Iherezo ry’urubanza rwa Kansiime wari Gitifu wa Gakenke n’umugore we washinjwaga ubusambanyi

Yanditswe na Mutangana Gaspard
Kuya 23 Nzeri 2020 saa 05:43
Yasuwe :
0 0

Mu mpera za Kanama 2015 nibwo byatangajwe ko Polisi y’Igihugu yataye muri yombi Kansiime James wari Umunyamabanga Nshingwabikorwa w’Akarere ka Gakenke, waregwaga kwandagaza umugore we Bamurange Grace, ubwo yafatwaga akekwaho icyaha cy’ubusambanyi.

Ubwo bafatwaga, umwe mu bagize umuryango wa Bamurange yabwiye IGIHE ko umugabo we yamukubitaga kugeza ubwo basabye gatanya, bategereje icyemezo cy’inkiko. Ngo byageze aho akodesha inzu i Remera ariko iza kwimurirwamo nyina, we asubira kubana n’umugabo.

Ikibazo kijya gufata indi ntera, umunsi umwe ngo Bamurange yari avuye ku kazi abaza umukozi w’aho yari yarakodesheje niba yatetse, "maze ajya kuharuhukira."

Muri icyo gihe ngo hari umugabo bakoranaga wari uvuye muri Uganda amuzaniye ibintu byari biturutse kwa murumuna we i Kampala, abimuzanira aho.

Muri ako kanya amakuru yageze kwa Kansiime ko ari kumwe n’undi mugabo, yitabaza abapolisi bajya kubafata babashinja ubusambanyi ndetse hari ifoto yakwirakwijwe ku mbuga nkoranyambaga ko babafatiye mu buriri.

Iyo foto yaje kuvamo ibirego byo kwandagaza umugore, mu gihe n’abapolisi bari kumwe byaje gutangazwa ko bakurikiranwe mu buryo bw’akazi. Kansiime n’umugore we baje kurekurwa bakurikiranwa bari hanze, ikirego cyo guharabika umugore nticyaregerwa urukiko, hakomeza icy’ubusambanyi bwaregwaga Bamurange.

Urukiko rwaje gufata icyemezo

Ubushinjacyaha bwashyikirije ikirego Urukiko rw’Ibanze rwa Nyarugunga, Bamurange Grace ashinjwa icyaha cy’ubusambanyi we na Mupenzi Philippe bafatanywe, baburana bahakana icyaha.

Nk’uko bigaragara mu nyandiko y’uru rubanza rwasomewe mu ruhame ku wa 22 Kamena 2016, Ubushinjacyaha bwavugaga ko kuba Bamurange n’undi mugabo barafatiwe mu nzu yakodesheje, bikingiranye, bituma akekwaho icyaha cy’ubusambanyi.

Mu bimenyetso Ubushinjacyaha bwabonye ngo harimo inyandiko zigaragaza urukundo hagati ya Bamurange n’uwo mugabo bari kumwe, Bamurange agasobanura ko adakunda Kansiime; ahubwo bari bari kumwe kubera abana babyaranye.

Byongeye, hifashishijwe raporo y’inzobere mu bya DNA muri Kaminuza ya Hambourg mu Budage, zapimye igitambaro bihanaguza cyasanganywe Bamurange n’umugabo bari kumwe.

Ni n’aho yahereye asaba urukiko gutesha agaciro ibimenyetso bishingiye kuri icyo gitambaro.

Urukiko rwahamije Bamurange icyaha

Urukiko rumaze gusesengura ubwiregure bw’impande zombi, rwahamije Bamurange icyaha cy’ubusambanyi rumuhanisha igifungo cy’amezi atandatu gisubitse mu gihe cy’umwaka umwe, ku nyungu z’abana bato yagombaga gusigarana; bitewe n’uko Kansiime yakoreraga mu Ntara y’Amajyaruguru, akagaruka i Kigali mu mpera z’icyumweru.

Uru rukiko kandi rwahanishije uwo mugabo igifungo cy’amezi atandatu, runamutegeka guha Kansiime amafaranga angana na 2 023 500 Frw.

Nyuma y’isomwa ry’urubanza, Bamurange, Mupenzi, Kansiime n’Ubushinjacyaha bajuririye icyemezo cy’uru rukiko, Ubushinjacyaha buvuga ko butishimiye ibihano byahawe Bamurange na Mupenzi, nabo bajurira ko bahamijwe icyaha batakoze, naho Kansiime ajurira agaragaza ko indishyi yahawe ari nkeya.

Ubu bujurire bwose bwaje gusuzumwa n’Urukiko Rwisumbuye rwa Nyarugenge, ruza kwemeza ko nta shingiro bufite, bityo urubanza rwaciwe n’Urukiko rw’Ibanze rwa Nyarugunga ku wa 22 Kamena 2016, rugumana agaciro mu ngingo zarwo zose.

Kansiime James yahoze ari Gitifu w'Akarere ka Gakenke mu Ntara y'Amajyaruguru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .