Injira mu mushinga ugeze kure uhindura Nyandungu, ahantu nyaburanga hazatahwa mu mezi atandatu (Amafoto)

Yanditswe na Rabbi Malo Umucunguzi
Kuya 16 Ugushyingo 2020 saa 07:30
Yasuwe :
0 0

Inzego zinyuranye zikomeje gukora ubutaruhuka mu kunoza umushinga witezweho byinshi mu bijyanye no kurengera ibidukikije n’ubukerarugendo, aho abatuye Umujyi wa Kigali n’abawugenda bazunguka ahantu hashya ho gutemberera cyangwa gukorera siporo, hagezweho kandi hatanga amafu adasanzwe.

Uwo ni umushinga wo guhindura Igishanga cya Nyandungu gikora ku mirenge ya Ndera mu Karere ka Gasabo na Nyarugunga muri Kicukiro, Pariki y’Ubukerarugendo bubungabunga Ibidukikije, Eco-Tourism Park.

Umuyobozi Mukuru w’Ikigo Gishinzwe Kurengera Ibidukikije, REMA, Juliet Kabera, yabwiye IGIHE ko uyu mushinga uzaba urangiye ku wa 30 Gicurasi 2021. Uzuzura utwaye miliyari 4.5 Frw, zirimo gushorwa mu mirimo itandukanye irimo kuhakorwa.

Igishanga kimaze guhindura isura

Igishanga cya Nyandungu hagati kirimo umugezi, ubundi wari umeze nka ruhurura yanyuragamo amazi menshi arimo n’imyanda imanuka ku misozi ihakikije, ugatera imyuzure mu bice by’epfo bigana ku Mulindi.

Aya mateka amaze guhinduka, kuko hagenda hatunganywa hagashyirwamo uburyo bwo gufata amazi kandi akayungururwa.

Umuyobozi ukurikiranira hafi uyu mushinga wa Nyandungu, Jules Djangwani, yabwiye IGIHE ko ugeze kure, ndetse ko nta kabuza mu mwaka utaha uzaba urangiye.

Yakomeje ati “Ubu hari ibikorwa dukoraho twubaka ku mugezi, tuwuha imiterere ikwiye, noneho niba ayo mazi yagendaga nka ruhurura yatezaga imyuzure hepfo, ibyo byose bizaba bikemutse, ikindi ni uko harimo ibintu bifata amazi akagabanya umuvuduko ndetse agaca mu byatsi akayungururwa, noneho akabasha gukomeza ari amazi atagendana imbaraga nyinshi, yangiza cyangwa ananduye cyane.”

Ni umushinga wihariye mu kubungabunga ibidukikije n’ubukerarugendo

Djangwani yavuze ko ubwo uyu mushinga uzaba urangiye, uzafasha cyane mu bijyanye no kubungabunga igishanga kugira ngo kigarure ubuzima bwacyo, hakaba n’amahirwe adasanzwe ku bukerarugendo.

Yakomeje ati “Hakabamo n’ibyo by’ibiti bituma hariya hagaruka umwuka muzima kuko muziko turi munsi y’icyanya cyahariwe inganda, ku rundi ruhanda hari umuhanda uzamo imodoka nyunshi cyane, ibyo byose bizagira akamaro ko kugabanya iyo myuka, no gutanga umwuka mwiz ahariha.”

Muri iki gishanga harimo ubwoko bw’ibiti birenga 60 bya Kinyarwanda (indigenous trees) abantu bazajya bakoreraho ubushakashatsi cyangwa kubireba, hakaba n’ibiti by’imiti gakondo. Ni ibiti n’ibyatsi nk‘umugote, igikakarubamba, imiravumba, iminyinya, ikirogora, umubirizi, igicuncu, igitenetene, umukunde n’ibindi.

Yakomeje ati “Ni ukuvuga ngo ni ahantu hashobora gukorerwa ubushakashatsi yaba ibigo by’amashuri cyangwa ibindi.”

Hateguwe uburyo abantu bahatemberera bashobora kuganira, hakabamo utuyira twiza batemberamo, ku buryo abantu bazaba bashobora kuhasohokera bakifata neza.

Djangwani ati “Dufitemo restaurant, dufitemo n’utuyira twagiye twubakwa dufasha abagiye kuhatembera cyangwa abakora siporo zitandukanye, ni ukuvuga ngo ni ikindi kintu kizaba kirangiye gifasha yaba umujyi wa Kigali, ariko n’abandi bantu baba abakora ubushakashatsi, abakora siporo, abatembera, hazaba hari ibintu byinshi.”

Inzira muri iyi pariki zishobora gukoreshwa n’abanyamaguru n’abanyamagare, zifite uburebure bwa kilometero 10 na metero ebyiri. Zubatswe hifashishijwe amakoro, zikikijwe n’imigano yavanywe mu Bushinwa ndetse hagati yazo hazaterwa indabyo nziza.

Hazaba hari umwihariko w’ubukerarugendo bushingiye ku kureba inyoni, aho muri iki gishanga zihaboneka inyoni nyinshi cyane. Gishanga kandi gifite ibiyaga karemano biri ku buso bwa metero kare ziri hagati ya 4393 na 5892.

Ni umushinga wabanje kudindira

Umushinga wa Nyandungu byagiye bitangazwa kenshi ko muri iki gihe wakabaye ubyazwa umusaruro, airko ntabwo byakunze bitewe n’impamvu zitandukanye.

Jules Djangwani yavuze ko ibyagoranaga cyane ari nk’imisingi bagombaga kubaka mu butaka nk’igenewe imihanda, bikagorana kubera ko hari mu gishanga.

Ati “Ubundi imiterere y’igishanga uko imeze, nk’iyo imvura iguye amazi yose amanukira mu kibaya, ndetse ushobora no kugera ku munsi wa kangahe akiza. Twe rero bigasaba ngo dutegereza ngo humuke gatoya abantu babashe gukora nk’igihe twubakaga umusingi hasi mu butaka, noneho ugasanga iminsi itanu, ine, imvura iraguye nanone, bidutwara umwanya munini.”

“Ariko ubungubu dufite icyizere ko bizakunda kubera ko nta kazi kagikorerwa munsi, ibindi byose biri hejuru, niyo mpamvu twumva n’igihe gisigaye tutagifiteho ikibazo.”

Kugeza ubu imirimo itarakorwa n’ijyana wenda nk’ibiti byagenewe guterwa ku mihanda imaze kuzura, ariko ubu ikaba itararangira, ariko ahanini ibiti byamaze guterwa, ku buryo ikiri gukorwa ari ukubyitaho, hagira igipfa kigasimbuzwa.

Hanateganywa ingendo nyobokamana

Hagati ya tariki 7 na 9 Nzeri 1990, Papa Yohani Pawulo II yasuye u Rwanda, asomera misa mu bice bitandukanye birimo na Nyandungu, aho yahagaze ku wa 9 Nzeri 1990 habura amasaha make ngo asoze uruzinduko rwe.

Aho hantu hari n’ikimenyetso, ku buryo hafi yacyo hazashyirwa Ubusitani bwa Papa, cyangwa Pope’s Garden, ku buryo abantu bazajya bahakorera ingendo nyobokamana, cyane ko Kiliziya Gatolika iteganya kuhubaka Chapelle.

Djangwani yakomeje ati “Hari igice cyahagenewe ahazashyuirwa aho abantu bashobora kuza mu rwego rw’iyobokamana, byaba kuhasengera cyangwa kuhicara bijyanye n’imyemerere, harebana neza n’ahantu hari ikimenyetso hakurya y’umuhanda.”

“Batubwiye ko bateganya kuhubaka Chapelle, ariko noneho abakirisitu bakaba bashobora kuvahariya haruguru bagasura no hepfo, ahazaba hari ubusitani twita ‘Pope’s garden.”

Kugeza ubu hari inzu ebyiri zamaze kubakwa hafi y’umuhanda ku rwinjiriro, ari naho abantu bose bazajya bakura amakuru ajyanye n’ibirimo cyangwa serivisi bashobora kuhabona, hirya hakaba restaurant, abantu batembereye bashobora kuzajya bafata akantu bahatemberereye.

Iki gishanga kandi gikomeje gutunganywa ku bufatanye n’Urwego rushinzwe Iterambere mu Rwanda, RDB, ari narwo rufite ubukerarugendo mu nshingano.

Djangwani ati “Twatangiye no kuvugana nabo ku buryo bizajya kurangira hari umuntu uhita uhafata akahakoresha.”

Mu gihe cy’isuzuma riheruka umushinga wari ugeze kuri 35% ariko ubu iryo janisha ryamaze kurenga kuko hari imirimo myinshi yamaze kwiyongeraho, kandi hari icyizere ko umushinga uzarangira ku gihe.

Pariki ya Nyandungu kandi yagenewe parking ebyiri zingana na metero kare 2500 zishobora kwakira imodoka 100 icyarimwe. Biteganyijwe kandi ko umuriro wose uzakoreshwa uzaturuka ku mirasire y’izuba.

Hashyizwemo uburyo bwo gutunganya amazi, ku buryo aba asa neza
Hakozwe utuyira twubatswe n'amakoro
Ni ahantu hazatangira gukorerwa ubukerarugendo mu minsi iri imbere
Hazagenda hanashyirwaho ibiraro bica hejuru y'aya mazi
Ku gishushanyo mbonera hateganywaho ibiraro byambukiranya ibi biyaga bito
Izi nzira zamaze gutunganywa
Hari utuyira twubatswe, tuzajya dutuma abantu batembera iruhande rw'amazi
Hakozwe inzira ebyiri, iy'amagare n'iy'abanyamaguru
Hari aho inzira zitararangiza kubakwa, ariko umushinga ugeze kure
Hateguwe intebe abantu bashobora kwicaraho bakaganira
Izi ntebe zitegereje abatangira kuzibyaza umusaruro mu minsi mike
Ni inzira ziteye amabengeza
Ni inzira zibereye ubukerarugendo buzahafungurirwa mu minsi mike iri imbere
Izi nzira zikikijwe n'imigano yavanywe mu Bushinwa
Iki gishanga kirimo no kubakwamo imihanda ihuza ibice bigikikije
Ibisiga n'inyoni byabonye intaho nshya mu gishanga cya Nyandungu nyuma yo kubungabungwa
Iki gishanga kimaze kugarura ubuzima
Ibisiga bihatembera byizihiwe
Iki gishanga kigaragaramo inyoni z'amoko menshi
Mu minsi iri imbere aha hantu hazajya hasurwa cyane n'abakunda ubukerarugendo bushingiye ku nyoni
Hubatswe ruhurura zifite uburyo bwo kuyungurura amazi yinjira mu gishanga ku buryo imyanda yose ikurwamo

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .