Hahishuwe ko Rusesabagina yari afite gahunda yo guhura na Perezida Ndayishimiye w’u Burundi

Yanditswe na IGIHE
Kuya 24 Nzeri 2020 saa 11:49
Yasuwe :
0 0

Itabwa muri yombi rya Paul Rusesabagina rikomeje kuvugwaho byinshi, ndetse umunsi ku wundi hamenyekana amakuru mashya y’impamvu z’urugendo rwe rwavaga muri Leta Zunze Ubumwe za Amerika rugana i Burundi, ariko anyuze mu Mujyi wa Dubai.

Rusesabagina yeretswe itangazamakuru ku wa 31 Kanama 2020, RIB isobanura ko yatawe muri yombi afatiwe ku Kibuga Mpuzamahanga cy’Indege cya Kigali ndetse ko yageze mu Rwanda ku bushake.

Uyu mugabo ufite ubwenegihugu bw’u Bubiligi yafatiwe mu Rwanda nyuma y’igihe kinini yari amaze aba mu Mujyi wa San Antonio muri Leta ya Texas. Aha niho yavuye yerekeza i Chicago aho yafatiye indege yamugejeje i Dubai ku wa 26 Kanama.

Icyo gihe ngo yavuganye n’umuryango we uba mu Bubiligi kuri telefoni, dore ko badaherukana kubera icyorezo cya Coronavirus. Ntabwo yigeze ababwira impamvu zamujyanye i Dubai, ahubwo ngo yavuze ko ibyo arimo ari urugendo rw’akazi.

Ikinyamakuru Le Soir cyatangaje ko "mu by’ukuri, yari agambiriye kwitabira ubutumire bwo kujya i Burundi kugira ngo ahure na Perezida mushya, Evariste Ndayishimiye."

Yamaze amasaha atandatu i Dubai ategereje, nyuma aza gufata indege bwite yakekaga ko yohererejwe n’abantu bakomeye b’i Burundi.

Iyo ndege yamuvanye ku Kibuga cy’Indege cya Al Maktoum i Dubai ni iyo mu bwoko bwa Bombardier Challenger 605 y’isosiyete yitwa GainJet. Ibinyamakuru byinshi byanditse ku ifatwa rye, byagiye bivuga ko iyi sosiyete ijya ikorera ingendo mu Rwanda.

Mu kiganiro aherutse kugirana na New York Times yavuze ko icyo gihe yari agiye i Burundi ku butumire bw’inshuti ye y’umuvugabutumwa witwa Constantin Niyomwungeri, aho ngo yagombaga kuganiriza abantu kuri filimi yamwamamaje yitwa ’Hotel Rwanda’.

Umunyamabanga Mukuru w’Urwego Rushinzwe Umutekano n’Iperereza, Gen Maj Joseph Nzabamwita, yabwiye Le Soir ko ifatwa rya Rusesabagina ari "operation y’agatangaza" kuko "yizanye ubwe".

Iki kinyamakuru cyakomeje gitangaza ko ubuyobozi bw’u Rwanda bwemeza ko Rusesabagina atari agiye i Burundi mu bikorwa byo gusenga cyangwa kubwiriza, ahubwo ko yashakaga guhura n’abantu bari mu mitwe igamije guhungabanya umutekano w’u Rwanda, baciwe intege n’ibitero bamaze iminsi bagabwaho n’Ingabo za RDC, guhera mu mwaka ushize wa 2019.

Benshi muri abo barwanyi barishwe, abandi bafatwa mpiri bashyikirizwa u Rwanda, mu gihe hari n’abakwiriye imishwaro hirya no hino.

Perezida Kagame yari aherutse gutangaza ko Rusesabagina ari we wizanye mu Rwanda ku bushake, ndetse ko bisa n’umuntu wibeshye nimero ahamagaye.

Ati "Ushobora kwizana ubishaka uzi n’icyo ukora icyo ari cyo, ushobora [no] kwizana wabeshywe ukisanga hano [...] Ariko uwanabwira abantu ko ari we wizanye, ubwo urubanza rwaba ruri hehe? Rwaba ruri kuri nde?"

Yakomeje agira ati "Byabaye nko guhamagara nimero ya telefone ukaza gusanga wibeshye nimero wahamagaye. Kandi inzego zabigizemo uruhare zambwiye ko nta nenge yabayemo."

Rusesabagina aherutse kugera imbere y’urukiko, amenyeshwa ibyaha 13 akekwaho ndetse Urukiko rw’Ibanze rwa Kicukiro rwanzuye ko afungwa muri gereza iminsi 30 y’agateganyo mu gihe iperereza rigikomeje, umwanzuro yahise ajuririra.

Bivugwa ko Paul Rusesabagina yari afite gahunda yo guhura na Perezda w'u Burundi, Evariste Ndayishimiye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .