Bombori bombori muri APEFE Mweya, baritana ba mwana ku mwenda wa miliyoni 40 Frw

Yanditswe na Mukwaya Olivier
Kuya 11 Ukwakira 2020 saa 05:35
Yasuwe :
0 0

Abayobozi b’Ishyirahamwe rya Actions Des Parents Pour l’Education et la Formation des Enfants (APEFE Mweya) barashinja umuyobozi wabo Ndakaza Laurent kugundira ubuyobozi kuko hashize imyaka ibiri yarakuweho no kurigisa imitungo yabo irimo amashuri ari mu Murenge wa Gisenyi.

APEFE Mweya ni ishyirahamwe ritegamiye kuri Leta ryashinze ishuri rigamije guteza imbere uburezi mu Murenge wa Gisenyi aho ryari rifite ishuri ry’incuke, iribanza n’iryisumbuye. Icyakora kubera amakimbirane yakunze kurivugwamo ubu amashuri yisumbuye n’abanza yarafunzwe.

Aya mashuri yafunzwe na Minisiteri y’Uburezi muri Gashyantare 2019 kubera akajagari kari mu buyobozi bw’iri shyirahamwe nyuma yuko bakuyeho Ndakaza Laurent bagashyiraho Mukankaka Marianne.

Muri Kanama 2018 nibwo muri APEFE Mweya hatangiye kuvugwa amakimbirane mu banyamuryango bayo, yatumye n’ubuyobozi bweguzwa ariko uw’ikigo arinangira.

Aya makimbirane yagize ubukana nyuma ya raporo yakozwe igaragaza ko Umuyobozi w’Ikigo, Ndakaza Laurent, yakoresheje nabi umutungo ufite agaciro ka miliyoni 60 z’amafaranga y’u Rwanda bituma hafatwa umwanzuro kumukuraho ariko yanga kuvaho.

Ku wa 26 Kanama 2018 nibwo abanyamuryango batoye Mukankaka ngo ayobore ikigo ariko Ndakaza yanze kuvaho byatumye havuka umwiryane mu bashinze iki kigo bituma abana bahigaga bagenda bagabanuka.

Mu rugendo yarimo mu Karere ka Rubavu ku wa 8 Gashyantare 2019 rwari rugamije kureba uko uburezi butangwa, uwahoze ari Minisitiri w’Uburezi, Dr Mutimura Eugène, yakirijwe ikibazo n’uwitwa Niyonsaba Sangwa Pascasie wavuze ko yirukanwe na APEFE Mweya, akitabaza inzego zitandukanye ariko ntibigire icyo bitanga.

Dr Mutimura Eugène nyuma yo kumva ikibazo cy’abarimu n’ibibazo by’ubwumvikane buke hagati y’abagishinze yafashe icyemezo cyo gufunga Ikigo cy’Amashuri Abanza n’Ayisumbuye cya APEFE-Mweya.

Nyuma y’uko ikigo gihagaritswe akavuyo n’umwiryane byarakomeje Ndakaza wakuweho agumana ikigo n’abamukuyeho bakomeza kuvuga ko bamukuyeho ariko ntibyamubuza kugumana amakonti no kwakira ubukode bw’inzu z’ikigo kuko nubwo ikigo cyafunzwe ubu ibyumba bikoreramo irindi shuri.

Ku wa Gatanu w’icyumweru gishize nibwo Umuhesha w’Inkiko w’Umwuga, Umulisa Clémence, yaje guteza cyamunara inyubako z’iki kigo kubera umwenda wa miliyoni 40 Frw zafashwe n’ubuyobozi biteza impagarara kuko abanyamuryango bitambitse umuhesha w’inkiko.

Abanyamuryango ba APEFE Mweya bavuga ko ideni Ndakaza Laurent yarifashe ku giti cye kuko yarifashe mu izina rya Actions Des Parents Pour l’Education et La Formation Des Enfants (Apefe Mweya) mu gihe bo bavuga ko basanzwe ari Association des Parents pour l’Education et la Formation des Enfants-Mweya (APEFE - Mweya).

Mbonabucya Jean Bosco, umwe mu banyamuryango avuga ko Ndakaza Laurent yashinze undi muryango nuko yaka ideni atanga ingwate y’inzu z’ishyirahamwe ryabo nta n’uburenganzira ahawe.

Yagize ati "Yashinze Actions Des Parents Pour L’education Et La Formation Des Enfants (Apefe Mweya) nuko afata ideni muri banki atanze ingwate, Association des Parents pour l’Education et la Formation des Enfants-Mweya (APEFE - Mweya), nta banyamuryango bamusinyiye kandi yananyereje amafaranga menshi mbere yari afite icyangombwa cya RGB kimwemerera gukora by’agateganyo ariko ubu yarahagaritswe. Uyu munsi ishuri ni irya association twamushyizeho by’agateganyo nuko ashinga Action ye n’abantu 12 tubimenya byararangiye twamukuyeho yanga kuvaho ni na we ukodesha inzu z’ikigo.’’

Umuyobozi watowe wa APEFE Mweya, Mukankaka Marianne, avuga Ndakaza yabagambaniye agatanga umutungo wabo ho ingwate batabizi agasaba ko barenganurwa.

Ati "Turasaba kurenganurwa kuko iri deni yafashe ni ku giti cye ntabwo abanyamuryango barizi twasabye ubuyobozi ko bwadufasha nta cyo bakoze wagira ngo baramutinye. Iriya action ntibaho, natwe twasabye RGB ko yabitesha agaciro akarere yaragasuzuguye bamutumije inshuro eshatu tukaza we akabura twandikiye RDB ko batesha cyamunara kuko ntabwo yabayeho haje abakomisiyoneri n’uwaguze yahamagawe kuri telefoni ni ikinamico bari bapanze mbere ikigo cyacu bagitesheje agaciro kuko inguzanyo bayihaye Action si Association.’’

Ndakaza Laurent ku ruhande rwe avuga ko abamurwanya ari ubugome batahwemye kumwereka kuko we yatangiye kuyobora inguzanyo yaratanzwe mu myaka ibiri yabanje.

Yagize ati "Barabeshya iriya ngwate narayisanze si njyewe wayitanze nasanze irimo bariya bantu bafite ubugome bwinshi iyo batagushaka baba batagushaka ubwo baba bakwanga nibyo bihaye. Ntabwo ndi umugabo wo kubeshya ibintu nanasubiramo nasanze ingwate yaratanzwe nagiye ku buyobozi mu 2014 ingwate yari yaratanzwe mu 2012.’’

Amakimbirane muri APEFE Mweya yatangiye ubwo uwari umuyobozi w’uyu muryango Ndakaza Laurent nyuma y’imyaka ine yavanwaga ku buyobozi akanga kuburekura bigatuma APEFE icikamo ibice bibiri, kimwe kigizwe n’abamurwanya bamushinja imicungire mibi y’umutungo, ikindi kigizwe n’abamushyigikiye.

Amashuri abanza ya APEFE Mweya kuri ubu yarafunzwe
Abanyamuryango ba APEFE Mweya babujije umuhesha w'inkiko kwinjira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .