CMI na Polisi ya Uganda mu bushyamirane bushingiye ku ifatwa ry’abambari ba RNC

Yanditswe na Musangwa Arthur
Kuya 7 Ukwakira 2020 saa 12:22
Yasuwe :
0 0

Ku wa 28 Nzeri nibwo byamenyekanye ko Polisi ya Uganda yataye muri yombi abarwanashyaka umunani ba RNC ya Kayumba Nyamwasa, bafatwa barimo gukorera inama mu nyubako z’ishuri ribanza rya Kalungi, riherereye mu karere ka Mubende.

Ni inama zarimo ziba mu mugambi umaze igihe kinini w’uburyo Urwego rw’Iperereza rya Gisirikare muri Uganda, CMI, rwakajije umurego mu gutera inkunga umutwe wa RNC, ku mabwiriza ya Perezida Yoweri Museveni, intego ari imwe yo guhirika ubutegetsi bw’u Rwanda.

Amakuru ahamya ko abambari ba RNC bafashwe icyo gihe ari Nzayisenga Athanase, Bakunzi Bernard, Kasimu, Mugema Fred, Ngendahimana James, Nzeyimana Eric, Byaruhanga Robert na Gahungahirwe Vianney.

Ikinyamakuru Virunga Post cyatangaje ko mu makuru cyabonye, hashingiwe ku byo biyemereye n’ibimenyetso byafatiwe muri telefoni na mudasobwa zabo, Polisi ya Lubali yahise itangira gukora dosiye ndetse batabwa muri yombi.

Iryo tsinda ngo ryari rikuriwe na Kasimu na Nzeyimana Eric, bombi bari mu batawe muri yombi. Bari baturutse muri Nakivale, boherejwe na Frank Ntwari, akaba muramu wa Kayumba Nyamwasa.

Ntwari ni ‘komiseri ushinzwe urubyiruko’ muri RNC, ariko asa n’uri ku ruhembe rw’ibikorwa byinshi kuva Ben Rutabana wari komiseri ushinzwe kongera ubushobozi, harimo no gushaka abarwanashyaka bashya, yaburirwa irengero muri Nzeri umwaka ushize ubwo yari mu ruzinduko muri Uganda, nyuma yo gushwana na Kayumba na Ntwari.

Ubwo abo bagabo babiri boherejwe na Ntwari n’abandi bantu batandatu bari binjijwe muri uwo mutwe bafatwaga ndetse bagafungwa, bemeye ko bafitanye imikoranire na RNC.

Iyo nkuru ubwo yagwaga mu gutwi kwa CMI, yihutiye gusaba polisi ko yabarekera dosiye bakaba aribo bayikurikirana. Icyo gihe hari nyuma y’uko RNC itangarije ko “abakada bacu bafatiwe i Mubende.”

Abo barwanashyaka nyuma barekuwe ku mabwiriza yatanzwe na CMI, mu cyo abasesenguzi bagaragaza ko hari ikibazo mu mikorere ya Polisi n’imikoranire yayo na CMI, by’umwihariko ku bibazo by’umutekano bigaruka ku mutwe wa RNC muri Uganda.

Ku ruhande rumwe, bisa n’aho CMI ifite inshingano zo gukorana ndetse no gutanga ubufasha mu bikorwa byose bya RNC byo kurwanya u Rwanda uko byagenda kose. Muri ubwo buryo, abasesenguzi bagaragaza ko bisa n’aho nta muntu n’umwe uretse CMI na Perezida Museveni wa Uganda, bemerewe kumenya ibikorwa bya RNC muri icyo gihugu.

Ku rundi ruhande nyamara, polisi mu nshingano zayo harimo gufata abagize amatsinda nk’aya ashidikanywaho. Nyamara mu gihe babikoze, nk’uko byagenze nyuma y’ifatwa rya bariya umunani ba RNC bafatiwe mu cyuho barimo gucura imigambi mibisha ku gihugu cy’abaturanyi, CMI ibyinjiramo bagahita barekurwa.

Umwe mu basesenguzi utashatse ko amazina ye atangazwa yagize ati “Biragaragara neza ko polisi itigeze imenyeshwa ibijyanye n’ibikorwa bya RNC muri Uganda.”

Ibyakozwe na CMI nyamara binyuranye n’amasezerano y’ubufatanye yasinyiwe i Luanda muri Angola muri Kanama umwaka ushize, hagati ya ba Perezida Paul Kagame na Yoweri Museveni, isinywa ryakurikiranywe n’abakuru b’ibihugu barimo João Manuel Gonçalves Lourenço wa Angola na Felix Tshisekedi wa RDC.

Ayo masezerano yari agamije kuzahura umubano hagati y’u Rwanda na Uganda, aho impande zombi zemeranyije gukumira ibikorwa bigamije guhungabanya igihugu kimwe byabera ku butaka bw’ikindi no gukuraho impamvu zatuma bikekwa ko ibyo bintu birimo kuba.

Abasesenguzi bagaragaza ko ahubwo Uganda yakoze ikinyuranyo cy’ibyo, kuko ibikorwa bya RNC muri Uganda bikomeje nta nkomyi.

Nyuma y’uko abarwanyi ba RNC bari mu mashyamba ya Congo bashwiragijwe n’ingabo za leta bamwe bakicwa abandi bagafatwa bakagezwa mu nkiko z’u Rwanda, Uganda yahinduye amayeri, yiyemeza gushyiraho amasomo ku barwanashyaka ba RNC.

Imwe mu ntambwe ebyiri ziheruka kujya ahabona ko Uganda yimirije imbere mu guhirika ubutegetsi bw’u Rwanda, iya mbere ni ukubanza kubaka “abakada bafite ingengabitekerezo nzima”. Ni igikorwa cyabimburiwe no gushyiraho gahunda y’amasomo ya RNC muri Uganda, mu ishuri riherereye i Bugolobi muri Kampala.

Birashoboka ko abantu umunani bari bafatiwe i Mubende ari umusaruro w’iyo gahunda.

Mu kiganiro Minisitiri w’Ububanyi n’Amahanga w’u Rwanda, Vincent Biruta, aheruka kugirana na Jeune Afrique, yabajijwe niba umubano na Uganda waba umaze gusubira ku murongo, nyuma y’inama nyinshi zabaye zigamije gushaka umuti w’ikibazo.

Yagize ati “Haracyari ibikenewe gukorwa kugira ngo umubano usubire ku murongo, ariko turi kugana mu cyerekezo kizima. Hari Abanyarwanda bari bafungiwe muri Uganda mu buryo bunyuranye n’amategeko barekuwe ariko hari imitwe yitwaje intwaro yakoreraga muri Uganda yanagabye ibitero mu Ukwakira 2019 n’ubu igikora.”

“Ikomeje guhabwa inkunga na bamwe mu bayobozi ba Uganda. Mu mezi ashize banakoze ibikorwa bya politiki mu nkambi z’impunzi kandi babifashijwemo n’inzego z’umutekano. Duhora dutegereje ko hagira igikorwa kugira ngo bihagarare.”

Kayumba Nyamwasa akomeje gukingirwa ikibaba na Maj Gen Abel Kandiho uyobora CMI

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .