Guverineri Gatabazi yasabye abayobozi kutarebera mu mibare uburemere bw’ikibazo cy’abana bahohoterwa

Yanditswe na N.Kubwimana Janvière
Kuya 10 Ukwakira 2020 saa 11:00
Yasuwe :
0 0

Guverineri w’ Intara y’Amajyaruguru, Gatabazi Jean Marie Vianney, yasabye abayobozi batandukanye bo mu nzego z’ibanze kutibuka guhangana n’ikibazo cy’abana basambanywa bakiri bato, ari uko imibare yazamutse, ahubwo ababwira ko n’umwana umwe wasambanyijwe akwiye kubahangayikisha kubera agaciro k’ubuzima bwe.

Ni umukoro yabahaye kuri uyu wa 9 Ukwakira 2020, ubwo bari mu nama nyunguranabitekerezo, yari ifite intego yo kwigira hamwe kurwanya gusambanya abana, kubarinda imirimo ivunanye ibakoreshwa, no kubarinda Covid-19 n’ingaruka zayo, mu bukangurambaga buzamara imyaka itanu bwateguwe n’ihuriro ry’abakozi bo mu bucukuzi bw’amabuye y’agaciro REW.

Kugeza ubu mu mu Ntara y’Amajyaruguru habarurwa abana bagera kuri 424, basambanyijwe bakabyara bari munsi y’imyaka 18, mu gihe kingana n’amezi umunani gusa muri uyu mwaka wa 2020.

Ibi byatumye Guverineri Gatabazi yibutsa abayobozi ko badakwiye guhangayikishwa n’iki kibazo cy’abana basambanywa n’abakoreshwa imirimo ivunanye, ari uko umubare wabo wazamutse, ahubwo ngo n’umwe yakwiye kubahangayikisha bitewe n’agaciro k’ubuzima bwe.

Yagize ati “ Ikibazo cy’abana barimo gusambanywa bakabyara bakiri bato kirahangayikishije bikomeye. Mwabonye ko imibare baduhaye iri hejuru cyane, icyo navuga ni uko icy’ingenzi atari imibare, hari abakibona ko iki kibazo gikomeye babirebera ku mibare, niyo yaba umwana umwe akwiye kubahangayikisha kuko nibo Rwanda rw’ejo, ntitwagira igihugu kizima dufite abana bangiritse gutya”.

Yakomeje abibutsa ko mbere yo gushyira imbaraga mu guhangana n’iki kibazo, bagomba gufata umwanya uhagije bakakigaho, bakakigiraho ubumenyi buhagije, bakabona kukinjiramo, bityo bakarokora ubuzima bw’aba baba bakomeje kwibasirwa n’ababangiriza ubuzima.

Abayobozi nabo biyemerera ko muri ibi bihe bya Covid-19, bahugiye kuri iki cyorezo bakagabanya umwanya wo gukurikirana iki kibazo gusa bahuriza hamwe ko bagiye kongera gushyiramo imbaraga, kugira ngo barusheho kurengera ubuzima bw’aba bana.

Umuyobozi w’Akarere ka Burera Uwanyirigira Marie Chantal yagize ati “Muri ibi bihe bya Covid-19, niho abana benshi bahuye n’ibibazo birimo gushaka no kubyara imburagihe, bakoreshwa imirimo ivunanye irimo ubucuruzi buciriritse, ubucukuzi bw’amabuye y’agaciro, kubikoreza amatafari n’ibindi, biragaragara ko twahugiye mu bindi tukadohoka ku nshingano zacu, ariko ubu tugiye kongera guhuza imbaraga mu guhagurukira iki kibazo".

Umuyobozi uhagarariye sendika iharanira imibereho myiza n’iterambere ry’abakora ubucukuzi bw’amabuye y’agaciro na za kariyeri, Mutsindashyaka Andrew yavuze ko muri iki gihe u Rwanda rwugarijwe n’ikibazo cy’abana bahohoterwa, bakanakoreshwa imirimo ivunanye, ikibazo babona ko kititaweho cyazagira ingaruka zikomeye ku Gihugu, ariyo mpamvu batangije ubukangurambaga bw’imyaka itanu bugamije guhangana n’iki kibazo.

Ati “Impamvu twahisemo gutangiza ubu bukangurambaga ni uko muri iki gihe ari kimwe mu bibazo byugarije Igihugu, aho usanga abana bashowe mu busambanyi, abandi bagakoreshwa imirimo y’imvune, twasanze iki kibazo kidafatiwe ingamba zikarishye umuryango nyarwanda wazakwangirika bikomeye.”

Ubukangurambaga bwo kurwanya gusambanya abana bato no kubakoresha imirimo ivunanye biteganyijwe ko buzamara imyaka itanu, bukagera ku bana bari munsi y’imyaka 18, bagera kuri Miliyoni ebyiri, bahurizwa mu mahuriro atandukanye bigishwa uburenganzira bwabo ndetse n’abari barataye ishuri bakarisubizwamo.

Guverineri Gatabazi yavuze ko abayobozi bagomba kwita ku kibazo cy'abana bahohoterwa n'iyo baba ari bake
Iyi nama yari igamije kurebera hamwe ingamba zo guhashya ibituma abana bahohoterwa
Guverineri Gatabazi yavuze ko n'iyo yaba umwana umwe wahohotewe, bikwiriye guhangayikisha kuko ari igihombo ku gihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .