Isabukuru nziza kuri muzehe wacu: Imbamutima z’Abanyarwanda ku munsi Perezida Kagame yavutseho (Video)

Yanditswe na Ishimwe Israel
Kuya 23 Ukwakira 2020 saa 10:25
Yasuwe :
0 0

Imyaka 63 irashize i Nyarutovu muri Komini Tambwe, Perefegitura ya Gitarama ari yo Ruhango y’ubu hatashye inkuru y’umukiro. Ni umunsi w’amateka kuko ari wo Rutagambwa Deogratias na Asteria Rutagambwa bibarutse Paul Kagame, bucura mu bana batandatu.

Hari ku wa 23 Ukwakira 1957, ubwo u Rwanda rwabonaga umutabazi uzarucungura akarukura ku manga rugiye kuzima, rukongera kubaho.

Uwo munsi ni intangiriro y’amateka mashya no guhinduka k’ubuzima bw’Abanyarwanda bari bugarijwe n’ibibazo uruhuri.

Iterambere Perezida Kagame yagejeje ku Rwanda ntirirondoreka, rikora mu mfuruka zose z’ubuzima bw’abenegihugu. Umusingi w’umuhate we ufite imizi ku bwitange yagize mu rugamba rwo kubohora u Rwanda, akaruvana mu maboko y’ubuyobozi bubi bwarugushije muri Jenoside yakorewe Abatutsi, yahitanye abasaga miliyoni mu mezi atatu.

Uyu wa Gatanu ntusanzwe kuri Perezida Kagame. Ni wo munsi yizihizaho isabukuru y’amavuko. Ni yo ya mbere yizihije kuva yinjiye mu cyiciro cy’ababyeyi bafite abuzukuru.

-  Abaturage b’ingeri zitandukanye bifurije Kagame kuramba

Abanyarwanda yakuye mu icuraburindi n’abishimira ibyo igihugu cyagezeho, bifurije Perezida Kagame isabukuru nziza y’amavuko.

Ni abantu b’ingeri zitandukanye barimo abacuruzi, abamotari, abacuruzi, abahanzi, abana, urubyiruko n’abandi.

Muhayimana Jean Bosco uvuka mu Murenge wa Gashenyi mu Karere ka Gakenke akaba amaze imyaka icyenda atwara moto, yashimye Umukuru w’Igihugu wabakuye mu icuraburindi.

Ati “Njye ahantu nari ntuye ntihabaga amashanyarazi. Umuriro wanyuraga hejuru y’aho dutuye, ugana i Kigali. Muri iyi minsi umusaza yakoze akazi atugezaho umuriro n’imihanda iri kubakwa.’’

Mu butumwa bwe yamusabye gukomeza inzira y’iterambere yatangije. Ati “Ndamwifuriza isabukuru nziza y’amavuko, arakabyara, aragaheka, akomeze atuyobore neza. Turamwishimishiye.’’

Imaniriho Sylvie utuye mu Mujyi wa Kigali yashimye uko bagobotswe mu bihe bya Coronavirus.

-  Kagame yaciye akarengane, ubusirimu burimakazwa

Perezida Kagame afatwa nk’Umutabazi n’Intumwa y’Imana ku Banyarwanda, yaziye igihe kandi ikenewe. Izina rye rirabisobanura ko ari uwemye kandi usatira umwanzi akamuhashya kugeza aguye ruhabo.

Umusaza Uwamahoro Yohani utuye i Kamonyi yavuze ibyo Kagame yagejeje ku Rwanda utamurata yaba ari ‘intashima.’

Ati “Nambaye inkweto, ntazo twagiraga, twagendaga amavunja ari yose, ajojoba, ibirenge byaratambamye. Umubyeyi kuva yaza, abantu barasirimutse, barakeye.’’

“Isabukuru nziza, ndamwifuriza umugisha uva ku Mana. Ubu nta muntu ukirenganywa n’ushatse kubikora ubona igisubizo cyihuse. Mbere uwaguhaga serivisi yabanzaga kwaka ruswa. Nibyo nagaye Leta yavuyeho.’’

Umuhorakeye Josephine utuye mu Mudugudu wa Rugazi, Akagari ka Ruyenzi, Umurenge wa Runda muri Kamonyi yifurije Perezida Kagame kuramba akagira imyaka 200.

Yagize ati “Perezida Kagame ndamwifuriza isabukuru nziza. Numva yaramba iteka ryose.’’

-  Perezida Kagame yagereranyijwe na Mose w’Abanyarwanda!

Urugendo rwa Paul Kagame rwo kubohora u Rwanda hari abarugereranya na Mose wo muri Bibiliya warwanye inkundura akura Abisiraheli mu buretwa bwa Farawo.

Nkeshimana Hussein wahoze mu gisirikare cy’u Rwanda akaba asigaye akorera muri RFTC, yashimye ko afite amahoro n’umutekano.

Ati “Njye mwita umubyeyi kuko arenze kuba Perezida, yankoreye byinshi, ubu mfite inzu ndubatse. Imana ikomeze imutere ingabo mu bitugu n’ubutaha azongere atuyobore kuko Abanyarwanda turacyamwifuza.’’

“Perezida wa Repubulika ameze nka Mose wakuye Abisiraheli mu Misiri cyangwa Aburahamu wahesheje abakomokaho umugisha. Nawe yarokoye Abanyarwanda. Umudendezo dufite ni ukubera we! Nyakubahwa Imana ikomeze kuyobora Abanyarwanda no kubageza ku byo yifuza.’’

Sebazungu Célestin utuye mu Murenge wa Nyamiyaga mu Karere ka Gicumbi yashimye ko Kagame yamugobotse akamworoza. Ibi bigaragaza ko bitapfuye kwizana ahubwo ari ibintu yatojwe kuva mu bwana bwe.

Ati “Ahantu uyu mugabo atugejeje, tuvuge ngo Imana ikomeze imwongerere ibikorwa ari gukora. Ndi umusaza naramugaye akaboko simpinga, yampaye amatungo ndoroye, yanampaye amabati inzu yangwiriye.’’

Uyu musaza w’imyaka 73, yavuze ko bifuza kumugumana kuko nta kibazo ateye. Ati “Niyo namurebesha amaso byonyine byanshimisha.”

Amashimwe y’abaturage kuri Perezida Kagame ntabarika; akubiye mu guhagarika Jenoside, kwimakaza umutekano no guteza igihugu imbere kikaba gitangarirwa n’amahanga.

Umuhanzi Gatsinzi Emery [Riderman] yavuze ko u Rwanda rwateye imbere muri byinshi yitsa ku mutekano wacyo.

Yagize ati “Turashimira abayobozi bakuru b’igihugu n’abagira uruhare mu mutekano mwiza dufite kuko niwo iterambere ryose rishingira.’’

Yavuze ko Perezida Kagame amufata nk’umuyobozi wagize ubutwari mu kubohora igihugu.

Ati “Ndifuriza Perezida Kagame isabukuru nziza y’amavuko. Ni umugisha kuba tumufite nk’umuyobozi wacu, ureba kure, unafite icyerekezo gihamye. Ni umugisha kuba tumufite nk’Abanyarwanda ndetse n’Abanyafurika kuko afite inyungu z’Abanyarwanda n’iz’Abanyafurika ku mutima we.’’

-  Amateka avunaguye ya Perezida Kagame

Perezida Kagame yavutse ari ku wa Gatatu, tariki ya 23 Ukwakira 1957, wari uwa Gatatu wa 43 muri uwo mwaka.

Itariki ye y’amavuko yahuriranye n’uwa Gatatu yavukiyeho inshuro zitandukanye nko mu 2019 yizihiza imyaka 62, mu 2013 ubwo yizihizaga isabukuru y’imyaka 56. Bizanahura mu 2024 na 2030.

Umubyeyi wa Perezida Paul Kagame, Asteria Rutagambwa witabye Imana mu 2015 akomoka mu muryango wa Rosalia Gicanda wabaye Umwamikazi wa nyuma w’u Rwanda (umuvandimwe).

Paul Kagame yakuze akunda u Rwanda ku buryo no mu gihe yari mu buhungiro, byamwanze mu nda akarusura inshuro zigeze kuri ebyiri mu 1977 ndetse no mu 1978.

Kagame ni Perezida wa Gatanu wayoboye u Rwanda [kuva ku wa 24 Werurwe 2000] kuva rwabona ubwigenge.

Inzira yamugejeje ku buyobozi irimo amahwa menshi kuko umuryango we wari utuye mu Mujyi wa Ruhango, mu Ntara y’Amajyepfo aho yavukiye wari warahunze.

Mu gihe ivanguramoko ryibasiraga Abatutsi, umuryango wa Paul Kagame uri mu yatotejwe maze abasaga 100 000 bava mu byabo bahungira mu bihugu by’abaturanyi.

Mu 1959, umuryango wa Kagame warahunze ujya kuba mu Majyaruguru y’Uburasirazuba bw’u Rwanda, aho wamaze imyaka ibiri mbere yo kwerekeza muri Uganda mu Nkambi ya Nshungerezi.

Kagame yatangiriye amashuri hafi y’inkambi y’impunzi, aho we n’abandi bana b’impunzi babaga. Ku myaka icyenda y’amavuko, yimukiye ku kindi kigo cy’amashuri abanza cya Rwengoro, aharangiriza amashuri abanza afite amanota meza bimuhesha kwiga mu Kigo cya Ntare kiri mu bikomeye muri Uganda.

Kagame n’abandi basore bari barambiwe ubuzima bw’ubuhunzi, bishyize hamwe bahuza umugambi wo guharanira uburenganzira bwabo.

Iya 1 Ukwakira 1990, nibwo urugamba rwo kubohora u Rwanda rwatangiye. Mu bushobozi buke, buherekejwe n’ubwitange Kagame yasanze ingabo zari zimaze gucika intege kubera abakuru muri zo bari bamaze kwicwa n’umwanzi.

Uyu mugabo yayoboye ingabo yasanze zitarenga 2000 azigeza ku ntsinzi. Yarazihuje barisuganya banasaba ubufasha mu mpunzi z’Abanyarwanda mu bihugu bitandukanye.

Perezida Kagame na Jeannette Kagame bakoze ubukwe ku wa 10 Kamena 1989. Kuri ubu Perezida Kagame ni umubyeyi w’abana bane, akaba sekuru w’umwuzukuru umwe.

Mu mikino akunda gukina harimo uwa Tennis, akunda kureba uwa Basketball n’umupira w’amaguru ndetse yihebeye Arsenal yo mu Bwongereza. Akunda kunywa amata cyane ndetse mu gihe cy’ubusore ngo yakundaga kurya inyama nyinshi.

Perezida Kagame yabaye Visi Perezida abifatanyije no kuba Minisitiri w’Ingabo kuva mu 1994 kugeza mu 2000. Kuva aho abereye Perezida amaze gukorana n’abaminisitiri b’intebe bane. Ari kuyobora manda ya gatatu nyuma yo kubisabwa n’abaturage aho bamaze igihe kinini bamwumvisha ko ntawe usimbuza ikipe itsinda.

Amafoto ya Perezida Kagame mu bihe bitandukanye

Iyi foto yafashwe mu Ugushyingo 1957, uhereye ibumoso: Mzee Mutembe ubyara Kagame muri Batisimu, uteruye umwana ni Agnes Bezinge nyina muri Batisimu mu gihe abandi ari umubyeyi we Asteria Rutagambwa na Gatarina Bushayija wari inshuti y'umuryango
Perezida Kagame yabyirutse ari umwana uca bugufi
Mu bugimbi bwe yakuze atuje cyane, ashimwa mu rungano
Perezida Kagame na Jeannette Kagame bakoze ubukwe ku wa 10 Kamena 1989
Major General Kagame yari afite ikoranabuhanga rimufasha kuganira n'ingabo ziri ku rugamba
Major General Paul Kagame ayoboye ingabo ku rugamba
Itangazamakuru ni imwe mu ntwaro yifashishijwe na RPF Inkotanyi mu gusobanura intego y'urugamba rwo kubohora igihugu. Aha Paul Kagame yaganiraga n'abanyamakuru ku Mulindi w'Intwari
Muri Gashyantare 2001, Perezida Kagame ageza ijambo ku bagize akanama k'umutekano ka Loni i New York
Ku wa 23 Gashyantare 2001, Perezida Kagame ari kumwe n'abandi bakuru b'ibihugu 12 nyuma y'inama bari bitabiriye i Dar es Salaam yatumijwe na Banki y'Isi na IMF higwa ku iterambere ry'ubukungu
Muri Gashyantare 2001, Kagame asuhuza Kofi Annan wari Umunyamabanga Mukuru wa Loni ku cyicaro gikuru cy'uwo muryango i New York
Tariki 30 Nyakanga 2002 ubwo u Rwanda na Congo byasinyaga amasezerano yo guhagarika imirwano, agasinyirwa i Pretoria muri Afurika y'Epfo. Iki gihe u Rwanda rwemeye kuvana ingabo zarwo muri Congo, Congo nayo yemera guhashya inyeshyamba za FDLR zari zarahagize indiri
Tariki 23 Kanama 2003 ubwo Perezida Kagame yiyamamarizaga i Nyamirambo mu Mujyi wa Kigali, habura iminsi ibiri ngo amatora ya Perezida abe
Muri Nzeri 2003 ubwo Perezida Kagame yari kumwe n'uwa Leta Zunze Ubumwe za Amerika George W Bush, Thabo Mbeki wa Afurika y'Epfo na Joseph Kabila wa RDC i Washington
Muri Werurwe 2003 ubwo Perezida Kagame yasuraga u Bubiligi
Mu 2003, Perezida Kagame yakira mu biro bye uwari Umushinjacyaha Mukuru w'urukiko rwashyiriweho u Rwanda, Hassan Bubacar Jallow. Iki gihe urwo rukiko rwari rugifite akazi kenshi ko gucira imanza no gufata abakekwaho Jenoside bidegembyaga mu mahanga
Tariki 12 Nzeri 2003 ubwo Perezida Kagame yarahiriraga kuyobora u Rwanda muri manda ye ya mbere. Yari yatsinze amatora ku majwi 95 %, ahigitse abarimo Faustin Twagiramungu wagize amajwi 3.6 % na Jean-Népomuscène Nayinzira wagize 1.3 %
Mu Ukuboza 2003 ubwo Perezida Kagame yitabiraga umuhango wo kwizihiza imyaka 40 Kenya yari imaze ibonye ubwigenge
Tariki 17 Kamena 2004 Perezida Kagame asuhuza uwari Perezida wa Banki y'Isi Paul Wolfowitz i Kigali
Tariki 24 Kamena 2004 ubwo Perezida Kagame yatangizaga ku mugaragaro Inkiko Gacaca zaciriye imanza abagera kuri miliyoni ebyiri bagize uruhare muri Jenoside yakorewe Abatutsi
Tariki 15 Mata 2005 ubwo Perezida Kagame yahuraga na George Bush wayoboraga Amerika. Iki gihugu ni kimwe mu baterankunga bakomeye b'u Rwanda
Tariki 6 Ukuboza 2006 ubwo Perezida Kagame na Madamu Jeannette Kagame bakirwaga n'Umwamikazi w'u Bwongereza, Elisabeth II i Londres
Mu Ukuboza 2007 ubwo Perezida Kagame yahuraga n'uwari Minisitiri w'Intebe w'u Bwongereza, Gordon Brown. Yijeje u Rwanda kurushyigikira mu mugambi wo kwinjira mu muryango wa Commonwealth n'ubufasha mu kuburanisha abakekwaho Jenoside bihishe mu Bwongereza
Tariki 12 Ukuboza 2007 ubwo Perezida Kagame yahabwaga igihembo cyo guteza imbere abagore, ashimirwa uruhare abagore bagize mu iterambere ry'igihugu nyuma ya Jenoside yakorewe Abatutsi
Tariki 14 Gicurasi 2007 ubwo Perezida Kagame yakirwaga na mugenzi we w'u Bushinwa, Hu Jintao, mu ruzinduko rw'iminsi itandatu yagiriye mu Bushinwa
Muri Mata 2008, Chancelière w'u Budage Angel Merkel aganira na Perezida Kagame. Uruzinduko rwari rugamije gutsura umubano, nyuma y'amezi abiri uwari Perezida w'u Budage Horst Koehler avuye mu Rwanda
Tariki 15 Nzeri 2008 ubwo Perezida Kagame yitabiraga amatora y'abadepite. Icyo gihe FPR Inkotanyi niyo yatsindiye imyanya myinshi mu Nteko kuko yabonye imyanya 42, PSD ibona 7 naho PL ibona imyanya 4
Tariki 19 Gashyantare 2008 ubwo Perezida Kagame na Madamu bakiraga ku Kibuga cy'Indege cya Kigali, Perezida George Bush n'umufasha we, rukaba uruzinduko rwa kabiri Perezida wa Amerika yari agiriye mu Rwanda nyuma ya Jenoside
Tariki 7 Ugushyingo 2008, Perezida Kagame ni umwe mu bakuru b'ibihugu bitabiriye inama yigaga ku bibazo byo mu Burasirazuba bwa Congo, yabereye i Nairobi muri Kenya. Icyo gihe inyeshyamba za CNDP zari ziyobowe na Laurent Nkunda zari ziri mu mirwano igamije gukuraho ubutegetsi bwa Joseph Kabila
Tariki 20 Werurwe 2009 ubwo Perezida Kagame yahuraga na Nelson Mandela wahoze ayobora Afurika y'Epfo bahuriye i Johanesburg. Perezida Kagame yavuze ko abayobozi ba Afurika bakwiriye guharanira impinduka zikemura ibibazo byugarije umugabane
Perezida Kagame asura ikigo cy'amashuri mu ruzinduko yagiriye mu Ntara y’Amajyepfo tariki 22 na 23 Kanama 2009. Abanyeshuri bamwerekaga ubumenyi bwabo mu bijyanye n'ikoranabuhanga
Tariki ya 1 Kanama 2009 ubwo Perezida Kagame yasozaga Itorero ry'abakora mu rwego rw'ubuhinzi
Perezida Kagame aganira n'abana, mu nama ya gatanu y'abana yabaye tariki 12 Ugushyingo 2009
Muri Kanama 2010 ubwo hatangazwaga ko Perezida Kagame yatsinze amatora, ku majwi 93 %
Muri Gicurasi 2010 ubwo Perezida Kagame yasuraga abacuruzi bakorera Nyabugogo, mu rwego rwo kumva no gushakira umuti ibibazo byabo
Perezida w'u Bufaransa, Nicolas Sarkozy asura u Rwanda tariki 25 Gashyantare 2010. Nirwo ruzinduko rwa mbere Perezida w'u Bufaransa yari agiriye mu Rwanda nyuma ya Jenoside yakorewe Abatutsi
Tariki 1 Werurwe 2010 ubwo Perezida Kagame yafunguraga ku mugaragaro inyubako y'uruganda Inyange iherereye i Masaka. Mbere urwo ruganda rwakoreraga i Gikondo
Tariki 19 Mata 2010 ubwo Perezida Kagame yitabiraga umuhango wo kumurika igitabo 'Paul Kagame and the Resilience of a People' kivuga ku mateka ya Perezida Kagame, aya FPR Inkotanyi n'uburyo u Rwanda rwari rwarasenyutse muri Jenoside rukongera kubaho
Tariki 6 Nzeri 2010 ubwo Perezida Kagame yarahiraga kuyobora u Rwanda muri manda ya kabiri. Yatsinze ku majwi 93 % atsinze abo bari bahanganye barimo Dr Ntawukuriryayo Jean Damascene wa PSD, Prosper Higiro wa PL na Alvera Mukabaramba wa PPC
Tariki 1 Nyakanga 2011 ubwo Perezida Kagame yahabwaga igihembo cyiswe Chello Foundation Humanitarian Award kubera imiyoborere ye myiza
Tariki 12 Nzeri 2011 ubwo Perezida Kagame yagiriraga uruzinduko mu Bufaransa; urwa mbere yari agiriyeyo nyuma ya Jenoside yakorewe Abatutsi
Perezida Kagame asoza itorero ry'abanyamabanga nshingwabikorwa b'Imirenge muri Kanama 2011
Perezida Kagame ubwo yasuraga uruganda rwa Hyundai rwo muri Koreya y'Epfo mu Ukuboza 2011
Tariki 11 Kamena 2011 ubwo Perezida Kagame yitabiraga Rwanda Day yabereye i Chicago muri Leta Zunze Ubumwe za Amerika
Tariki 15 Mata 2011 ubwo Perezida Kagame yasuraga abanyeshuri bigaga mu ishuri rikuru ry'Ikoranabuhanga, KIST n'iry'Ubuvuzi, KHI. Aha bamwerekaga ibyo biga
Perezida Kagame ubwo yafunguraga ku mugaragaro Gorillas Golf Hotel iherereye i Nyarutarama mu Mujyi wa Kigali. Yatashywe mu 2012
Muri Kanama 2013 ubwo Perezida Kagame yatahaga igice cyahariwe ibijyanye n'ubuhinzi mu cyanya cyahariwe inganda i Masoro
Perezida Kagame mu matora y'abadepite yabaye tariki 16 Nzeri 2013. FPR Inkotanyi niyo yatsindiye imyanya myinshi kuko yabonye 41,PSD ibona imyanya 7 naho PL ibona imyanya 6
Tariki 13 Ukuboza 2013 ubwo Perezida Kagame yahaga icyubahiro Nelson Mandela watabarutse tariki 5 Ukuboza 2013
Tariki 5 Kanama 2014 ubwo Perezida Kagame n'umukobwa we Ange Kagame bageraga i Washington mu nama yahuje Perezida Obama n'abakuru b'ibihugu bya Afurika
Perezida Kagame asuhuza umwe mu bari bitabiriye Rwanda Day yabereye Atlanta muri Amerika tariki 20 Nzeri 2014
Muri Gashyantare 2014 ubwo Perezida Kagame yatangaga indangamuntu ye ku bashinzwe abinjira n'abasohoka mu rwego rwo gutangiza gukoresha indangamuntu mu kwambuka imipaka ku batuye muri EAC
Perezida Kagame ahereza igikombe El Merreikh nyuma yo gutsinda APR FC mu mukino wa nyuma wa Cecafa Kagame Cup 2014
Perezida Kagame atangiza ibikorwa byo kwibuka ku nshuro ya 20 Jenoside yakorewe Abatutsi mu muhango wabereye kuri Stade Amahoro kuwa 7 Mata 2014. Ni umuhango witabiriwe n'abanyacyubahiro batandukanye barimo n'uwari Umunyamabanga Mukuru wa Loni, Ban Ki Moon
Tariki 5 Werurwe 2015 ubwo Perezida Kagame yatahaga urugomero rwa Nyabarongo I rutanga Megawatt 28
Tariki 10 Kanama 2015 ubwo Perezida Kagame yatahaga inyubako ya M Peace Plaza n’Ibiro by’Umujyi wa Kigali. Inyubako M. Peace Plaza yatangiye kubakwa mu mwaka wa 2010, yuzuye itwaye miliyoni 40 z'amadolari
Perezida Kagame n’umuyobozi wa Dubai Sheikh Mohammed bin Rashid Al Maktoum, bakurikirana isinywa ry’amasezerano hagati y’Ikigo cy’Igihugu cy’Iterambere n’Ikigo gishinzwe ishoramari Mpuzamahanga rya Dubai tariki 17 Ugushyingo 2015
Perezida Kagame aganiriza abanyarwanda bari bitabiriye Rwanda Day i Amasterdam mu Buholandi tariki 3 Ukwakira 2015
Tariki 12 Kanama 2015 ubwo Perezida Kagame yahuraga n'abacuruzi bibumbiye muri koperative zikorera mu Gakinjiro ku Gisozi. Abagize izo koperative biteje imbere baniyubakira inzu zigezweho zo gukoreramo
Perezida Kagame ubwo yitabiraga amatora ya referandumu ku wa 18 Ukuboza 2015. Ni amatora yabaye nyuma y'ubusabe bw'Abanyarwanda basaga miliyoni eshatu basabye ko Itegeko Nshinga rivugururwa Perezida Kagame akemererwa kongera kwiyamamaza
Tariki 16 Mutarama 2016 ubwo Perezida Kagame yatangizaga imikino ya CHAN yabereye i Kigali
Tariki 13 Kamena 2016 ubwo Perezida Kagame yatahaga Coca Cola Ekocenter mu Karere ka Rwamagana, umushinga ukubiyemo serivisi zirimo amashanyarazi aturuka ku mirasire y'izuba, amazi meza n'ibindi. Iburyo hari uwahoze ari umuyobozi mukuru wa Coca Cola, Muhtar Kent naho ibumoso hari Rev Jesse Jackson, umuvugabutumwa wigeze no kuba senateri muri Amerika
Tariki 7 Nyakanga 2016 ubwo Perezida Kagame yakiraga Minisitiri w'Intebe wa Israel Benjamin Netanyahu mu ruzinduko rw'umunsi umwe yagiriye i Kigali. Yasuye urwibutso rwa Jenoside rwa Kigali, aganira na Perezida Kagame, hanasinywa amazezerano y' ubufatanye hagati y' ibihugu byombi.
Mu Ukuboza 2016 ubwo Perezida Kagame yafunguraga ku mugaragaro inyubako ya Kigali Heights. Iyi nyubako yuzuye itwaye miliyari 30 Frw, iherereye ku Kimihurura mu Mujyi wa Kigali
Ubwo Perezida Kagame yatahaga Uruganda rw'amazi rwa Nzove II muri Werurwe 2016. Rutanga metero-cube ibihumbi 25 buri munsi
Perezida Kagame atwaye mu modoka umwami wa Maroc Mohamed VI mu ruzinduko rw'iminsi itatu yagiriye mu Rwanda mu Ukwakira 2016. Hasinywe amasezerano atandukanye arimo ay'ishoramari mu mabanki, ubutwererane n’imikoranire isesuye, korohereza abafite pasiporo z’abadipolomate n’izo kuva mu gihugu bajya mu kindi n’andi
Perezida Kagame n'umwami wa Maroc Mohamed VI mu ruzinduko yagiriye mu Rwanda mu 2016
Tariki 16 Gicurasi 2016 ubwo Perezida Kagame yatahaga umushinga wa Kivuwatt utanga umuriro wa Megawati 26
Perezida Kagame yishimana n'abanyarwanda bitabiriye Rwanda Cultural Day yabereye i San Francisco muri Leta Zunze Ubumwe za Amerika tariki 24 Nzeri 2016
Mu Ukwakira 2016 ubwo Perezida Kagame yatangizaga uburyo bwo gutwara amaraso ku bitaro hifashishijwe drone
Muri Nyakanga 2016 igihe Perezida Kagame n'abandi bakuru b'ibihugu bya Afurika bari bari mu nama ya Afurika Yunze Ubumwe yabereye i Kigali
Muri Kanama 2016 ubwo Perezida Kagame yakiraga Perezida wa Benin Patrice Talon
Muri Mata 2016 ubwo Perezida Kagame yagabiraga inka Perezida wa Tanzania John Pombe Magufuli mu ruzinduko yagiriye mu Rwanda
Tariki 2 Kanama 2017 ubwo Perezida Kagame yiyamamarizaga mu Karere ka Gasabo. Bivugwa ko hari hitabiriye abantu basaga ibihumbi 600
Ku wa 4 Kanama 2017 ubwo Perezida Kagame yitabiraga amatora ya Perezida yahatanyemo na Frank Habineza wa Democratic Green Party of Rwanda na Phillipe Mpayimana
Tariki 18 Kanama 2017, Perezida Kagame n'umuryango we bakira abanyacyubahiro batandukanye bitabiriye umuhango w'irahira rye
Tariki 18 Kanama 2017 ubwo Perezida Kagame yarahiriraga kuyobora u Rwanda indi myaka irindwi nyuma yo gutsinda amatora ku majwi 98.7 % ahigitse abarimo Phillipe Mpayimana na Frank Habineza
Tariki 1 Nzeri 2017 ubwo Perezida Kagame yatahaga ku mugaragaro Bisate Eco Lodge mu Karere ka Musanze. Yubatse muri Pariki y’Ibirunga aho uba witegeye neza udusongero tw’ibirunga bya Bisoke, Kalisimbi na Mikeno
Muri Nzeri 2017 Perezida Kagame atwaye igare mu ifatwa rya filime Rwanda Royal Tour. Igaruka ku hantu nyaburanga hatatse urwa Gasabo, ikagaragaramo Perezida Kagame asabana, yerekana amateka y’u Rwanda aho rwavuye ndetse anashimangira ko aho rugana arirwo rugendo rukomeye ruhanzwe amaso.
Tariki 13 Ukuboza 2017 ubwo Perezida Kagame yatahaga Ingoro y'Amateka y'urugamba rwo guhagarika Jenoside
Perezida Kagame ari kumwe na Perezida Rivlin wa Israel na Minisitiri w'Intebe Netanyahu mu ruzinduko yagiriye i Yeruzalemu tariki 10 Nyakanga 2017
Tariki 10 Nyakanga 2017 ubwo Perezida Paul Kagame yabaga umwe mu bakuru b’ibihugu by’Isi bamaze gutera igiti cya olive i Yeruzalemu mu ishyamba rigizwe n’ibiti biterwa n’abantu bakomeye basura icyo gihugu rizwi nka ‘Grove of Nations’
Tariki 17 Kamena 2017 ubwo Perezida Kagame yafunguraga ku mugaragaro icyicaro cy’Umuryango FPR Inkotanyi giherereye i Rusororo mu Karere ka Gasabo
Tariki 8 Kanama 2017 ubwo Perezida Paul Kagame yatahaga ku mugaragaro ikibuga cy'umukino w'intoki wa Basketball cyo kuri Club Rafiki i Nyamirambo cyasanwe na Giants of Africa. Perezida Kagame yari kumwe na Masai Ujiri washinze Giants of Africa
Muri Gashyantare 2017, Perezida Kagame yasuye Abaturage bo mu Karere ka Nyagatare. Aha yumvaga ibibazo byabo akabikemura cyangwa agatanga umurongo w'uko byakemurwa
Ubwo Perezida Kagame yatahaga Stade ya Cricket i Gahanga tariki 28 Ukwakira 2017
Kuwa 09 Kanama 2017 nibwo Perezida Paul Kagame yafunguye ku mugaragaro imirimo yo kubaka ikibuga cy’indege mpuzamahanga cya Bugesera giherereye mu Ntara y’Iburasirazuba, kizaba ari icya mbere mu bunini mu karere
Perezida Kagame ageza ijambo ku bitabiriye inama ya AIPAC ihuza Amerika na Israel ndetse n’abafatanyabikorwa i Washington DC kuwa 26 Werurwe 2017
Perezida Kagame na Madamu hamwe na Perezida Xi Jinping n'umufasha we tariki 17 Werurwe 2017 i Beijing
Uruzinduko rwa Perezida Kagame mu Bushinwa tariki 17 Werurwe 2017. Aha yari amaze kwakirwa na Perezida Xi Jinping w'u Bushinwa
Tariki 10 Kamena 2017 muri Rwanda Day yabereye i Bruxelles mu Bubiligi
Kuwa 17 Nzeri 2017 i New York ubwo Perezida Kagame yashyikirizaga ishimwe Irina Bokova, Umuyobozi Mukuru wa UNESCO akaba n’Umuyobozi Wungirije wa Komisiyo y’Umuyoboro Mugari wa Internet, Broadband Commission kubera umuhate we mu guteza imbere ingamba zigamije kugeza internet kuri bose
Tariki 20 Werurwe 2017 ubwo Perezida Kagame yagiriraga uruzinduko i Vatican akagirana ibiganiro na Papa Francis. Kiliziya Gatolika yaboneyeho gusaba imbabazi kubw'abayoboke bayo bijanditse muri Jenoside yakorewe Abatutsi
Tariki ya 20 Werurwe 2017, mu ruzinduko rwa Perezida Kagame na Madamu i Vatican, bageneye Papa impano y'inkoni ya kinyarwanda
Perezida Kagame ahobera Minisitiri w'Intebe wa Ethiopia , Dr Abiy Ahmed mu ruzinduko yagiriye i Addis Abeba tariki 24 Gicurasi 2018
Tariki ya 3 Nzeri 2018 ubwo Perezida Kagame yasuhuzaga uw'u Bushinwa mu nama y’Ihuriro ku bufatanye bwa Afurika n’u Bushinwa yiswe ‘FOCAC2018’
Tariki 4 Nyakanga ubwo Perezida Kagame yatahaga umudugudu w'icyitegererezo wa Horezo mu Karere ka Muhanga watujwemo abakuwe mu manegeka
Muri Werurwe 2018 ubwo i Kigali hasinywaga amasezerano ashyiraho isoko rusange rya Afurika
Tariki 13 Kamena 2018 ubwo Perezida Kagame yakirwaga na Perezida w'u Burusiya, Vladimir Putin. Ibiganiro byabo byibanze ku mubano w’ibihugu byombi no kureba izindi nzego barushaho gufatanyamo
Mu Ukuboza 2018 ubwo Perezida Kagame yaganiraga n’abayobozi barimo Chancelière w’u Budage Angela Merkel i Berlin mu nama ya G20
Tariki 20 Ukuboza 2018 ubwo Perezida Kagame yasuraga Côte d'Ivoire, akagirwa umuturage w'icyubahiro w'Umujyi wa Abidjan
Tariki 23 Gicurasi 2018 ubwo Perezida Kagame yagiriraga uruzinduko mu Bufaransa. Aha yari kumwe na Perezida w'u Bufaransa Emmanuel Macron
Perezida Kagame aganira na Perezida wa Amerika Donald Trump muri Mutarama 2018 mu nama ya World Economic Forum yabereye i Davos
Tariki 23 Nyakanga 2018, Perezida Kagame ari kumwe na Perezida w'u Bushinwa Xi Jinping mu ruzinduko rw'iminsi ibiri yagiriye mu Rwanda. Icyo gihe u Rwanda n'u Bushinwa byasinye amasezerano 15 y'ubufatanye
Muri Gashyantare 2018 ubwo Perezida Kagame yakiraga ku meza Perezida Edgar Lungu wa Zambia mu ruzinduko yagiriye mu Rwanda
Muri Mutarama 2019 ubwo Perezida Kagame yafunguraga Kaminuza Mpuzamahanga y'Ubuvuzi, UGHE iherereye i Burera
Tariki 25 Gicurasi 2019 ubwo Perezida Kagame yitabiraga umuhango w'irahira rya Perezida Cyril Ramaphosa. Aha yatereraga isaluti abasirikare bari bari kumuha icyubahiro
Perezida Kagame asuhuza abitabiriye Rwanda Day i Bonn mu Budage tariki 10 Ukwakira 2019
Perezida Kagame muri siporo rusange izwi nka Car Free Day tariki 5 Gicurasi 2019
Tariki 22 Nzeri 2019 i New York ubwo Perezida Kagame yahuraga n'akanama kamugira inama, PAC. Aka kanama kashinzwe mu 2007
Tariki 23 Nyakanga 2019 ubwo Perezida Kagame yakirwaga n'Igikomangoma Charles cy'u Bwongereza na Wales, bakaganira ku bijyanye n’inama ihuza Abakuru b’ibihugu na za Guverinonma bigize Umuryango w’Ibihugu bikoresha Icyongereza (CHOGM), izabera mu Rwanda mu 2021
Tariki 9 Ukuboza 2019 ubwo Emir wa Qatar na Perezida Kagame bakurikiranaga isinywa ry'amasezerano yo kubaka ikibuga cy'indege cya Bugesera
Muri Gashyantare 2019 ubwo Perezida Kagame yaganiraga n'umuturage mu Karere ka Nyamagabe
Aha Perezida Kagame yari mu muganda rusange ngarukakwezi n'abaturage bo mu Karere ka Kicukiro ku wa 30 Werurwe 2019
Mu Ukwakira 2019 ubwo yafunguraga uruganda rwa Mara Phone urwa mbere muri Afurika rukora Smartphone. Aha yari kumwe n'umuherwe Ashish Thakkar nyiri sosiyete Mara Group
Tariki 21 Mata 2019, Perezida Kagame atembereza Emir wa Qatar, Sheikh Tamim bin Hamad Al Thani muri Pariki y'Akagera mu ruzinduko rw'iminsi itatu yagiriye mu Rwanda
Mu Ugushyingo 2019 ubwo Perezida Kagame yafunguraga icyicaro gishya cya Carnegie Mellon University cyuzuye mu cyanya cyahariwe inganda i Masoro
Muri Kanama 2019 ubwo u Rwanda na Uganda byasinyaga amasezerano agamije guhosha umwuka mubi umaze igihe hagati y'ibihugu byombi
Tariki 1 Kanama 2019 ubwo Perezida Kagame yatahaga Singita Kwitonda Lodge and Kataza House mu Karere ka Musanze
Tariki 9 Kanama 2019 ubwo Perezida Kagame yatahaga inzu y'imikino n'imyidagaduro, Kigali Arena
Tariki 2 Nzeri 2019 ubwo Perezida Kagame yafunguraga Ishuri ry’Ubuvuzi rya Kaminuza ya AUCA
Tariki 21 Ukwakira 2019 ubwo Perezida Kagame yafunguraga ububiko bushya bw’ibicuruzwa bivuye mu mahanga buherereye i Masaka. Bwubatswe na sosiyete Dubai Ports World izobereye mu gucunga no kubaka ububiko bw’imizigo iva cyangwa ijya mu mahanga
Muri Gashyantare 2020 ubwo Perezida Kagame yafunguraga ikigo gitanga ubuvuzi bwa kanseri hakoreshejwe uburyo bw’imirasire buzwi nka Radiotherapy, gikorera mu Bitaro bya Gisirikare bya Kanombe mu Mujyi wa Kigali
Tariki 11 Werurwe 2020 ubwo Perezida Kagame Paul yatahaga umushinga wo kuhira imyaka, Nasho Irrigation Project uherereye mu Karere ka Kirehe watewe inkunga n'umuherwe Howard Buffet
Tariki 27 Gashyantare 2020 ubwo Perezida Kagame yafunguraga ku mugaragaro hoteli One and Only Gorilla's Nest. Yubatse mu Kinigi mu Karere ka Musanze, ikaba yaruzuye itwaye miliyari zirenga 60 z'amafaranga y'u Rwanda.
Perezida Kagame mu ifatwa rya filime 'Rwanda Royal Tour' igaragaramo ibyiza bitatse u Rwanda
Paul Kagame mu gihe cye kigoye abona umwanya wo kwita ku muryango we
Perezida Kagame muri Nzeri 2020 yagaragaje ibyishimo yatewe no kuba afite umwuzukuru, ashyira hanze ku nshuro ya mbere ifoto ari kumwe nawe amuteruye

Amafoto: Village Urugwiro na Getty Image


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .