Ibyo wamenya ku rwego rugiye kujya rutahura iyezandonke no gutera inkunga iterabwoba mu Rwanda

Yanditswe na IGIHE
Kuya 18 Ukwakira 2020 saa 01:00
Yasuwe :
0 0

U Rwanda ruheruka gushyiraho Urwego rushinzwe Ubutasi ku Mari (Financial Intelligence Centre, FIC), ruhabwa intego nyamukuru zo gukora ubutasi ku mari hagamijwe kurwanya iyezandonke, gutera inkunga iterabwoba no gutera inkunga ikwirakwiza ry’intwaro za kirimbuzi kimwe n’ibyaha bifitanye isano na byo.

Mu bisobanuro by’icyaha cy’iyezandonke harimo nk’igihe habayeho guhisha, kutagaragaza imiterere nyayo, inkomoko, ahabarizwa umutungo, kuwimura, kwikuraho umutungo, kuwutanga, guhisha nyiri umutungo nyawe cyangwa uwufiteho uburenganzira, nyiri ukubikora azi cyangwa ashobora kumenya ko ari indonke ituruka ku cyaha cyangwa uturuka ku kugira uruhare mu ikorwa ryacyo.

Uru rwego rushyizweho n’Itegeko n° 74/2019 ryo ku wa 29/01/2020, ubu ibikorwa biracyari mu kubaka ibisabwa bikenewe ngo uru rwego ruzabashe gukora neza, aho ruzaba rurebererwa na Minisiteri y’Imari n’Igenamigambi.

Mu gihe uru rugendo rugikomeza, ni ngombwa gusubiza amaso inyuma ku musanzu rwitezeho bijyanye n’inshingano zarwo ziteganywa n’itegeko.

Muri izo nshingano barimo gukora isesengura rihanitse ku makuru y’ibikorwa ku ihererekanya ry’imari bikemangwa, yakiriwe no gushyikiriza ibyavuyemo inzego zibishinzwe.

Uru rwego kandi nirwo ruzaba rushinzwe guhuza ibikorwa by’ikumira bikorwa n’inzego zose bijyanye n’ishyirwa mu bikorwa ry’itegeko ryerekeye ikumira n’ihana ry’iyezandonke, gutera inkunga iterabwoba no gutera inkunga ikwirakwiza ry’intwaro za kirimbuzi.

Ibyo byose bikajyana no kugira inama Guverinoma ku birebana na politiki n’ingamba bigamije kurwanya ibyo byaha.

Mu nshingano zarwo kandi harimo gukora isesengura ry’ingaruka ku rwego rw’igihugu ziterwa n’iyezandonke, gutera inkunga iterabwoba no gutera inkunga ikwirakwiza ry’intwaro za kirimbuzi.

Itegeko rikomeza rigaragaza ko rushinzwe “Gukora ubushakashatsi ku mihindagurikire, tekiniki n’ubwiyongere mu byerekeye iyezandonke, gutera inkunga iterabwoba no gutera inkunga ikwirakwiza ry’intwaro za kirimbuzi.”

Ni urwego kandi ruzaba rushinzwe kugira uruhare mu bikorwa bihuza inzego zitandukanye, bigamije gukemura ibibazo biterwa n’ibyaha bimunga ubukungu n’imari ku rwego rw’igihugu urw’akarere no ku rwego mpuzamahanga.

Mu nshingano z’uru rwego biteganywa ko ari narwo ruzaba rushinzwe
gushyiraho amabwiriza ashyira mu bikorwa ibyemezo by’Akanama k’Umuryango w’Abibumbye gashinzwe Amahoro ku Isi, ku bijyanye n’ibihano mu by’imari birebana n’iterabwoba n’imitungo itera inkunga iterabwoba n’iy’abandi bantu.

Ni narwo rushyiraho amabwiriza ashyira mu bikorwa ibyemezo by’ako kanama ku bijyanye n’ibihano mu by’imari birebana n’ikwirakwiza ry’intwaro za kirimbuzi no kuritera inkunga.

Rwahawe ububasha bwo kugera ku makuru akomeye

Nubwo uru rwego rutaratangira imirimo, rwahawe ububasha bukomeye, kuko rwemerewe kugenzura ibikorwa by’ihererekanya ry’imari byagaragajwe ko bikemangwa no kugera ku makuru y’imari, y’ubutegetsi n’ay’inzego zishinzwe iyubahirizwa ry’amategeko.

Muri ubwo bubasha harimo no kugera ku makuru koranabuhanga n’andi ari muri za seriveri z’abashinzwe gutanga amakuru cyangwa izindi nzego hagamijwe gukora ubutasi ku mari.

Mu bundi bubasha bwahawe uru rwego harimo “guhagarika no gufatira umutungo ukemangwa; gutegeka ufite inyandiko mpamo n’inyandiko bwite ku bikorwa by’ihererekanya ry’imari kuziyishyikiriza no gutegeka inzego zibishinzwe gutanga amakuru ajyanye n’imitungo y’abantu ku giti cyabo cyangwa iy’ibigo bifite ubuzima gatozi bikekwaho icyaha cy’iyezandonke, gutera inkunga iterabwoba no gutera inkunga ikwirakwiza ry’intwaro za kirimbuzi, mu rwego rwo gukora ubutasi ku mari.”

Uru rwego kandi ni narwo rwahawe ububasha bwo gutanga cyangwa guhererekanya amakuru n’urwego rushinzwe ubutasi ku mari rwo mu kindi gihugu n’izindi nzego zo mu mahanga zifite ububasha bwo kubona amakuru ikeneye, iyo basangiye inshingano z’ibanga ry’akazi.

Runafite ububasha bwo gutegeka abashinzwe gutanga amakuru kuzana andi y’inyongera afasha gusesengura iyo amakuru ahura n’amakuru yakiriwe no gushyiraho amabwiriza agena amakosa yo mu rwego rw’ubutegetsi n’ibihano bijyanye na yo ku bashinzwe gutanga amakuru bagenzurwa na yo.

U Rwanda rwazamuye ibihano ku batera inkunga iterabwoba

Itegeko ry’u Rwanda ku wa 29/01/2020 rikumira kandi rihana iyezandonke, gutera inkunga iterabwoba no gutera inkunga ikwirakwiza ry’intwaro za kirimbuzi.

Riteganya ko umuntu wese cyangwa icyitso cye ukoze ibikorwa by’iyezandonke aba akoze icyaha. Iyo abihamijwe n’urukiko, ahanishwa igifungo kitari munsi y’imyaka irindwi ariko kitarenze imyaka icumi, n’ihazabu y’amafaranga y’u Rwanda yikubye inshuro kuva kuri eshatu kugeza kuri eshanu z’agaciro k’amafaranga y’iyezandonke.

Ni mu gihe ibihano biheruka gukazwa ku batera inkunga iterabwoba, mbere bahanishwaga igifungo kitari munsi y’imyaka irindwi ariko kitarenze imyaka icumi n’ihazabu y’amafaranga y’u Rwanda yikubye inshuro kuva kuri eshatu kugeza kuri eshanu z’umubare w’amafaranga y’inkunga ye, nk’uko byateganywaga n’itegeko ryo mu 2018.

Muri iri tegeko rishya umuntu ukora ibikorwa byo gutera inkunga iterabwoba, iyo abihamijwe n’urukiko, ahanishwa igifungo kitari munsi y’imyaka 20 ariko kitarenze imyaka 25 n’ihazabu y’amafaranga y’u Rwanda yikubye inshuro kuva kuri eshatu kugeza kuri eshanu z’umubare w’amafaranga y’inkunga ye.

Ni mu gihe umuntu ukora ibikorwa byo gutera inkunga ikwirakwiza ry’intwaro za kirimbuzi, iyo abihamijwe n’urukiko, ahanishwa igifungo kitari munsi y’imyaka 15 ariko kitarenze imyaka 20 n’ihazabu y’amafaranga y’u Rwanda yikubye inshuro kuva kuri eshanu kugeza ku icumi 10 z’amafaranga yatanze.

Ibyaha by'iyezandonke bikomeje guhabwa umwihariko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .