Kayonza: Urugomero rwa Ruramira rugiye gushyirwaho ikimenyetso hajye hibukirwa Abatutsi bazize Jenoside

Yanditswe na Hakizimana Jean Paul
Kuya 5 Ukwakira 2020 saa 09:31
Yasuwe :
0 0

Ubuyobozi bwa Ibuka mu Karere ka Kayonza buratangaza ko bwahagaritse gushakisha imibiri y’Abatutsi bishwe muri Jenoside mu 1994 bakajugunywa mu rugomero rwa Ruramira, butangaza ko hagiye gushyirwa ikimenyetso hakazajya hibukirwa buri mwaka.

Urugomero rwa Ruramira rufite igice kinini gikora ku Kagari ka Gikaya mu Murenge wa Ruramira muri Kayonza.

Mu makuru yatanzwe n’abaturage muri Gacaca bavugaga ko muri uru rugomero hajugunywemo imibiri y’Abatutsi basaga 3000, mu gihe cy’impeshyi kuva mu 2000 hakaba haragiye hagaragara imibiri hejuru y’amazi ari nabyo byatumye hafatwa umwanzuro wo gukamya amazi yose ngo hashakishwe imibiri yose yaba irimo.

Ni igikorwa cyatangijwe umwaka ushize muri Kanama gisozwa tariki ya 18 Nzeri uyu mwaka hamaze kuboneka imibiri 226, kikaba cyaragizwemo uruhare n’abaturage, ubuyobozi bw’Akarere ka Kayonza, ubwa Ibuka n’Ikigo cy’Igihugu gishinzwe Iterambere ry’Ubuhinzi n’Ubworozi, RAB.

Umuyobozi wa Ibuka mu Karere ka Kayonza, Ndindabahizi Didace, yabwiye IGIHE ko bahisemo gusoza iki gikorwa kuko ngo bageze ahantu bigaragara ko imashini zitagishobora kubona imibiri ahubwo ziri guheramo.

Yagize ati “Twageze ahantu birananirana dufata umwanzuro wo gusoza kuko twazanye n’imashini iheramo hagomba kuzanwa indi kugira ngo iyikuremo amazi yanze gushiramo, niyo mpamvu twabajije abo duhagarariye bakatubwira ko mu bigaragara nta kitarakozwe ibisigaye birenze ubushobozi bwa muntu.”

Yakomeje avuga ko barekeye muri Nzeri hamaze kuboneka imibiri 226; ku kijyanye n’imibiri yasigaye muri uru rugomero yavuze ko hazashyirwa ikimenyetso kuburyo abantu bazajya baza kuhibukira buri mwaka.

Kuva mu 2000 kugeza mu 2017 muri uru rugomero hari hamaze kuboneka imibiri isaga 500 y’Abatutsi bishwe muri Jenoside, ikaba yaragiye ishyingurwa mu Rwibutso rwa Nyamirama, urwa Ruramira n’urwa Mukarange. Iyi yiyongera ku mibiri 73 yashyinguwe mu mwaka ushize.

Icyuzi cya Ruramira cyacukuwe n’Abashinwa mu 1984 kugeza mu 1987, gikunda kwifashishwa n’abahinzi mu kuhira umuceri uhingwa hafi y’uru rugomero rukora ku mirenge ibiri ariyo Nyamirama na Ruramira.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .