Laboratwari igezweho igiye kwifashishwa mu kugenzura ubudahungabana bw’ikiyaga cya Kivu

Yanditswe na IGIHE
Kuya 15 Ukwakira 2020 saa 10:12
Yasuwe :
0 0

Leta y’u Rwanda irimo kubaka Laboratwari ifite agaciro ka miliyari zisaga ebyiri z’amafaranga y’u Rwanda, izakoreshwa muri gahunda yo kugenzura ubudahungabana bw’Ikiyaga cya Kivu, kugira ngo kirusheho kubyazwa umusaruro mu buryo burambye.

Ikiyaga cya Kivu gifite umutungo kamere wihariye kandi ufite uruhare runini mu iterambere ry’ubukungu bw’u Rwanda. Mu rwego rwo kuzamura ubukungu no guteza imbere imibereho myiza y’Abanyarwanda, umutungo kamere wo mu kiyaga cya Kivu ubyazwa umusaruro binyujijwe mu burobyi bw’amafi, ubw’isambaza, ubucukuzi bwa gaz methane, imyidagaduro n’ibindi bitandukanye.

Ibikorerwa muri iki kiyaga byose, bigomba gukoranwa ubushishozi kugira ngo bidahungabanya imiterere yacyo karemano, bikagira n’ingaruka ku binyabuzima bikibamo n’ibigikikije ndetse byanagira ingaruka ku bukungu bw’igihugu muri rusange.

Leta y’u Rwanda, binyujijwe muri Sosiyeti ishinzwe guteza imbere ingufu (EDCL) ibarizwa muri Sosiyete y’u Rwanda ishinzwe ingufu (REG), irimo kubaka Laboratwari izakoreshwa na “Gahunda ishinzwe kugenzura ubudahungabana bw’Ikiyaga cya Kivu (Lake Kivu Monitoring Program – LKMP)”.

Umuyobozi wa gahunda yo gukurikirana ubudahungabana bw’Ikiyaga cya Kivu, Umutoni Augusta, yabwiye IGIHE ko iyi Laboratwari yitezweho kwifashishwa gukora igenzura mu buryo bwa gihanga, bunoze kandi buteye imbere.

Ati “Igenzura twari dusanzwe turikora, twibandaga cyane cyane ku mpinduka zaterwa n’ubucukuzi bwa gaz methane bwakorwaga n’uruganda rumwe rwa KivuWatt. Mu minsi iri imbere hazatangira urundi ruganda rwitwa Shema Power Lake Kivu Ltd ruzakurikirwa n’urundi rwitwa GazMeth, murumva ko akazi kaziyongera, bityo tugakenera umwanya wo gukoreramo munini n’abakozi barenze abo twakoreshaga muri iki gihe”.

Umutoni avuga ko mu igenzura bakora, barebera ahantu henshi kugira ngo bizere neza ko nta cyangiza imiterere y’ikiyaga cyaturuka ku bucukuzi bwa Gaz methane, buramutse bukozwe mu buryo butanoze.

Hari ubugenzuzi bukorerwa ku nganda ziri ku kiyaga, hakaba ubukorerwa mu mazi y’ikiyaga, hafi y’inganda ndetse n’ubukorerwa ku Kiyaga cyose.

Umutoni yongeyeho ati “Iyi Laboratwari iziye igihe kuko niba twajyaga dukora igenzura ku ruganda rumwe, no hafi yarwo gusa, birumvikana ko uko inganda zigenda ziyongera ni ko hazabaho kwiyongera kw’abakozi bakora igenzura, ukw’ibikoresho by’ubugenzuzi, ndetse n’umwanya munini wo gukoreraramo no gushyiramo ibyo bikoresho.”

Avuga ko Ikiyaga cya Kivu ari ikiyaga kidasanzwe, nta kindi giteye nkacyo ku isi, bityo, abashakashatsi benshi bifuza kugikoraho inyigo. Iyo laboratwari izafasha mu kongera imikoranire n’izo mpuguke zo ku isi, zifuza kwiga kuri icyo kiyaga.

Iyi Laboratwari niyuzura kandi izajya ikoreshwa mu rwego rwo guhugura abanyarwanda bahabwa ubumenyi butandukanye nko mu bijyanye n’ibinyabuzima, ubutabire, ubumenyi mu by’ubutaka n’ubugenge, kuko bimwe mu bikoresho bizaba birimo nta handi biba mu Karere k’ibiyaga bigari.

Iyi laboratwari irimo kubakwa mu Karere ka Rubavu, biteganywa ko izuzura mu mwaka utaha.

Uko Laboratwari izaba imeze niyuzura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .