IBUKA yishimiye ko Rwamucyo agiye gusubizwa imbere y’ubutabera

Yanditswe na Uwimana Abraham
Kuya 17 Ukwakira 2020 saa 10:36
Yasuwe :
0 0

Umuryango Uharanira Inyungu z’Abacitse ku Icumu rya Jenoside yakorewe Abatutsi, IBUKA, wishimiye ko abacamanza bo mu Bufaransa bategetse ko Dr. Rwamucyo Eugène yongera kugezwa mu rukiko rw’u Bufaransa akaburanishwa ku byaha bya Jenoside aho ubona ko hari icyizere ko ubutabera buzatangwa noneho.

Perezida wa IBUKA, Prof. Dusingizemungu Jean Pierre, kuri ubu wagizwe Umusenateri, yabwiye The NewTimes ko noneho u Bufaransa bwateye intambwe mu nzira ya nyayo.

Ati “Ibi ni byiza, babitekerejeho neza (ubutabera bw’u Bufaransa), gusa bakwiye gukomereza aho kuko urugendo ruri imbere rukiri rurerure. Iyi ntambwe ikwiye no guha ubutumwa abandi bakoze Jenoside bakidegembya.”

Yongeyeho ati “Icyaha cya Jenoside ntigisaza. Ibindi bihugu bitandukanye na byo bikwiye kwiyambura isura itari nziza yo kutageza abakekwaho uruhare muri Jenoside imbere y’ubutabera, ibyo birareba n’ibihugu byo muri Afurika, bikwiye kwihuta kurushaho.”

Umuryango wo mu Bufaransa ugamije gushakira ubutabera abarokotse Jenoside yakorewe Abatutsi, Collectif des Parties Civiles pour le Rwanda (CPCR), kuva mu myaka 20 ishize wagiye usaba itabwa muri yombi ry’abakekwaho uruhare muri Jenoside barimo na Rwamucyo basabye ko afatwa kuva mu 2007.

Umuyobozi wa CPCR, Alain Gauthier, yavuze ko amakuru y’uru rubanza ari ikintu cyo kwishimira cyane, yongeraho ko banishimira kuba bane mu bo basabiye ko bafatwa bari hafi gushyikirizwa ubatabera.

Muri abo harimo Muhayimana Claude urubanze rwe ruteganijwe muri Gashyantare umwaka utaha, Bucyibaruta Laurent na Munyemana Sosthène, nabo bategereje umwanzuro ku bujurire batanze, ndetse na Rwamucyo.

Gauthier yagize ati “N’ubwo hari ukugenda biguru ntege mu gutanga ubutabera duhora dusaba, ibi byemezo bigaragaza ko intego yacu y’uko abakekwaho uruhare muri Jenoside yakorewe Abatutsi bose bibwira ko bakwibagiranira mu Bufaransa, bizarangira bagejejwe imbere y’ubutabera bose.”

Rwamucyo Eugène w’imyaka 61, yavukiye mu yahoze ari Komini Gatonde mu Ruhengeri, yari umuyobozi w’Ikigo cya Kaminuza y’u Rwanda cyitwaga Centre Universitaire de Santé Publique de Butare (CUSP), ashinjwa kuba yari ku isonga mu bateguye Jenoside mu Mujyi wa Butare.

Ku wa 02 Nzeri 2009, Urukiko Gacaca rwa Ngoma rwamukatiye igihano cy’igifungo cya burundu rumaze kumuhamya ibyaha byo gushinga imitwe y’abicanyi yashishikarizaga ikorwa rya Jenoside, gutanga ibikoresho by’ubwicanyi, gufata bugwate abagore n’abakobwa b’abatutsikazi, kubara no kumenya abishwe.

Rwamucyo ageze mu Bufaransa yahawe akazi mu bitaro bya Kaminuza bya Lille nyuma akorera ibitaro bya Maubeuge, ahagarikwa mu Ukwakira 2009, ibyo bitaro bimaze kumenya ko ashakishwa kubera uruhare rwe muri Jenoside yakorewe Abatutsi.

Ku wa 26 Gicurasi 2010 yafashwe na Polisi Mpuzamahanga hashingiwe ku mpapuro zo kumuta muri yombi zatanzwe n’Ubushinjacyaha Bukuru bw’u Rwanda, afatirwa mu irimbi rya Sannois aho yari mu ishyingurwa rya Jean Bosco Barayagwiza waguye muri gereza y’Umuryango w’Abibumbye muri Benin.

Rwamucyo yafunzwe amezi ane gusa, arekurwa ku wa 15 Nzeri 2010, Urukiko rw’Ubujurire rwa Versailles mu Bufaransa rwanga kumwohereza mu Rwanda, ariko rwemeza ko agomba gukurikiranwa mu Bufaransa adafunzwe.

Dr. Rwamucyo Eugène akekwaho kugira uruhare muri Jenoside yakorewe Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .