Hahirwa abazaba bakiriho: Ishusho y’u Rwanda mu 2050

Yanditswe na Ishimwe Israel
Kuya 17 Ugushyingo 2020 saa 07:00
Yasuwe :
0 0

Ibyari inzozi za benshi ubu byabaye impamo, bimwe mu byatekerezwaga nk’ibidashoboka Abanyarwanda babibonesheje amaso yabo. Si inkuru mbarirano kuko wa mwaka w’icyerekezo ‘Vision 2020’, Abanyarwanda twawugezemo.

‘Vision 2020’ yashyizweho mu kurushaho kwita ku mibereho myiza y’abaturage n’iterambere ry’ubukungu bw’igihugu.

Iyo usubije intekerezo inyuma muri za 2000, igitekerezo cy’icyerekezo 2020 benshi bagifataga nk’ikiri kure ku buryo hari n’ababonaga iyo ntambwe kuyitera ari inzozi zidashobora gusohora.

Kuri ubu uwaherukaga mu Rwanda rwa mbere y’icyo gihe, arugezemo yarandatwa bidatewe n’ubumuga bwo kutabona ahubwo kubera iterambere rihari mu ngeri zitandukanye.

Uretse kuba Abanyarwanda barangwa n’isuku, umutekano, bafite ubuzima bwiza n’ibindi, yanahasanga ibikorwa remezo nk’imihanda, amavuriro, amashuri, imiturirwa n’ibindi byubatswe mu rugendo ruganisha kuri viziyo.

Iterambere u Rwanda rumaze kugeraho ntiryatumye rwirara kuko ubu ruhanze amaso 2050, nk’icyerekezo gishya kigomba gusiga igihugu kigeze ku rundi rwego.

Mu kiganiro Perezida Paul Kagame yagiranye n’abanyamakuru nyuma y’Inama y’Umushyikirano, yo ku wa 22 Ukuboza 2015, yavuze ko intego z’Icyerekezo 2020 zigenda neza kandi ko cyakubakirwaho n’ibindi byiza.
Ati “Icyo navuga ni uko ibimaze kugerwaho ari urugero rw’ibishobora kugerwaho, ni ukuvuga rero ko mu gihe tugenda neza mu cyerekezo cya mbere twihaye cya 2020, turi hafi kugera aho ngaho! Tumaze kugenda urugendo rutari rugufi. Ku Cyerekezo 2050 ubwo nabyo ni ukuvuga ko bishoboka twubakiye ku bimaze kugerwaho.’’

Icyerekezo 2050 kibumbatiye impinduka mu mfuruka zose z’ubuzima, ariko by’umwihariko hahangwa amaso izamuka ry’ubukungu no kwimakaza imibereho myiza y’abaturage.

-  Mu mibare: Ishusho y’uko Abanyarwanda bazaba babayeho mu 2050

Urebye aho igihugu cyavuye mu myaka isaga 26 ishize, nyuma ya Jenoside yakorewe Abatutsi, hari intambwe ifatika yatewe ku buryo n’icyerekezo cya 2050 nta gushidikanya ko kizagerwaho.

Inyandiko yiswe ‘Icyerekezo 2020 cy’u Rwanda’ ikubiyemo ibyari byiyemejwe mu cyerecyezo 2020, ivuga ko intandaro y’icyo cyerecyezo yabaye uruhererekane rw’ibiganiro ngishwanama byabereye muri “Village Urugwiro” mu 1998 kugeza mu wa 1999 bigamije kureba ku hazaza h’u Rwanda.

Mu ntangiriro za 2018, Minisitiri w’Intebe, Dr Ngirente Edouard yatangaje ko mu ntego 52 zashyiriweho icyerekezo 2020, izigera ku munani zingana na 15% arizo zari zimaze gushyirwa mu bikorwa ku kigereranyo cya 100%.

Muri izo ntego, izigera kuri 19 zingana na 37% zari zimaze gushyirwa mu bikorwa ku gipimo kiri hejuru ya 75%; intego 19 zingana na 37% zimaze gushyirwa mu bikorwa ku gipimo kiri hejuru ya 50% n’intego esheshatu zingana na 12% zimaze gushyirwa mu bikorwa ku gipimo kiri munsi ya 50%.

Icyerekezo 2020 cyihaye inkingi magirirane esheshatu, zirimo imiyoborere myiza no gucunga neza ibya rubanda, umutungo ushingiye ku bantu bafite ubushobozi, urwego rw’abikorera rukomeye, ibikorwaremezo bijyanye n’igihe tugezemo, ubuhinzi n’ubworozi buvuguruye, byose bigamije kugera ku masoko yaba ay’imbere mu gihugu, mu karere turimo ndetse n’ahandi ku Isi.

Uyu murongo kandi niwo igihugu cyakomerejeho mu 2050 ahahawe umwihariko intego 46 zigomba kuba zagezweho mu myaka 30 iri imbere.

Izi ntego zubatse ku buryo kuva ku mwana ukiri urusoro mu nda ya nyina kugeza ku musaza wa wundi w’imvi z’uruyenzi azishimira kuba muri icyo gihugu kizaba gitemba amata n’ubuki.

Imibare ya Minisiteri y’Imari n’Igenamigambi, igaragaza ko u Rwanda rufite intego yo kugira ubukungu buciriritse mu 2035 no kugera ku iterambere mu 2050.

Icyerekezo 2050 ni umwe mu myanzuro yafatiwe mu Nama ya 13 y’Umushyikirano yabaye ku wa 21 na 22 Ukuboza 2015, kigamije kongera ubukungu kugira ngo Abanyarwanda barusheho kwigira no kwigenera ahazaza bashaka, hunganirwa ibyagezweho mu cyerekezo 2020.

Muri icyo cyerekezo, biteganyijwe ko Umunyarwanda azaba yinjiza asaga miliyoni 10 Frw ku mwaka, afite ubuzima bwiza, agerwaho n’amazi meza, amashyanarazi ahagije kandi ahendutse, serivisi zose z’ubuvuzi zaranogejwe agerwaho n’uburezi bufite ireme ryo hejuru cyane rijyanye n’igihe.

Ibi bizanajyana kandi n’ibikorwa remezo biteye imbere, ubwikorezi bumeze nk’ubwo mu bihugu byateye imbere n’ibindi.

-  Icyizere cyo kubaho kiziyongeraho imyaka itandatu

Mu 2000 icyizere cyo kubaho cy’Umunyarwanda cyari ku myaka 49, intego ari ukugeza ku myaka 66. Ubu iki gihe kigeze ku myaka 67 mu gihe byitezwe ko izaba ari 73 mu 2050.

-  Ubwiyongere bw’abaturage

Mu myaka 20 ishize, Umunyarwanda umwe yabyaraga abana 5,8, intego ari ukugera kuri batatu. Ubwiyongere bw’abaturage bwari kuri 2,9%, bagera kuri 2,5% mu 2019. U Rwanda rwiyemeje ko uyu mubare uzagera kuri 1.7% mu 2035 na 1.4% mu 2050.

Kuri ubu Umunyarwanda abyara abana 4.2, biteganyijwe ko bazagera kuri batatu mu 2035 na 2.6 mu 2050.

Abana bapfa bataruzuza imyaka itanu bitezweho kuva kuri 50/1000 bo mu 2014/2015, bakagera kuri 24/1000 bo mu 2050 naho ababyeyi bapfa bazava kuri 210/1000 bo mu 2014/2015 bagere munsi ya 20/1000 mu 2050.

Muri iki cyerekezo kandi umubare w’abana bagwingiye witezweho kuva kuri 38% mu 2014/2015 ukagera kuri 3% mu 2020.

-  Umusaruro umuturage yinjiza ku mwaka

Inama zo muri “Village Urugwiro” mu 1998 kugeza mu wa 1999 zemeje kongera umusaruro mbumbe w’umuturage ukava ku 250$ ku mwaka akagera ku madolari 900$ mu 2020. Ibyo byasabaga ko ubwiyongere bw’ubukungu buzamuka nibura kuri 7% buri mwaka.

Kuri ubu umusaruro mbumbe w’umuturage uri kuri $818, byitezwe ko uzagera kuri $4036 mu 2035 mu gihe mu 2050 uzaba ubarirwa mu $12476, asaga miliyoni 10 Frw.

Mu cyerekezo 2050 kandi igipimo cy’uko ubukungu busaranganyijwe mu baturage biteganyijwe ko kizava kuri 0.43% yo mu 2017, kikagera kuri 0.3 mu 2050.

-  Igabanuka ry’ubushomeri

Imibare y’Urwego rw’Igihugu rw’Iterambere yo mu Ukuboza 2019 yerekanye ko abihangira imirimo ibinjiriza miliyari 1 Frw ariko ko mu 2050 hakenewe abahanga imishinga yinjiza nibura miliyari imwe y’amadorari bagatanga akazi ku bihumbi 50.

Kuri ubu ubushomeri buri kuri 14% mu gihe byitezwe kugera kuri 7% mu 2035 na 0.05% mu 2050.

Iki cyerekezo kandi cyanashyize imbaraga mu bikorwa remezo aho igihugu cyose kizaba kigerwaho n’amashanyarazi n’amazi meza.

Kuri ubu abaturage bafite umuriro w’amashanyarazi bagera kuri 54%, intego ihari ni uko uyu mubare uzaba wageze ku 100% bitarenze 2024.

Mu gihe mu 2000 byasaga nk’aho nta Munyarwanda ukoresha internet, hari intego yo kuyigeza ku Banyarwanda 50%. Imibare yo mu 2018 yerekana ko bari bageze kuri 21.77%, bazazamuka bakagera kuri 60% mu 2035 mu gihe 2050 izasiga ari 88%.

U Rwanda rufite intego yo kuba igicumbi cy’ikoranabuhanga. Mu 2014 nibwo rwatangije ikoreshwa rya internet yihuta ya 4G, ndetse rukomeje gukwirakwiza umurongo mugari wa internet hifashishijwe ‘fibres optique’, intego ikaba kuyigeza mu turere 30 tugize igihugu ahamaze kubakwa n’ireshya n’ibilometero 7000.

Mu 2050, byitezwe ko u Rwanda ruzaba rutuwe n’abaturage basaga miliyoni 22, barimo 70% bazaba batuye mu mijyi izaba yararimbishijwe bijyanye n’igishushanyo mbonera cyayo naho 30 batuye mu byaro.

Umujyi wa Kigali wo mu 2050 uzaba uteye amabengeza
Igishushanyo Mbonera giteganya ko mu 2040 agace gakorerwamo ibikorwa by’ubucuruzi muri Kigali kagizwe na Muhima, Nyarugenge na Kimicanga ari uku kazaba gateye. Hazashyirwa ibikorwaremezo bifasha mu bucuruzi aho amavugurura azahera Kimicanga (agace kabanza ku ruhande rw’ibumoso ku ifoto) kugeza Nyabugogo (ahari inzu zisa ku murongo ugaragara iburyo ku ifoto)
Imiturirwa iteye muri ubu buryo niyo iteganyijwe muri Kigali ngo izafashe mu bucuruzi
Igishushanyo mbonera cyagiye ahagaragara mu 2013, kigaragaza uburyo umurwa mukuru w’u Rwanda uzagenda uhindurwa gahoro gahoro bijyanye n’ubushobozi bw’igihugu, intego ari uko mu 2040 umujyi uzaba umaze kunoga
Byitezwe ko umujyi wa Kigali uzaba ari umujyi urengera ibidukikije

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .