Kubyaza umusaruro hegitari 60 z’ubutaka u Rwanda rwahawe muri Djibouti bigeze he?

Yanditswe na IGIHE
Kuya 11 Ukwakira 2020 saa 05:10
Yasuwe :
0 0

Mu 2017, Djibouti yahaye u Rwanda ubutaka bungana na hegitari 40 bwo gukoreraho ibikorwa by’ubucuruzi n’ishoramari busanga ubundi bungana na hegitari 20 rwari rwarahawe mu 2013.

Rujya guhabwa ubu butaka, muri Werurwe 2016, u Rwanda narwo rwari rwahaye Djibouti ubutaka bungana na hegitari 10 mu cyanya cyahariwe inganda i Masoro mu Karere ka Gasabo. Hari mu ruzinduko Perezida Ismaïl Omar Guelleh yari yagiriye mu Rwanda, birangira igihugu cye gihawe ubutaka.

Kuva u Rwanda rwahabwa ubwo butaka, ntiburatangira kubyazwa umusaruro. Mu 2016, Perezida Kagame yigeze kuvuga ko “ubu butaka buramutse butunganyijwe, twagira amahirwe n’inyungu mu nzira zitandukanye zirimo kububyaza umusaruro mu kugeza ibicuruzwa biva mu Rwanda ku byambu.”

Igitekerezo cyari uko ibicuruzwa bishobora kugezwa ku cyambu n’indege, bikahava bizanwa mu Rwanda cyangwa se bijyanwa ahandi.

Uwari Minisitiri w’Ububanyi n’Amahanga, Louise Mushikiwabo, mu 2017 ubwo Perezida Guelleh yasuraga u Rwanda, yavuze ko igihugu kigiye gushyira imbaraga mu kubyaza umusaruro ubu butaka.

Ati “Icyo navuga cyihutirwa kandi gifatika ni ukubyaza umusaruro ubutaka Leta ya Djibouti yahaye u Rwanda ku cyambu cya Djibouti. Iki gihugu gifite ubukungu bujyanye n’aho giherereye; gituye ku Nyanja hakaba ari ahantu hanyura amato menshi hari ibikorwa byinshi by’ubucuruzi.”

“Twemeranyijwe ubushize ko tugiye gushora imari nka leta ndetse tugakorana n’abikorera tukaba twafatanya kugira ngo ubwo butaka bwiza tububyaze umusaruro.”

Umunyamabanga uhoraho muri Minisiteri y’Ubucuruzi n’Inganda, Michel Sebera, yabwiye Rwanda Today ko bari gukorana na RDB hamwe n’Urwego rw’Abikorera mu Rwanda, PSF kugira ngo haboneke umushoramari ufasha mu kububyaza umusaruro.

Ati “Inzego uko ari eshatu ziri mu biganiro kugira ngo tugere ku mwanzuro uhuriweho w’umushoramari no kugenzura imishinga y’ingenzi ikwiriye gukorerwa kuri ubwo butaka. Abanyamuryango ba PSF biteguye gushora imari n’abashoramari mpuzamahanga bagaragaje ubushake bwo kubyaza umusaruro ubutaka ubwo ibiganiro bizaba birangiye. Umushinga uzahita utangira.”

Nta gihe nyacyo yatangaje u Rwanda ruzatangira kubyarizaho umusaruro ubu butaka, ahubwo yashimangiye ko mu gihe ibiganiro hagati ya Guverinoma n’abikorera bizaba bigeze ku iherezo, ibikorwa bizahita bitangira.

Umuyobozi ushinzwe Ibikorwa muri PSF, Faustin Karasira, yatangaje ko uru rwego ruri gukorana na Guverinoma kugira ngo haboneke ibyangombwa by’ubu butaka mu gihe hagitegerejwe abashoramari biteguye kububyaza umusaruro.

Ku rundi ruhande, Guverinoma ya Djibouti umwaka ushize ibinyujije mu cyambu cyayo gifite mu nshingano gukurikirana iby’inganda kizwi nka DPFZA (Djibouti Ports and Free Zones Authority) bashyize umukono ku masezerano y’ubufatanye hamwe na Sosiyete ‘Prime Economic Zone’ (PEZ) yerekeranye no kubyaza umusaruro ubutaka u Rwanda rwahaye iki gihugu ruri mu Karere ka Gasabo.

Icyo gihe Umuyobozi wa DPFZA, Omar Hadi Aboubaker, yatangaje ko ubwo butaka ari bimwe mu bizafasha kwagura ibikorwa by’ishoramari kuri bwo.

Ati “Ahanini icyo tugamije ni ukwagura amarembo ya Afurika ndetse n’Isi binyuze mu guhuza u Rwanda ruri ku mutima wa Afurika n’icyambu cya gatatu mpuzamahanga gikora ku nyanja muri Djibouti, gikurikira icya Mombasa na Dar-es-Salaam.”

“Urebye icyiza ni uko tugiye gushaka abashoramari dushobora gukodesha, ku buryo uwo ari we wese wabufata yabukoresha mu buryo bwo kububyaza umusaruro mu buryo bw’ubucuruzi, ndetse hashyirweho n’imihanda igezweho ihuza Djibouti n’Umujyi wa Kigali, kandi muri iyo gahunda yo guteza imbere ibikorwa remezo, hongerwe n’ibikorwa by’inganda mu Mujyi wa Kigali.

Ubu 80% by’ibyo u Rwanda rutumiza n’ibyo rwohereza mu mahanga bica mu Muhora wo Hagati urimo icyambu cya Dar es Salaam kuko hari umutekano kandi hakaba hahendutse. Ni urwa gatatu mu bihugu binyuze ibicuruzwa byinshi kuri iki cyambu. Undi muhanda ukoreshwa ni ukuvana ibicuruzwa ku mupaka wa Mombasa muri Kenya.

Usibye ubutaka u Rwanda rwahawe muri Djibouti, hari n’ubundi rwahawe muri Kenya. Mu 1986 ubwo Kenya yayoborwaga na Perezida Daniel Arap Moi, yahaye u Rwanda ubutaka bungana na hegitari 12 (are 32), buherereye hafi y’icyambu cya Mombasa.

Gusa nyuma y’aho umucuruzi w’Umunya-Kenya, Salad Awale, ukorera i Mombasa yaje gutangaza ko ari ubwe, ko afite n’ibyangombwa bimwemerera kubukoresha mu gihe cy’imyaka 99 yahawe na Leta ya Kenya mu 1986.

Icyo kibazo cyageze mu Rukiko Rukuru muri Kenya maze umucamanza Anyara Emukule, afata umwanzuro ko ubutaka busubizwa Leta y’u Rwanda kuko ibyangombwa umucuruzi Awale avuga ko afite ari ibyiganano, nkuko byemejwe nyuma yo kugenzurwa na Komisiyo ishinzwe Ubutaka.

Urukiko rwavumbuye ko nta mukozi wa Minisiteri y’Ubutaka muri Kenya wigeze atanga ibyo byangombwa, maze buza gusubizwa u Rwanda.

Ubu Rwanda rwabonye impapuro zemeza ko rufite uburenganzira kuri ubwo butaka, ikiri gukorwa ni gahunda yo gutangira kububyaza umusaruro.

Ubutaka bushobora kwifashishwa ku buryo ibicuruzwa bijya cyangwa biva mu Rwanda bidatinda ku cyambu.

Kuva u Rwanda rwahabwa ubutaka ku cyambu kiri muri Djibouti, ntiburatangira kubyazwa umusaruro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .