Hibajijwe byinshi ku mugabo wagaragaye yambaye umupira uriho ifoto ya Perezida Habyarimana

Yanditswe na Bukuru JC
Kuya 23 Nzeri 2020 saa 05:47
Yasuwe :
0 0

Kuva ku mugoroba wo kuri uyu wa Kabiri, ku mbuga nkoranyambaga hatangiye gukwirakwira ifoto y’umugabo wo mu Ntara y’Amajyepfo, wagaragaye yambaye umupira uriho ifoto ya Habyarimana Juvénal wayoboye u Rwanda, ibintu byatumye benshi bamwibazaho cyane.

Uyu mugabo bivugwa ko yitwa Ngarambe Magnifique, ni uwo mu Murenge wa Ntyazo mu Kagari ka Bugali. Afite imyaka 60 y’amavuko, yahoze mu Ngabo z’u Rwanda aho yasezerewe mu 1998. Kwambara uyu mupira ngo abikora agamije kwigisha abana amateka.

Ifoto ye yakwirakwiriye imwerekana yambaye umupira w’icyatsi uriho ifoto ya Habyarimana n’amabara y’ishyaka rye rya MRND; icyatsi, umuhondo n’umutuku.

Bene aya mabara n’imyambaro iriho ifoto ya Habyarimana yakoreshwaga nko mu gihe cy’amatora yo gutora umukandida rukumbi wa MRND aho byabaga bizwi neza ko ariwe ugomba gutsinda kuko ntawe babaga bahanganye cyangwa se no mu bindi bikorwa by’iri shyaka.

Ni umwambaro wambarwaga kandi mu bindi birori nko kwizihiza itariki yafatiyeho ubutegetsi izwi nk’iya 5 Nyakanga.

Kwambara uyu mwambaro ubwabyo nta kibazo kirimo ndetse nta n’icyaha mu mategeko y’u Rwanda, ariko icyibajijweho ni ukubona umuntu wambaye umwenda uriho Habyarimana bijyanye n’amateka y’igihugu.

Ikindi ni aho uyu mugabo yakuye uyu mwambaro, niba yarawukoresheje cyangwa se niba ari uwo yabitse mu myaka hafi 30. Bamwe ku mbuga nkoranyambaga wasangaga bibaza niba nta kindi cyaba cyihishe inyuma yo kuwambara.

Hari abavuze ko kuba hari uwakwambara umwenda uriho abayoboye u Rwanda abenshi nta kibazo babigiraho ariko kuri Habyarimana nk’umuntu wari ishyiga ry’inyuma mu mugambi wa Jenoside yakorewe Abatutsi we bishobora kugira ikindi gisobanuro.

Amateka y’u Rwanda agaragaza Habyarimana nk’ikimenyetso cya Jenoside yakorewe Abatutsi kuko mu gihe yari Perezida wa Repubulika, Abatutsi barameneshejwe, ndetse umugambi wo kubatsemba ushyirwamo ingufu ku buryo wageze ku ndunduro mu 1994 mu gihe hari hashize imyaka myinshi bicwa urusorongo.

Mu byumweru bike mbere y’uko Jenoside yakorewe Abatutsi itangira, Habyarimana n’abakuru b’ingabo bakoreshaga imvugo yeruye ko bazarimbura Abatutsi, kandi ko batari biteguye gushyira mu bikorwa amasezerano y’amahoro y’Arusha.

Abari bahagarariye ibihugu byabo mu Rwanda bagerageje kumvisha Habyarimana ko agomba kubahiriza ayo masezerano, nyamara we abereka ko nta gaciro afite, kandi ko yiteguye gukora Jenoside.

Umwe mu babonye iyi foto yagize ati “Kuvuga ngo uwo muntu wakoze ibyo bikorwa ni umuntu mwiza wo kwambarwa, akagaragara yambawe n’umuturage ku mupira, biteye kwibaza byinshi uyu munsi. Wakwibaza niba nta wundi mugambi ubiri inyuma.”

Hari n’abandi bahuje kuba uyu mugabo nk’umuntu wabayeho mu gihe Habyarimana yari ayoboye u Rwanda, ashobora kuba yaramwiyumvagamo ku buryo n’uyu munsi amufata “nk’umubyeyi” ku buryo yakwishimira kwambara umwenda ariho.

Uyu mugabo yibajijweho na benshi nyuma yo kugaragara yambaye umwenda uriho ifoto ya Habyarimana
Kuri we ngo kwambara uyu mwenda aba agamije kwigisha amateka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .