Kuki uturere tw’imijyi tuza inyuma mu kwishyura mituweli kurusha utwo mu byaro?

Yanditswe na Ndahayo Emmanuel
Kuya 15 Nzeri 2020 saa 10:53
Yasuwe :
0 0

Ikigo cy’Igihugu gishinzwe Ubwiteganyirize mu Rwanda, RSSB, giherutse gutangaza imibare igaragaza uburyo ubwitabire bwo kwishyura ubwisungane mu kwivuza, mituweli, buhagaze mu gihugu.

Uturere two mu mijyi, turimo dutatu two muri Kigali na Rubavu, twaje mu myanya itanu ya nyuma ku rutonde rugaragaza uko uturere twishyura mituweli.

Kuva Umwaka w’Ubwisungane mu kwivuza watangira ku wa 1 Nyakanga 2020, Abanyarwanda 75.4% bamaze kwishyura mituweli.

Akarere kaza ku isonga mu kugira umubare munini w’abishyura mituweli ni Akarere ka Gisagara ko mu Ntara y’Amajyepfo kari ku mwanya wa mbere, kagakurikirwa n’Akarere ka Gakenke ko mu Ntara y’Amajyaruguru, mu gihe aka Nyaruguru ko mu Majyepfo kaza ku mwanya wa gatatu.

Akarere ka Kirehe k’i Burasirazuba kaza ku mwanya wa kane mu gihe akarere gaheruka muri utu dutanu twa mbere ari aka Nyamagabe na ko gaherereye mu Majyepfo y’u Rwanda.

Ku rundi ruhande, uturere dutanu twa nyuma mu kwishyura mu mituweli twiganje cyane mu mijyi, nyamara ari bo bakabaye bafite ubushobozi bwo kwishyura mituweli vuba.

Muri utwo turere, Akarere ka Rutsiro ni ko konyine katabarwa mu turere tw’umujyi.

Nk’ubu akarere gaheruka utundi ni aka Kicukiro, gaherereye mu Mujyi wa Kigali.

Rutsiro iza imbere ku mwanya wa 29 mu gihe akarere ka Gasabo na ko kari mu Mujyi wa Kigali kaza ku mwanya wa 28, kabanjirijwe na Nyarugenge bihana imbibi mu murwa mukuru w’u Rwanda, kari ku mwanya wa 27 ndetse na Rubavu iza ku mwanya wa 26.

Umuyobozi Ushinzwe Ubukangurambaga no kwandika abanyamuryango mu gashami ka Mituweli muri RSSB, Ntigurirwa Deogratias, yabwiye IGIHE ko uturere tw’imijyi tuza inyuma kuko ubukangurambaga bwo gushishikariza abantu kwishyura mituweli bugoranye mu mijyi.

Yagize ati “Icyo umuntu yavuga ni uko ibi bitabaye uyu mwaka gusa kuko n’umwaka ushize ni ko byari bimeze, ariko ahanini ugasanga biterwa n’uburyo mu mujyi usanga abantu bakunda kuzinduka bagenda bagataha ijoro ku buryo kubageraho ngo basabwe kwishyura bigoye, ikindi ni uko abo mu mujyi akenshi bakunda kwimuka bikagora rero kubakorera ubukangurambaga.”

Ubwisungane bwa mituweli bwishyurwa hakurikijwe ibyiciro by’ubudehe, aho leta yishyurira abari mu cyiciro cya mbere n’icya kabiri, naho abari mu cya gatatu bakiyishyurira 3 000 Frw mu gihe abari mu cya nyuma biyishyurira 7 000 Frw.

Leta iherutse gukora amavugurura mu mikorere ya mituweli, aho abishyuye mituweli bahita batangira kuyivurizaho bakimara kuyishyura, bitandukanye na mbere, aho abayishyuraga nyuma ya Kamena bategerezaga ukwezi kose nyuma yo kwishyura, ibintu byacaga intege ababonye ubushobozi bwo kwishyura mituweli igihe cyabarenganye.

Ibi kandi byanagiraga ingaruka ku buzima, kuko umuntu yashoboraga kuremba kandi yarishyuye mituweli, akazitirwa gusa n’uko ukwezi kutaruzura.

Ntigurirwa yahakaniye IGIHE ko iyi gahunda yaba yaratumye abantu birara ntiishyurire igihe nk’uko bigomba, kuko bumva ko igihe cyose bazagira ikibazo bazahita bishyura mutuweli bagatangira kuyivurizaho.

Yagize ati “Oya ntacyo [byahungabanyijeho] ahubwo umuntu yavuga ko byongereye icyizere mu baturage, kuko tariki ya 3 Nzeri [uyu mwaka] twari dufite ubwitabire bugeze kuri 75% mu gihe ku itariki nk’iriya umwaka ushize twari dufite 69%.”

Gahunda yo kwishyura ubwisungane mu kwivuza yatangiye muri 2003 igamije gufasha Abanyarwanda kubona ubuvuzi bwiza kandi buhendutse.

Uko amavuriro yegera Abanyarwanda ndetse bakagenda barushaho kuyagana, igiciro rusange cyo kwivuza cyarazamutse nyamara amafaranga abantu bishyura mituweli aguma ku giciro yariho na mbere.

Ibi byatumye serivisi z’ubuvuzi zishyurwa na RSSB gifite mu nshingano zacyo gukusanya imisanzu ya mituweli no kwishyura ibitaro kuri serivisi byahaye abanyamuryango ba mituweli, zizamura igiciro, bituma hazamo icyuho cya miliyari 20 Frw mu mafaranga RSSB yakira mu bwisungane n’ayo yishyura ibitaro byavuye abanyamuryango ba mituweli.

Ikibazo kimaze kumenyekana, leta yahise itangira gushaka uburyo iki cyuho cyazibwa, kuko RSSB yakoreshaga amafaranga avuye mu misanzu y’izindi serivisi itanga kugira ngo izibe cya cyuho cya mituweli, ibintu bitaramba kuko bishobora kugira ingaruka no ku bandi banyamuryango bishyuye imisanzu yabo neza mu zindi serivisi zitangwa na RSSB.

Kutagira amafaranga ahagije yo kwishyura ibitaro byatanze serivisi za mituweli, byatumye RSSB itinda kwishyura serivisi z’ibitaro “mu gihe kigera ku mezi ane cyangwa atanu” nk’uko byatangajwe na Minisitiri w’Ubuzima, Dr. Ngamije Daniel, wongeyeho ko ibi bidindiza serivisi z’ibitaro, rimwe na rimwe bigahanirwa amande z’ubukererwe bwo kwishyura amazi n’umuriro.

Leta yiyemeje gushaka uburyo buzakomeza gushyigikira iyi gahunda, burimo kongera amafaranga itangira abari mu cyiciro cya mbere n’icya kabiri, akava ku 2 000 Frw akaba 3 000 Frw.

Hari kandi ko leta izakomeza gutera inkunga ya miliyari 6 Frw iyi gahunda ndetse ibigo by’itumanaho bikajya bishyira 3% by’amafaranga byinjije ku mwaka muri iyi gahunda.

Hari kandi gukata 0.5% ku mishahara y’abakozi ba leta n’ab’ibigo byigenga n’andi mafaranga agomba kuzavanwa mu bindi bikorwa, yose hamwe akazaba miliyari 27 Frw, akazaziba icyuho gisanzweho muri mituweli ndetse anarusheho gutuma iyi serivise inoga kurushaho.

Ntigurirwa yavuze ko iyi gahunda yo gushaka andi mafaranga azaziba icyuho cya mituweli yatangiye gushyirwa mu bikorwa ariko ko hakiri kare kugira ngo umusaruro wayo upimwe.

Yagize ati “Itegeko ryasohotse muri Gashyantare [uyu mwaka] kandi inyinshi muri ziriya nkunga zishyurwa buri gihembwe, ubu rero haracyari kare kumenya ingaruka byagize kuri mituweli ariko buriya nk’uyu mwaka urangiye, mu ntangiriro z’utaha bizaba bimaze kugaragara neza, ingaruka [byagize] zibasha kugaragara.”

U Rwanda ni kimwe mu bihugu bya Afurika byafashije gushyiraho uburyo rusange bwo kuvura abaturage barwo kandi buhendutse, ikintu cyatumye serivisi z’ubuzima zitera imbere. Bimwe mu byagezweho kubera kwivuza kare harimo gahunda yo gukingira abana, ikorwa ku barenga 90% by’abari mu Rwanda, harimo kandi kugabanya umubare w’abagore n’abana bapfa bavuka.

Ibi kandi byanazamuye icyizere cy’imyaka yo kubaho mu Rwanda, igera kuri 69 uyu mwaka.

RSSB ivuga ko uturere two mu mijyi ari two tuza inyuma mu bwitabire bwo kwishyura mituweli

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .