifumbire mvaruganda, hari na nkunganire leta yashyizeho mu myumbati”.
Dr Nduwumuremyi yakomeje agira inama abahinzi yo gukorera isuku imyumbati, bakayibagara nk’uko ibijumba, ibishyimbo, ibigori n’ibindi bihingwa bibagarwa.

Iyo uganiriye n’abahinzi b’imyumbati hirya no hino mu gihugu, usanga bakubwira ko imbuto bahinze ari izo basabye bagenzi babo. Ni umuco abahanga mu by’ubuhinzi bemeza ko bitubya umusaruro bikanakwirakwiza indwara.

Umukozi ukora Ubushakashatsi mu Kigo Mpuzamahanga gikora Ubushakashatsi ku Buhinzi (IITA), Samuel Mugambi, yavuze ko uko abahinzi bahana imbuto ari ko bahanahana indwara, abagira inama yo gukoresha imbuto ifite ubuziranenge.

Yagize ati “Ikintu cya mbere cyiza cyo gukoresha imbuto nziza ni uko iyo mbuto iba itarwaye, kwirinda ubwo burwayi ni inyungu nini. Niyo mpamvu dukangurira abahinzi gukoresha imbuto nziza ifite ubuziranenge kuko iba itarwaye, kuko indwara zangiza umusaruro kugeza kuri 99% ndetse na 100%”.

Yakomeje avuga ko umusaruro kuri hegitari ukiri muke mu Rwanda kubera ko abahinzi batarabasha guhinga imbuto nziza ngo banakoreshe ifumbire.

Nsanzintwari François, umutubuzi w’imbuto z’imyumbati ukorera mu Karere ka Kamonyi, yashimangiye ko ubundi umuhinzi usanzwe ashobora kubona toni hagati ya 8-10 kuri hegitari ariko iyo wahinze neza ugashyiramo ifumbire y’imborera, imvaruganda, ushobora kuvanamo toni kuva kuri 30 cyangwa 40 kuri hegitari.

Ati “Iyo ushatse imbuto nziza ikiri nshya, ukayitera mu butaka bwiza wateguye neza, ugashyiramo ifumbire y’imborera, ugashyiramo ifumbire y’imvaruganda, ukayikorera isuku, ubona uriya musaruro kandi ndabivuga kuko mbikora.”

Yitanzeho urugero rw’uko abafashamyumvire mu buhinzi bagiye mu murima we bagapima igiti kimwe cy’imyumbati bagikuye basanga gifite ibiro 21.

Nsanzintwari yemeza ko ubuhinzi bw’imyumbati yabugize umwuga kandi abayeho neza abibukesha.

Ikibazo cy’imbuto nziza y’imyumbati cyavugutiwe umuti

Mu myaka irindwi ishize imyumbati yibasiwe n’indwara ya kabore n’ububembe. Ibi byatumye u Rwanda rutumiza mu mahanga izindi mbuto ndetse rukora n’izindi kugira ngo hakemurwe iki kibazo.

Dr Nduwumuremyi yamaze impungenge abahinzi b’imyumbati ababwira ko imbuto ihari dore ko kuva mu 2016 nta mbuto u Rwanda rwongeye gutumiza hanze.

Ati “Tugenda twongera amoko menshi y’imyumbati yihanganira indwara ya kabore n’ububembe. Tumaze kugira imbuto zigera mu munani zunganira imbuto twagiye kuvana muri Uganda mu 2013 na 2014”.

IITA ku bufatanye na RAB yazanye mu Rwanda imbuto zigera kuri 30 zimwe ziri ku kigero cyo kugeragerezwa mu Rwanda. Kuri ubu hari enye zarangije ubushakashatsi zigiye guhabwa abahinzi.

Umushakashatsi muri IITA, Mugambi, yavuze ko hamaze kubaho ibibazo by’indwara mu myumbati, iki kigo cyafatanyije na RAB mu kuzana no gutubura imbuto, ku buryo mu munani ziri mu bahinzi harimo ebyiri zakuwe mu zazanywe na IITA n’izindi zizagera mu bahinzi umwaka utaha.

Imbuto y’imyumbati igurishwa ku ngeri, buri gihembwe cy’ihinga hasohoka ibiciro bibarwa hagendewe ku byagiye ku butubuzi bw’abagurisha imbuto. Nko mu gihembwe cy’ihinga gishize ingeri yaguraga hagati y’amafaranga 8-10Frw.

RAB yatangaje ko iri gutegura uburyo bwo kugeza mu turere n’imirenge imbuto y’imyumbati, bikazaba byarangiye mu cyumweru gitaha. Buri karere kazaba kazi ngo imbuto irava aha n’aha, bizwi ngo uyu mutubuzi yakoranye na RAB, aremewe, afite imbuto nziza ku buryo yayigurisha abandi bahinzi.

Umuyobozi ushinzwe Igihingwa cy’Imyumbati mu Kigo cy’Igihugu gishinzwe guteza imbere Ubuhinzi n’Ubworozi (RAB), Dr Nduwumuremyi Athanase
Umukozi ukora Ubushakashatsi mu Kigo Mpuzamahanga gikora Ubushakashatsi ku Buhinzi (IITA), Samuel Mugambi
Ubuhamya bw’abahinzi b’imyumbati mu Rwanda bwerekana ko uwabonye umusaruro mwiza kuri hegitari imwe uba ungana na toni hagati y’umunani n’icumi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .