Bizagenda bite nihagira umwana wandurira Covid-19 ku ishuri ?

Yanditswe na Iradukunda Serge
Kuya 26 Nzeri 2020 saa 10:15
Yasuwe :
0 0

Minisiteri y’Uburezi ivuga ko hari uburyo bwatangiye gutekerezwaho bwakoreshwa mu gihe byaba bigaragaye ko hari umunyeshuri wanduye Covid-19, kugira ngo atanduza abandi kandi na we ahabwe ubufasha bw’ibanze.

Iyi Minisiteri itangaje ibi nyuma y’uko inama y’abaminisitiri yabaye ku wa 25 Nzeri yemeje ko amashuri afungurwa mu minsi ya vuba, ku ikubitiro hagaherwa kuri kaminuza n’amashuri makuru.

Mu kiganiro Umunyamabanga wa Leta muri Ministeri y’Uburezi ushinzwe amashuri abanza n’ayisumbuye, Twagirayezu Gaspard, yagiranye na RBA, yavuze ko hari uburyo bwatekerejweho mu kurinda abanyeshuri, igihe haba hari umwe muri bo ugaragayeho Covid-19.

Bumwe muri ubu buryo Twagirayezu avuga harimo ibyumba bisanzwe bishyirwamo abanyeshuri barwariye ku mashuri, aho avuga ko ku mashuri abisanganywe bizitabazwa igihe hari uketsweho Covid-19.

Ati "Hari aho bisanzwe cyane cyane ku mashuri yisumbuye, amwe namwe aho ngaho byari bisanzwe ariko n’ahandi bitari bisanzwe ni ikintu kigomba gutegurwa kandi mu by’ukuri ntabwo bigomba kuba ari ibitaro, icyo dusaba ni uko haba hari icyumba cyihariye umuntu ushobora kuba arwaye yaba ategererejemo kugira ngo ashobore gufashwa."

Twagirayezu yakomeje avuga ko kandi hashyirwaho amatsinda agizwe n’abarimu n’abayobozi b’inzego z’ibanze, azajya akorera hafi y’amashuri kugira ngo afashe mu gukemura ikibazo cyavuka.

Ati "Tuzashyiraho ikipe zizaba ziri hafi y’amashuri zirimo abarezi, zirimo abayobozi bo mu nzego z’ibanze aho ngaho ku buryo bazajya bahora bavugana n’ibitaro ndetse n’amashuri ku buryo ikibazo gishobora kuvuka cyakemurwa.”

Akomeza avuga ko "abantu bakwiye kumva ko kujya mu ishuri bidakuraho kwirinda."

Ku barimu n’abanyeshuri biga bataha, Minisiteri y’uburezi ivuga ko bo nk’uko byari bisanzwe, igihe bumva batameze neza bazajya baguma mu rugo kugira ngo bagabanye ibyago byo kwanduza abandi mu gihe yaba ari Covid-19 barwaye.

Kwirinda Covid-19 mu mashuri byarakajijwe

Minisitiri w’Uburezi Dr Uwamariya Valentine, Mu kiganiro yagiranye na RBA kuri uyu wa 26 Nzeri yavuze ko ingamba zakajijwe mu mashuli kugira ngo hatazagira umwana uhandurira Covid-19.

Bumwe mu buryo bwatekerejweho harimo ko nta mwana uzicarana n’undi, ibintu Dr Uwamariya yemeza ko bizashoboka ahanini babifashijwemo n’ibyumba bishya by’amashuri biri kubakwa, ndetse no kuba abanyeshuri bazajya ibihe.

Yagize ati "Bitewe rero n’ikigo aho kiri, n’umubare w’abanyeshuri, kuko duteganya ko mu ishuri nta mwana uzajya yicarana n’undi, buri wese ajya yicara ku ntebe ye. Byanze bikunze hagomba kubaho impinduka mu buryo bw’imyigishirize ndetse n’uburyo bw’ingengabihe kugira ngo twubahirize n’aya mabwiriza ya Minisiteri y’ubuzima, kuko nubwo tuvuze gufungura amashuri, icyorezo kiracyahari."

Minisitiri Uwamariya yavuze ko nta shuri rizemererwa gufungura ridafite uburyo bwo gukaraba intoki ku bana, kandi “byanze bikunze nta mwana uzemererwa kujya ku ishuri atambaye ugapfukamunwa.”

Yasabye abanyeshuri, ababyeyi n’abanyarwanda muri rusange kwitegura kurushaho kubahiriza ingamba zose zashyizweho, mu kwirinda COVID-19.

MINEDUC ivuga ko nta mwana uzongera kwicarana n'undi, kandi ko uzajya ugaragaraho Covid-19 azajya ashyirwa ahabugenewe mu gihe ategereje ubufasha bw'abaganga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .