Hasobanuwe amabwiriza akaze azagenga ihingwa ry’ibimera by’ubuvuzi mu Rwanda birimo urumogi

Yanditswe na Ferdinand Maniraguha
Kuya 14 Ukwakira 2020 saa 11:34
Yasuwe :
0 0

Inama y’Abaminisitiri ku wa Mbere tariki 12 Ukwakira 2020, yemeje amabwiriza yerekeye ihingwa, itunganywa n’iyohereza mu mahanga ry’ibimera byifashishwa mu buvuzi, birimo n’urumogi.

Mu mategeko y’u Rwanda urumogi rufatwa nk’ikiyobyabwenge ndetse abarufatanywe baba barukoresha cyangwa baruhinze, barabihanirwa cyane.

Mu kiganiro RBA yagiranye n’Umuyobozi Mukuru w’Urwego rw’Iterambere, RDB, Clare Akamanzi, yagaragaje ko icyatumye u Rwanda rwinjira muri ubu buhinzi, ari ugutanga umusanzu warwo mu bushakashatsi ku miti ndetse no gukomeza gushaka icyateza imbere ubukungu bw’igihugu.

Ati “Bimwe muri ibi bimera byifashishwa mu gukora imiti yahangana n’indwara nk’isereri, isesemi, abarwaye kanseri, ababana n’ubwandu bwa SIDA n’ibindi. Ni ibintu kandi byakwinjiriza igihugu bigatanga imirimo. U Rwanda rero ntabwo rwifuza gucikanwa muri uru rwego, atari ugushakamo amafaranga gusa ahubwo bigamije no guteza imbere ubuvuzi.”

Hari ibihugu bimwe na bimwe ku Isi byamaze kwemeza no gushyiraho amabwiriza akaze yo guhinga no gutunganya urumogi mu bijyanye n’ubuvuzi.

Nko ku mugabane wa Afurika, ibihugu nka Malawi, Afurika y’Epfo, Zimbabwe, Zambia, Lesotho byamaze gushyiraho amabwiriza agenga ihingwa ry’icyo kimera kigamije koherezwa hanze mu bushakashatsi ku buvuzi.

Clare Akamanzi yavuze ko no mu Rwanda hazaba hari amabwiriza akomeye haba mu buryo bw’amategeko n’umutekano w’aho ibyo bimera bizaba bihinze.

Ati “Ubushakashatsi ku miti bugira amabwiriza abugenga, bigomba gukorwa n’abantu babiherewe uburenganzira. Ntabwo dushaka ko bizakoreshwa mu buryo butari bwo, turashaka ko bikoreshwa mu bushakashatsi ku buvuzi gusa.”

Yakomeje agira ati “Ntabwo tuzagenzura gusa uburyo umurama winjizwa mu gihugu, tuzanagenzura uburyo bihingwa, gusarura, uburyo hagenzurwa ireme ry’umusaruro, uko ubikwa, kubika ibisagazwa, ibyo byose bizaba bifite uburyo bigenzurwa.”

Yavuze ko hari abashoramari batangiye kugaragaza inyota yo gukora ubu buhinzi mu Rwanda, igisigaye ari ukumvikana nabo no gusuzuma niba bujuje ibyangombwa bagahabwa impushya.

Nubwo yirinze kuvuga aho ubu buhinzi buzakorerwa, Clare Akamanzi, yavuze ko bizakorerwa ahantu hihariye, harinzwe ku buryo bukomeye ku buryo bitazashoboka ko urumogi rugera mu baturage.

Ati “Niba ubonye uruhushya rwo guhinga ibi bimera mu Rwanda, ugomba kugaragaza uburyo bw’umutekano butajegajega buzabanza kwemezwa n’inzego zacu zishinzwe umutekano. Hazakorwa ku buryo bidashobora kuva mu murimo ngo bisakare mu baturage. Ibimera bizaba biri ahantu hihariye, hazaba hari ingamba zidasanzwe haba ibyuma bifata amashusho (CCTV Cameras), iminara, amatara yo ku muhanda. Umutekano uzaba urinzwe cyane kugira ngo turwanye ko ibi bimera byajya hanze y’aho bihinzwe.”

RDB niyo ishinzwe kuganira no kureshya abashoramari muri uru rwego nk’uko bisanzwe ku zindi nzego, mu gihe Ikigo gishinzwe Imiti n’Ibiribwa (FDA) ari cyo kizaba gishinzwe gutanga impushya zo guhinga, kwinjiza ingemwe n’imirama ndetse no kohereza hanze umusaruro.

Akamanzi yavuze ko mu rwego rw’ubukungu, u Rwanda ruzungukira muri ubu buhinzi cyane haba mu misoro ndetse no gutanga imirimo.

Yagize ati “Bimwe muri ibi bimera, ushobora kubona miliyoni icumi z’amadolari kuri hegitari imwe, ni urugero. Ufashe ibyo ukabigereranya wenda n’indabo, iyo uzihinze kuri hegitari imwe uba wizeye nibura ibihumbi 300 by’amadokari, ni itandukaniro rinini cyane.”

Isoko rya mbere ry’u Rwanda kuri ibi bimera ririmo Leta Zunze Ubumwe za Amerika, Umuryango w’Ubumwe bw’u Burayi na Canada.

Akamanzi yavuze ko impamvu hagiyeho amabwiriza agena ihingwa ry’ibyo bimera kugira ngo byoherezwe ku isoko ryo hanze, ari uko mu Rwanda hataraboneka ubushobozi mu bushakashatsi ku miti n’inganda zikora imiti zifashisha ibyo bimera. Ngo umunsi u Rwanda ruzaba rwateye imbere mu nganda zikora imiti n’ubushakashatsi, amategeko yazahinduka.

Raporo ya Banki yo mu Bwongereza yo mu 2018, igaragaza ko isoko ry’urumogi ku Isi ribarirwa miliyari 150 z’amadolari kandi ko agaciro k’iryo soko gashobora kugera kuri miliyari 272 mu 2028.

Hagiye gushyirwaho amabwiriza akaze azajya akurikizwa mu ihingwa ry'ibimera byifashishwa mu buvuzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .