Ingengabihe y’amashuri y’incuke n’igice kimwe cy’abanza izajya hanze mu 2021

Yanditswe na N.Kubwimana Janvière
Kuya 15 Ukwakira 2020 saa 11:09
Yasuwe :
0 0

Umunyamabanga wa leta muri Minisiteri y’Uburezi ushinzwe amashuri abanza n’ayisumbuye, Twagirayezu Gaspard yatangaje ko ingengabihe y’amashuri y’incuke n’iy’amashuri abanza kuva mu mwaka wa mbere kugeza mu wa gatatu, izashyirwa ahagaragara mu mezi ya mbere ya 2021.

Tariki 13 Ukwakira nibwo Minisiteri y’Uburezi yatangaje ingengabihe y’isubukurwa ry’amasomo mu mashuri abanza n’ayisumbuye.

Nubwo amashuri abanza yakomorewe, hari icyiciro cyayo kitagaragaye ku ngengabihe, ni ukuvuga abiga mu mwaka wa mbere kugeza mu wa gatatu, ndetse n’abiga mu mashuri y’incuke.

Ubwo yari mu ruzinduko yagiriye mu Karere ka Musanze ku wa 14 Ukwakira, Twagirayezu Gaspard yabwiye IGIHE ko ingengabihe yerekana uko amashuri y’incuke n’abanza asigaye azatangira, izajya hanze mu 2021.

Yagize ati "Abangaba bo mu mashuri y’incuke n’abanza kuva mu wa mbere kugeza mu wa gatatu, ntabwo twabyita ko basigaye, ahubwo gahunda ihari nk’uko twabisobanuye, amashuri arimo gutangira mu byiciro. Impamvu ya mbere turacyakurikirana uko iki cyorezo gihagaze n’uko amabwiriza yo kukirinda agenda yubahirizwa mu mashuri, tunareba uko gahunda yacu ikorana n’izi mpinduka."

"Hanyuma rero aba bana batoya cyane burya ni nabo benshi tugira muri gahunda yacu tugendeye ku mibare ihari, mu gufungura amashuri byari ingenzi gushakirwa umwanya wabo wihariye, tuzabashakira ikindi gihe cyo gutangira ariko mu mwaka utaha wa 2021 nibwo tuzatangaza ingengabihe yabo, bikorwe mu mezi ya mbere, kuko aba bana bisaba imbaraga mu kubigisha, ariyo mpamvu bisaba kubanza kubaka neza umusingi wabyo."

Abanyeshuri bazahera ku gusubiramo amasomo

Twagirayezu kandi yakomeje avuga ko mu itangira ry’amashuri hazashyirwa imbaraga mu gufasha abana batagize amahirwe yo gukurikirana amasomo muri gahunda zabashyiriweho mu bihe bari mu rugo, ariyo mpamvu bashyizeho ukwezi ko gusubiramo ibyo bize mu gihembwe cya mbere.

Aha yanavuze ko hashyizweho n’uburyo bwihariye bwo kwita cyane kubo bizagaragara ko basigaye inyuma, kugira ngo babashe kujyana n’abandi.

Ku bijyanye no kubahiriza intera yagenwe mu mashuri ndetse n’aho abanyeshuri bazajya barara, asobanura ko nubwo bitoroshye, bazakomeza gukorana n’abayobozi b’ibigo mu gukurikirana iyubahirizwa ry’iyi ntera n’andi mabwiriza yashyizweho mu kwirinda Covid-19.

Yagize ati " Ikintu cy’intera yagenwe, mu mashuri ntabwo navuga ko cyoroshye kuko kugena uko bicara biterwa n’uko ishuri ryubatse, aha dusaba abayobozi kubyitaho ariko byose bizaterwa n’umubare w’ibyumba, gusa kuko ubu abanyeshuri batazatangirira rimwe bizaba byoroshye, ariko nibigera muri Mutarama bazagerageza kujya mu byumba byose kuko bizaba byaruzuye, gusa ibi byose bizaterwa n’umubare w’ibyumba bihari n’umubare w’abanyeshuri."

Itangazo rya Mineduc ryo ku wa 13 Ukwakira rigaragaza ko amashuri yisumbuye n’abanza azatangira ku wa 2 Ugushyingo 2020.

Ku ikubitiro hazaherwa ku banyeshuri bo mu mashuri abanza biga mu mwaka wa Gatanu n’uwa Gatandatu. Kuri iyi tariki kandi n’abo mu yisumbuye biga mu mwaka wa Gatatu, uwa Gatanu n’uwa Gatandatu bazatangira.

Binateganyijwe ko hazanatangira abanyeshuri bo mu mashuri y’Ubumenyi ngiro bari mu mwaka wa Gatatu n’uwa Gatanu ndetse n’abo mu y’Inderabarezi bo mu mwaka wa Mbere n’uwa Gatatu.

Ikindi cyiciro ni icy’abanyeshuri bazatangira igihembwe cya kabiri ku wa 23 Ugushyingo. Muri iki cyiciro harimo abiga mu mwaka wa kane w’amashuri abanza, n’abo mu aisumbuye biga mu mwaka wa mbere, uwa Kabiri n’uwa Kane.

Ingengabihe y'itangira ry'amashuri y'incuke izajya hanze mu 2021

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .