Kigeli V Ndahindurwa: Umwami wimitswe mu nduru agatabarizwa mu zindi (Video)

Yanditswe na Philbert Girinema
Kuya 16 Ukwakira 2020 saa 04:42
Yasuwe :
0 0

Kigali V Ndahindurwa niwe Mwami wa nyuma w’u Rwanda, umunsi nk’uyu mu 2016 nibwo inkuru yakwiriye hose ko yatanze aguye ishyanga, nyuma y’igihe kinini yingingwa ngo atahuke akanga mu gihe yari yarateguriwe inzu nziza i Nyanza, amafaranga yo kumutunga, imodoka n’ibindi.

Ni umwami ufite amateka akomeye mu Rwanda kuko ari muri bake bimye bakiri bato, akajya ku ngoma ku bwa burembe kuko Abakoloni b’Ababiligi batashakaga ko u Rwanda rugira undi mwami nyuma y’umuvandimwe we Mutara III Rudahigwa wari umaze guterwa urushinge agatangira i Bujumbura.

Ni we mwami wa mbere mu mateka y’u Rwanda watanze, maze agakurikizwa induru, u Rwanda n’Abanyarwanda bari bazwiho kugira ibanga bakiha amenyo y’abasetsi iyo mu nkiko muri Leta Zunze Ubumwe za Amerika.

Nibura hejuru y’icya kabiri cy’ubuzima bwe, yakimaze mu buhungiro hanze y’u Rwanda, ibintu bitigeze bibaho ku bandi bami bose bategetse iki gihugu cy’amata n’ubuki.

Ubuzima bwe bwose bwarimo urunturuntu, guhera ku munsi wa mbere mu buto bwe, yimitswe Ababiligi batamushaka, bamuhigira ko bazamwica, umunsi atanga nabwo umugogo we wamaze amezi atatu mu manza, haburanwa aho agomba gutabarizwa.

Uyu mwami yamaze imyaka 55 mu buhungiro, yabanaga n’uwahoze ari umukarani we, Boniface Benzinge. Amaze gutanga, Benzinge na Emmanuel Bushayija, Kigeli yari abereye se wabo n’abandi bake babaga hanze y’igihugu, banze ko umugogo we ucyurwa ngo utabarizwe mu Rwanda.

Uyu mwami yavukiye i Kamembe, icyo gihe se yari mu buhunzi nyuma y’uko Abakoloni b’Ababiligi bari bamuciye mu gihugu. Mbere y’uko mukuru we Rudahigwa atanga, yari yaravuze ko Ndahindurwa Jean Baptitse ariwe uzamusimbura, ndetse amubwira ko namara kwima ingoma, yazakorana na Pasiteri Ezra Mpyisi akamubera umujyanama.

Mpyisi yari mukuru kuri Ndahindurwa, kuko amurusha imyaka 15, amuzi neza kuko yakuze amubona, yari azi imyitwarire ye n’ibindi byose. Mu kiganiro na IGIHE, uyu mukambwe w’imyaka 98, yavuze ko Kigeli yize i Butare, ari umusore w’umuhanga cyane, wanakomoweho imvugo ngo aho ‘Kwica Gitera, wakwica ikibimutera’.

Ngo rimwe Umwami Rudahigwa yigeze kurambirwa no kubona uburyo Gitera wari umugaragu w’Abakoloni yirirwa atuka ubwami, afata umwanzuro wo kujya kumureba ngo amuhane ikibyimbye kimeneke. Icyo gihe ngo yashakaga guha isomo Gitera ku buryo Ababiligi barakara maze Abanyarwanda bakabavunira umuheto! Ngo Rudahigwa yagiye i Butare, ahageze ahamagaza Ndahindurwa arahamusanga baraganira.

Ati “Aramubwira ati ibya Gitera bite? Undi ati ni nk’uko asanzwe aracyatukana. Ati ubu rero naje turwane n’Ababiligi, nje gukubita igikoresho cyabo. Kigeli yari agasore, aramubwira ati Nyagasani wabaye ute? Ati oya. Niho bavanye imvugo ngo aho gukubita Gitera ukubite ikibimutera. Aramubwira ati niba ari ugukubita, fata imodoka ujye i Bujumbura ukubite Umutware w’u Rwanda n’u Burundi, yari Umubiligi, fata imodoka ujye i Kabgayi ukubite Perraudin ariko Gitera ararengana.”

Ibi Mpyisi abisobanura neza nk’ibyabaye ejo hashize, kuko yari Umujyanama w’Umwami ndetse yari mu Nama Nkuru y’Igihugu.

Ndahindurwa yimitswe mu nduru

Mukuru we Mutara III Rudahigwa yatanze mu rupfu rw’amayobera mu 1959, icyo gihe yari yagiye ku muganga we i Bujumbura, kwivuza bisanzwe undi amutera urushinge arahagwa. Abanyarwanda bagiye gufata umugogo we, bawujyana i Nyanza kugira ngo bamutabarize, ariko agahinda kenda kubasandaza umutima.

Muri uwo muhango wo gutabariza umwami, Jean-Paul Harroy, wari Umutware w’u Rwanda n’u Burundi, niwe wari umushyitsi mukuru. Yitabiriye aherekejwe n’Ingabo za Zaïre ahageze ategeka ko batabariza Rudahigwa hanyuma iby’undi mwami bikazaza nyuma.

Ndahindurwa ntabwo yari azi ko ariwe uzaba umwami kuko byari bizwi n’Abiru gusa, abantu benshi bari bitabiriye uwo muhango bari bababajwe n’umwami wabo watanze, wishwe n’Ababiligi, ku buryo iryinyo ryari ku rindi.

Mpyisi wari uhari icyo gihe, yavuze ko mu muco w’u Rwanda, ntibatabarizaga umwami umusimbura atavuzwe. Icyo gihe ngo Harroy yafashe ijambo, avuga ko hatari butangazwe umwami mushya, maze ibintu biradogera karahava.

Ati “Ni Imana yabikoze, hajyaga gupfa abantu benshi. Abanyamayaga bari bazanye imiheto biteguye kurwana, Abanyarwanda bari biteguye kurwana, Harroy nawe yazanye abasirikare b’Abanye-Congo.”

Umuntu witwaga François Rukeba wayoboraga ishyaka UNAR ni we wahagurutse ahangara Harroy, amubwira ko nta muntu ushobora gutabariza umwami nta wundi ubonetse. Ati “Harroy abona abantu bari gutunganya imiheto, abona abantu bararakaye.”

Harroy kubera ubwoba, yemereye Rukeba ko bavuga umwami, maze Kayumba ka Rwampungu wari umwiru mukuru aba ariwe uvuga ko Kigeli ariwe uzaba umwami.

Ati “Kari akantu k’amagara make, Abanyarwanda baramuterura, bamutwara mu kirere, bamuhagarika iruhande rwa Harroy bati nguyu umwami w’u Rwanda. Harroy yaracecetse, ati ashyizwe ku ntebe ariko ntazategeka. Ati inama twakoze yo gusenya ubwami, twayikoze mu myaka icumi ariko ipfuye mu madakika icumi.”

“Nta mwami wakunzwe nka Kigeli V Ndahindurwa”

Mpyisi yavuze ko mu bami bose batwaye u Rwanda, Ndahindurwa ni umwe mu bakunzwe cyane kugeza n’aho abaturage b’amoko yose bamwiyandika ku mubiri bamwifuriza kuramba.

Ati “Bamwiyandika ku mubiri bati Vive Kigeli V. Bamwiyandikaho ku mubiri, aho abantu bageze bamukunda niho bageze bamwanga. Nta wigeze akundwa nkawe ngo bamwiyandike ku mibiri yabo, ariko aho bageze bamukunda nibo bageze bamwanga bavuga ngo ni Pumbafu.”

Ubwo Congo yabonaga ubwigenge, Lumumba yasabye Kigeli V Ndahindurwa ko yazitabira uwo muhango, ndetse byaba na ngombwa akaba ariwe umanika ibendera. Yavuye i Burundi aho yari yagiye mu nama, ageze muri Congo mu muhango wo kwishimira ubwigenge, amanura ibendera ry’Ababiligi ararikandagira, amanika irya Congo.

Harroy abimenye, ngo yakubitiye agatoki ku kandi, avuga ko Kigeli nagaruka mu Rwanda agomba guhita yicwa. Undi nawe aritaye mu gutwi ahita ahungira muri Tanzania, nyuma naho aza kuhava ajya muri Uganda ahaba igihe kinini naho aza kuhava ajya muri Kenya.

Ati “Idi Amin niwe wamujyanye muri Uganda, nanjye banyohereza gukora i Bugema [muri Uganda], twajyaga tubonana, igihe kiragera Obotte ahindura ibintu, Kabaka wari warahungishije Kigeli nawe arahunga, Kigeli ahungira muri Kenya. Icyo gihe abayobozi banjye banyohereza gukora i Nairobi ariho nawe ari, tuhabana imyaka.”

Yavuye muri Kenya afashijwe na Ambasade ya Leta Zunze Ubumwe za Amerika muri iki gihugu, gusa agezeyo agorwa no kubona aho aba, abayobozi b’Itorero ry’Abadiventisiti ku Isi nibo bamufashe bamucumbikira muri hoteli kugeza ubwo Amerika imwakiriye nk’impunzi, agumayo abana na Benzinge, Mpyisi wari waramuherekeje arataha.

Yanze gutaha mu Rwanda

Mpyisi yavuze ko yoherejwe muri Leta Zunze Ubumwe za Amerika na Perezida Kagame, ajyanye ubutumwa bwo gusaba Kigeli gutahuka, ariko atitwa umwami, ahubwo ko azafashwa agahabwa buri kimwe cyose akaba mu gihugu nk’umwami uri mu kiruhuko.

Ati “Kagame ni njye yoherejeyo ngo njye kuganira nawe atahe bamuhe ibyo byose [imodoka, inzu, n’ibindi] ariko abe umwami ugiye mu kiruhuko cy’izabukuru atari umwami, kuko ntabwo Perezida n’Umwami babangikana.”

Ubwo busabe Kigeli yarabwanze, avuga ko azaguma mu mahanga ko amaherezo “azwi n’Imana”.

Ubwo yamenyaga ko Kigeli yatanze, Mpyisi ngo n’abandi Bahindiro babiri barimo Musenyeri Anaclet na Mukama Augustin bagiye muri Amerika bafashijwe na Perezida Kagame, anasaba Ambasade y’u Rwanda muri Amerika kubafasha mu byo bakeneye.

Muri urwo rugendo, Mpyisi ngo yasanze hari abantu bariraga kuri Kigeli, batashakaga ko umugogo we uzanwa mu Rwanda, barimo Benzinge wavugaga ko umwami yasize avuze ko atazatabarizwa mu Rwanda, ariko abajijwe inyandiko arayibura, urukiko ruza kwemeza ko uruhande rwa Mpyisi rutsinze.

Ati “Uko habaye intambara yima niko habaye indi atabarizwa.”

Kuki Benzinge yari akomeye kuri Kigeli adashaka ko atabarizwa mu Rwanda?

Mpyisi yavuze ko Benzinge ari umuntu wahemutse, yemera kuyoborwa n’inda nini no gukurikira amafaranga yavaga mu baterankunga b’umwami, akomeza gushaka kwigwizaho nta kindi arengera.

Ati “Yashakaga amadolari. Niwe namusigiye ariko na nyuma arahemuka aramuta, Kigeli aba mu nzu wenyine aza gutabarwa n’undi Munyarwanda.”

Kigeli amaze gutabarizwa, Benzinge yimitse Bushayija Emmanuel amwita ko ariwe mwami mushya w’u Rwanda, amuha izina Yuhi V Bushayija.

Mpyisi asobanura ko icyo bari bagamije ari “ukurya amafaranga” ariko ko bayabuze kuko “Abazungu babonye Kigeli yagiye, basubirana amafaranga yabo”.

Yakomeje agira ati “Njye nshyira Imana imbere, Benzinge agashyira inda imbere. Twahuza gute?”

Kubera ko muri Portugal hakiri ubwami, hari amafaranga yajyaga avayo agamije gufasha Kigeli V Ndahindurwa aho yabaga muri Amerika, amaze gutanga bashaka kubyuririraho ngo umugogo we uzajye kuhatabarizwa kugira ngo n’ayo mafaranga bakomeze bayabone.

Mpyisi asobanura ko gahunda yari uko umugogo we bawushyira ahantu umuntu ashobora kuwubona byoroshye ari uko amaze kwishyura.

Kigeli yaba yari afite umwana?

Byagiye bihwihwiswa kenshi ko Kigeli V Ndahindurwa yari afite umwana ariko hakabura gihamya ndetse n’Abahindiro (abo mu Muryango w’Umwami Kigeli V Ndahindurwa) nta n’umwe wigeze abishyira ku mugaragaro mbere y’uko Umwami atabarizwa by’umwihariko mu mihango yose yabereye i Nyanza mu kumutabariza, ibijyanye n’uko yaba yari yarabyaye ntibyigeze bivugwa na gato.

Bivugwa ko uwo mwana w’umwami uzwi nka ‘Jackie’ yavutse mu Ukuboza 1975 avukiye muri Uganda aho umwami yari mu buhungiro.

Mpyisi ati “Ni ibinyoma, nta mwana Kigeli yari afite. Ni ibihimbano. Si ukuvuga ngo ntabwo yasambanaga ariko Imana yamurinze gusiga umwana uzasigara ashungerwa.”

Tariki 9 Mutarama 2017 umugogo wa Kigeli wagejejwe ku Kibuga Mpuzamahanga cy’Indege cya Kigali i Kanombe, uhita ujyanwa mu buruhukiro ku Bitaro byitiriwe Umwami Faisal mu gihe hatunganywa aho yagombaga gutabarizwa i Mwima ya Nyanza.

Mu gitondo cyo ku wa 15 Mutarama 2017, ibihumbi by’Abanyarwanda, abo mu muryango w’umwami n’inshuti bari bateraniye ku musozi wa Mwima Kigeli V Ndahindurwa ari nawo yimikiweho ku wa Kabiri tariki 28 Nyakanga 1958, bongera kuwuhuriraho bamutabariza iruhande rwa mukuru we Mutara III Rudahigwa.

Mpyisi yavuze ko Imana yigaragaje muri uwo muhango, kuko muri gahunda harimo ko isanduku irimo umugogo w’umwami itari buze gufungurwa kuko hari impungenge ko umugogo we wari umazemo igihe kinini ushobora kuba ufite impumuro itari nziza. Gusa mu kwanga amagambo y’abantu bashoboraga kuvuga ko isanduku yazanywemo ubusa, umugogo ugasigara muri Amerika, hafashwe umwanzuro irafungurwa, ku bw’amahirwe ntihanumvikanamo umwuka utari mwiza, maze abantu babona amahirwe yo kumusezerano.

Kigeli V Ndahindurwa yabaye umwami kugeza tariki 28 Mutarama 1961, ubwo yahirikanwaga n’ingoma ya cyami ndetse Kamarampaka yemeza ko ingoma ya cyami isezererwa hakimikwa Repubulika. Yakuweho na Mbonyumutwa ubwo we (Kigeli V) yari yagiye i Kinshasa, aho yagombaga kubonana n’Umunyamabanga Mukuru w’Umuryango w’Abibumbye, Dag Hammarskjöld.

Ndahindurwa wari warabatijwe Jean Baptiste, yakomeje ahunga anyura mu bihugu birimo Tanzania, Uganda na Kenya, akomereza muri Leta Zunze Ubumwe za Amerika aho yabonye ubuhungiro mu 1992, atura mu Mujyi muto wa Oakton wo muri Leta ya Virginia.

Izindi nkuru wasoma:

- Umwami Kigeli V Ndahindurwa yatabarijwe: Uko umuhango wagenze (Amafoto)

- Ibyo ukwiye kumenya ku mwana wa Kigeli V Ndahindurwa wagizwe ibanga

- Uko Umugogo wa Kigeli V wari ujyanywe muri Portugal, ukazanwa mu Rwanda uhunganywe

Iyi foto ya Kigeli yafashwe tariki 17 Ugushyingo 1959
Kigeli Ndahindurwa (iburyo) ubwo yaganiraga n'umuvugabutumwa Billy Graham
Kigeli V Ndahindurwa yimye ingoma Ababiligi batabishaka
Umubiligi General Janssens yifotozanya n'Umwami Kigeli mu Ugushyingo 1959
Umwami Kigeli V ashagawe n'abarinzi ndetse n'abaturage mu 1959
Umwami Kigeli V mu 1994 i Washington muri Leta Zunze Ubumwe za Amerika
Umwami Kigeli V Ndahindurwa yari amaze imyaka 23 atuye muri Amerika nk'impunzi
Benzige Boniface (uhagaze iburyo) kuwa 29 Kamena 2016 ubwo habaga ibirori byo kwizihiza isabukuru y'imyaka 80 y'Umwami Kigeli V Ndahindurwa byabereye i Londres
Kuwa 29 Kamena 2016; Umwami Kigeli asuhuza Umudepite witwa Ian Paisley w'Umwongereza
Umudali yambitswe kuwa 24 Kamena 2016
Ubwo umugogo w'umwami wakurwa mu buruhukiro bw'ibitaro byitiriwe Umwami Faisal
Mpyisi yatangaje ko isanduku yarimo umugogo wa Kigeli idafungurwa, hari abari kuvuga ko bayivanye muri Amerika irimo ubusa bakawusigayo
Mushiki wa Kigeli V Ndahindurwa, Mukabayojo Speciose, (wicaye hagati akikijwe n’abakobwa be)
Mpyisi ari kumwe n'umuhungu we, Mpyisi Gerald bashyira indabo ku mva ya Kigeli

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .