Hatangiye igerageza ku by’ibyiciro bishya by’ubudehe, abaturage basaba ko icya B kivugururwa

Yanditswe na Hakizimana Jean Paul
Kuya 18 Ukwakira 2020 saa 07:49
Yasuwe :
0 0

Ikigo gishinzwe guteza imbere ibikorwa by’iterambere mu nzego z’ibanze (LODA) gifatanyije n’abakozi b’uturere, cyakoze igerageza ku gushyira abaturage mu byiciro bishya by’ubudehe, bamwe basaba ko icyiciro B gisubirwamo kuko kirimo ubusumbane bukabije.

Ni igikorwa cyabaye kuri uyu wa Gatandatu mu Karere ka Rwamagana mu Murenge wa Kigabiro, nyuma y’amahugurwa yahawe abayobozi b’ishami ry’imibereho myiza mu turere, abashinzwe amakuru, abashinzwe ibarurishamibare, abashinzwe igenamigambi n’abahagarariye urubyiruko rw’abakorerabushake muri buri Karere, ku buryo bazifashisha mu gufasha abaturage kujya mu byiciro by’Ubudehe bibakwiriye.

Nyuma yo gusobanurira abaturage ibyiciro bishya by’ubudehe bigiye gukoreshwa bisimbura ibyaherukaga gushyirwaho mu mwaka wa 2015, hakurikiyeho igerageza, aho bafataga umuturage bakamubaza ibibazo by’ibanze ku mibereho ye n’umuryango we, abandi baturage bagafatanya n’abakozi babishinzwe kumugenera icyiciro muri bitanu byashizweho; A, B, C, D na E.

Umuyobozi w’ishami rya porogaramu zo kurengera abatishoboye muri LODA, Gatsinzi Justine, yavuze ko mu byiciro byari bisanzwe, nk’icya mbere n’icya kabiri hari ababibonaga nk’imbehe y’ubufasha bwa leta, ariko ubu ngo no kurihirwa muri kaminuza ntibizongera kugendera ku cyiciro cy’ubudehe.

Ati “Muri wa mukoro ngiro twaje gusuzuma rero twasanze ibi byiciro babisobanukiwe, basobanukiwe ibibaranga, basobanukiwe ko amakuru ariyo ashyira umuntu mu cyiciro bakanabyiyemereza ku rwego rw’umudugudu.”

Gatsinzi yakomeje avuga ko bishimiye uburyo abaturage bunganirana mu kumenya icyiciro gikwiriye umuturage runaka, bitewe n’ibyo atunze n’imibereho ye.

Abaturage ntibavuga rumwe ku cyiciro B

Ibyiciro by’ubudehe uko ari bitanu byose byasobanuriwe abaturage n’ukwiriye kubijyamo uko aba ameze, icyiciro cya B abaturage ntibakivuzeho rumwe bitewe n’intera iri hagati y’abakirimo.

Iki cyiciro kibarizwamo abaturage binjiza guhera ku bihumbi 65 kugeza ku muntu winjiza ibihumbi 600 Frw cyangwa ku muturage utunze hegitari imwe kugeza kuri hegitari icumi z’ubutaka.

Mutesi Valentine ufite imyaka 35 utuye mu Mudugudu wa Gahonogo Akagari ka Nyagasenyi mu Murenge wa Kigabiro, yavuze ko iki cyiciro harimo abantu bazakigiriramo ingorane.

Ati “Niba barafashe umuntu uhembwa ibihumbi 65 bakamugereranya n’uwuhembwa ibihumbi 600 Frw, ni ukuvuga ngo abantu bahembwa ayo mafaranga ibyo bakenera ntibyangana, bakosoye iki cyiciro byaba byiza rwose, naho ubundi uburyo bashyizeho bwo gutoranya umuturage uzajya muri buri cyiciro bwo ni bwiza cyane.”

Gatsinzi yavuze ko abantu bakirimo bari mu ntera imwe, ariko ngo si ngombwa ko baringanira.

Ati “Hari ikintu rusange bahuriyeho, si ngombwa ko bangana bose, babona iby’ibanze mu buzima.”

Umuyobozi w’Umudugudu wa Gahonogo, Nsabimana John, yavuze ko yiteguye ko muri ibi byiciro bishya nta marangamutima azazamo nko mu byiciro bya mbere.

Yavuze ko aho bitandukaniye n’ibyiciro by’ubudehe bya mbere, rimwe umuntu wasangaga bamushyize mu cyiciro adakwiriye kubera amarangamutima y’umuntu wabikoze, ariko ubu ngo bizakorerwa mu nteko hari abaturage bazi buri umwe.

Umunyamabanga Nshingwabikorwa wa Transparency International Rwanda, Mupinganyi Appolinaire yavuze ko akurikije ibitekerezo bakuye mu baturage umwaka ushize, ngo ibiri kugenderwaho muri uyu mwaka nibyo abaturage bifuza.

Aya mahugurwa yahabwaga abakozi b’uturere yatangirwaga mu turere tune turimo Rwamagana, Karongi, Musanze na Huye. Biteganyijwe ko ibi byiciro by’ubudehe bizashyirwa mu bikorwa guhera muri 2021.

Hakozwe igerageza ku byiciro bishya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .