Abatuye Kigali bari gupimwa Covid-19 mu buryo bwa rusange

Yanditswe na Iradukunda Serge
Kuya 29 Nzeri 2020 saa 11:51
Yasuwe :
0 0

Ikigo cy’igihugu cy’Ubuzima, RBC cyongeye gutangiza ibikorwa byo gupima abantu batandukanye hirya no hino mu mujyi wa Kigali, hagamijwe kureba uko iki cyorezo gihagaze.

RBC ibinyujije kuri Twitter yavuze ko yatangiye icyiciro gishya cyo gupima Covid-19 abantu batandukanye, hakibandwa ku bagenzi bo hirya no hino mu mihanda igize umujyi wa Kigali.

Ati “Twatangije icyiciro gishya cyo gupima COVID19 abantu b’ingeri zose banyura mu mihanda ya Kigali. Hazapimwa abashoferi n’abagenzi ba bus, abagenda mu modoka zabo n’abagenda n’amaguru bagera ku 2000.”

RBC ivuga ko uku gupima abantu mu buryo bwa rusange bizatanga ‘ishusho y’uko icyorezo cya #COVID19 gihagaze mu Mujyi wa Kigali.’

Ibikorwa nk’ibi byo gupima abantu mu buryo bwa rusange byatangiye muri Nyakanga, ku ikubitiro hapimwa hapimwa abinjira muri Kigali n’abayigendamo. RBC ku wa 15 Nyakanga yatangaje ko mu bipimo 3911 byafashwe mu bantu batandukanye binjiraga mu Mujyi wa Kigali, habonetsemo umuntu umwe wanduye icyorezo cya Coronavirus.

No muri Kanama ibi bikorwa byaje gukomeza by’umwihariko hapimwa abanyura mu mihanda itandukanye y’Umujyi wa Kigali, nabwo impamvu ari ukumenya neza ishusho y’ubwandu bw’iki cyorezo mu Mujyi wa Kigali.

Mu kiganiro umuyobozi wa RBC, Dr Sabin Nsanzimana yari aherutse kugirana na IGIHE mu ntangiriro za Nzeri yari yahishuye ko hari ibikorwa byo kongera gupima abantu mu buryo bwa rusange kubera ko zimwe mu ngamba zo kwirinda Covid-19 zorohejwe.

Yagize ati “Mu by’ukuri Rusizi kubera ko hafunguye imirimo ubu turateganya ko mu byumweru bibiri nibwo umuntu aba akeka ko yakorayo ikintu gisa n’ubushakashatsi naho urumva iyo twakoze nk’ubushakashatsi dufata byinshi […]Ubwo abantu bongeye gusubira mu ngendo n’amasaha y’akazi yiyongereye ubwo turaza natwe kongera ibipimo byafatwaga kugira ngo dufate ishusho rusange y’ubuzima bushya.”

Kugeza ubu inzego z’ubuzima zivuga ko u Rwanda rumaze kugira ubushobozi bwo kuba mu munsi umwe rwapima Cov-19 abantu bari hagati y’ibihumbi birindwi n’ibihumbi 10.

Umubare w’abamaze kwandura Coronavirus mu Rwanda ugera ku 4832, mu gihe ibipimo bimaze gufatwa ari 490 225. Mu banduye bose, abagera kuri 3117 basezerewe nyuma yo gusangwa nta bwandu bagifite, abakirwaye ni 1686 mu gihe 29 bitabye Imana.

Abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi mu nsisiro cyangwa ahatuye imiryango myinshi.

Kugeza ubu nta muti n’urukingo bya Coronavirus biraboneka, hakoreshwa uburyo bwo kuvura ibimenyetso by’iki cyorezo gusa, kugeza umubiri w’umuntu wubatse ubudahangarwa, virus igashira ityo mu maraso.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Muri iki cyiciro gishya hazapimwa abantu batandukanye barimo abashoferi n'abagenzi
Iki cyiciro gishya cyo gupima Covid-19 mu buryo bwa rusange kigamije kureba uko iki cyorezo gihagaze muri Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .