Gakenke: Abayobozi bahawe ukwezi kumwe abaturage bakaba bamaze kuzirika ibisenge mu kwirinda ibiza

Yanditswe na N.Kubwimana Janvière
Kuya 18 Ukwakira 2020 saa 09:24
Yasuwe :
0 0

Guverineri w’Intara y’Amajyaruguru Gatabazi Jean Marie Vianney, yahaye abayobozi batandukanye bo mu Karee ka Gakenke, igihe kingana n’ukwezi kumwe, abaturage bose bakaba bamaze kuzirika neza ibisenge by’inzu zabo, kugira ngo bizabafashe kugabanya ingaruka z’ibiza bikunze kwibasira aka Karere.

Ni umukoro yabahaye kuri uyu wa 17 Ukwakira 2020, ubwo hatangizwaga ku mugaragaro ubukangurambaga bugamije gukangurira abaturage kuzirika neza ibisenge by’inzu mu gukumira ibiza, ibikorwa bizajyana no gukomeza kubakira abo ibiza byasenyeye no kwimura imiryango igituye mu manegeka akabije.

Guverineri w’Intara y’Amajyaruguru, Gatabazi Jean Marie Vianney, yasabye abayobozi gukurikirana ibi bikorwa byo kuzirika ibisenge by’inzu z’abaturage no gutera ibiti hafi y’aho batuye, anibutsa abaturage kubyitaho basigasira ubuzima bwabo.

Yagize ati "Twatangije ubukangurambaga bwo gukangurira abaturage kuzirika ibisenge by’inzu zabo kugira ngo bazirinde ko ejo n’ejo bundi umuyaga wazazitwara, kuko ibiza ntabwo biteguza, abayobozi turabasaba ko nibura mu kwezi kumwe ibisenge by’inzu zose byaba biziritse, aho bizaba bitakozwe abayobozi baho bazabibazwa"

"Abaturage nabo tubasaba ko mu gihe bagiye kubaka, inzu bazerekeze mu gice umuyaga uturuka inyuma, hari uyubaka kuko atabizi akayerekeza aho ashaka, niyo mpamvu tubegera tukabasobanurira ibi byose birimo no gutera ibiti bikikije inzu, nabyo bigabanya umuyaga. Ubundi kuzirika neza ibisenge bikaba umwihariko, bakoresheje imigozi itandukanye, impurumpuru n’ibindi."

Guverineri Gatabazi yavuze ko ubu bukangurambaga bwo kuzirika ibisenge by’inzu bitareba inyubako z’abaturage gusa, ahubwo bireba inyubako zose zirimo n’amashuri kugira ngo nayo ibisenge byayo bidakomeza gutwarwa n’umuyaga, anongeraho ko bazakoresha n’uburyo bwo gufata amazi nayo agira uruhare mu kwangiza inzu.

Bamwe mu baturage bagizweho ingaruka n’ibiza, bavuga ko iki gikorwa gikwiye gukorwa bidasabye ingufu z’abayobozi kuko ari ukurengera ubuzima bwabo, ariko bakanagira inama abacyubaka mu manegeka bitwaje ko ari ubutaka bwa gakondo, kubicikaho kuko byazashyira ubuzima bwabo mu kaga.

Nyirarubanza Odette ni umukecuru w’imyaka 61, wubakiwe inzu nyuma y’uko imvura imusenyeye. Yavuze ko ashimira cyane Leta yamwibutse, ikongera kumutuza neza kandi heza.

Yagize ati "Imvura yaguye nijoro mu gicuku, kuko nari ntuye ku musozi uhanamye, uratenguka ugwira inzu yose irahirima, amahirwe ni uko nari naraye kwa mama, nanjye mba narahaguye. Bimaze kumbaho narihebye cyane ko nta mbaraga zo kwiyubakira nagiraga, ariko ndashima (avuza impundu) Leta inyibutse nkaba nongeye kubona aho nkinga umusaya ntuje."

Ibiza biherutse kwibasira Akarere ka Gakenke muri Gicurasi 2020, byahitanye ubuzima bw’abagera kuri 24, bisenya inzu 1748. Abasenyewe n’ibi biza bahise bubakirwa izindi, ubu hasigaye inzu 252 nazo hamaze kuboneka ibisabwa byose ngo zubakwe.

Ni mugihe mu Ntara yose y’Amajyaruguru abasenyewe n’ibiza muri Gicurasi 2020 bageraga ku bihumbi bine, gusa ubu hasigaye imiryango hafi 580 itarabona ibibanza byo kubakirwamo, ndetse hakomeje gukusanywa ubushobozi ngo nabo bubakirwe.

Abasenyewe n'ibiza bakomeje kubakirwa
Abongeye gutuzwa nyuma yo gusenyerwa n'ibiza bashimira leta

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .