Amb. Rutabana yashimiwe ifungurwa rya Ambasade ya Israel mu Rwanda n’ingendo za RwandAir i Tel Aviv

Yanditswe na Ishimwe Israel
Kuya 14 Ukwakira 2020 saa 04:39
Yasuwe :
0 0

Col Joseph Rutabana wari Ambasaderi w’u Rwanda muri Israel yasezeweho nyuma y’imyaka itanu yari amaze ahagarariye inyungu z’urwa Gasabo muri icyo gihugu.

Inama y’Abaminisitiri yo ku wa 26 Nzeri 2020 yemeje ko Col Rutabana Joseph wari usanzwe ari Ambasaderi w’u Rwanda muri Israel, asimbura Gen Maj (Rtd) Frank Mugambage wasoje manda ye nyuma y’imyaka 11 ahagarariye u Rwanda muri Uganda.

Mu muhango wo gusezera Col. Joseph Rutabana, yashimwe uko yimakaje umubano w’u Rwanda na Israel kuva mu 2015 agizwe ambasaderi muri iki gihugu cyo mu Burengerazuba bw’Isi.

Umuyobozi Mukuru muri Minisiteri y’Ububanyi n’Amahanga ya Israel, Alon Ushpiz, wamwakiriye yashimye uko umubano w’ibihugu byombi wateye imbere mu myaka itanu ishize.

Abinyujije ku rukuta rwe rwa Twitter yagaragaje ingingo zibumbatiye iyaguka ry’umubano w’impande zombi n’inyungu byagiriye abaturage.

Yagize ati ‘‘[Igihe cyo] gusezera Ambasaderi Joseph Rutabana usoje manda y’imyaka itanu nka Ambasaderi w’u Rwanda muri Israel. Mu gihe cye, umubano wa Israel n’u Rwanda warahamye byisumbuyeho binyuze mu ngendo za Minisitiri w’Intebe na Perezida, itangizwa rya Ambasade ya Israel mu Rwanda n’ingendo z’indege zihuza ibihugu byombi.’’

Ambasaderi Rutabana yanyuzwe n’ikaze yahawe, anashima imikoranire ntagereranywa n’ubufasha yahawe na Minisiteri y’Ububanyi n’Amahanga ya Israel mu gihe cy’imyaka itanu.

Tariki ya 1 Gicurasi 2019 nibwo Israel yafunguye Ambasade yayo mu Rwanda; nibwo bwa mbere iki gihugu cyagize Ambasaderi [Ron Adam], ugihagarariye i Kigali kuva mu myaka 50 ishize.

Yafunguwe nyuma y’uko muri Nzeri 2018, Perezida Kagame na Minisitiri w’Intebe wa Israël, Benjamin Netanyahu, bemeranyije kubaka umusingi uhamye w’umubano mu bya dipolomasi n’ubukungu ushingiye ku kugira za ambasade mu bihugu byombi.

Mu ntangiriro z’uyu mwaka, Minisiteri y’Ingabo y’u Rwanda n’iya Israel, zagiranye ibiganiro ku kurinda umupaka.

U Rwanda na Israël byatangiye imibanire mu 1962 ubwo u Rwanda rwabonaga ubwigenge. Uyu mubano waje gusa n’uhagarara kubera Jenoside u Rwanda rwaciyemo n’ibibazo byayikurikiye, ariko urasubukurwa ku buryo rufite ambasade ifite icyicaro i Tel Aviv guhera mu 2015.

Mu 2014 u Rwanda rwabaye igihugu cya mbere muri Afurika cyasinyanye amasezerano y’umubano na Israël. Ambasaderi wayo mu rwa Gasabo, Raphael Morav, yari afite icyicaro muri Ethiopia.

Muri Mutarama 2019, u Rwanda na Israël byashyize umukono ku masezerano yemerera sosiyete z’ubwikorezi ku mpande zombi gukoresha ibibuga by’indege no kugenderana mu ngendo zidahagaze.

Ku wa 25 Kamena 2019 nibwo indege ya Sosiyete Nyarwanda ikora ingendo zo mu kirere, RwandAir, yageze i Tel Aviv muri Israel. Ni igikorwa cyazamuye amahirwe y’ubukerarugendo, ubucuruzi n’ishoramari ku bihugu byombi ndetse abakora ingendo za gihanuzi boroherwa no kugana i Yerusalemu.

Umuyobozi Mukuru muri Minisiteri y’Ububanyi n’Amahanga ya Israel, Alon Ushpiz, yashimye umuhate wa Col Joseph Rutabana wari Ambasaderi w’u Rwanda muri Israel mu kunoza umubano w'ibihugu byombi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .