MINEDUC yateguje ko hashobora gufatwa undi mwanzuro mu gihe hagira amashuri agaragaramo Covid-19

Yanditswe na Iradukunda Serge
Kuya 26 Nzeri 2020 saa 03:07
Yasuwe :
0 0

Minisitiri w’Uburezi, Dr Uwamariya Valentine yatangaje ko mu gihe amashuri yaba afunguye hakagira umunyeshuri ugaragaraho icyorezo cya Covid-19, bishobora gutuma hafatwa undi mwanzuro.

Ibi Dr Uwamariya yabitangaje kuri uyu wa 26 Nzeri mu kiganiro yagiranye na RBA . Ni mu gihe hashize umunsi umwe inama y’abaminisitiri iteranye, ikemeza ko “amashuri azafungura mu gihe cya vuba hakurikijwe ibyiciro byayo."

Minisitiri w’uburezi yabigarutseho ubwo yari abajijwe ibigendanye n’ingengabihe amashuri yisumbuye azagenderaho mu gihe azaba afunguye, cyane ko icyorezo cya Covid-19 cyatumye iyo yari asanzwe agenderaho ihinduka.

Mu gusubiza, Dr Uwamariya yavuze ko bakiri gutegura ingengabihe amashuri azagenderaho ariko anemeza ko ishobora kurogowa, mu gihe mu mashuri haba hagaragaye ubwandu bwa Covid-19.

Ati “Nubwo tuvuga gufungura ushobora no gutanga iyo ngengabihe ariko icyorezo cyakongera kugaragara mu mashuri amwe n’amwe cyangwa hari indi mpamvu ibiteye tubigiriwemo inama na minisiteri y’ubuzima, hakaba igihinduka.”

Yakomeje asaba ko mu gihe amashuri azaba afunguye, yazita no ku buryo bwo gukaza ingamba zo kwirinda.

Yagize ati “Nubwo tuvuze ngo amashuri arafunguye ntibikuraho bwa buryo bw’ubwirinzi ndetse dukwiriye no gukaza kurushaho kugira ngo bikomeze biduha umwanya wo gukomeza dutegura n’ibindi bikurikiraho, uko dufungura dukomeze no gukaza ingamba. Niyo mpamvu nsaba n’ababyeyi ntibabirekere amashuri gusa.”

Hazarebwa uko muri Kaminuza bizagenda

Minisitiri w’Uburezi yavuze ko bahisemo ko amashuri makuru na kaminuza ariyo yabimburira andi gufungura kubera ko yo yasaga n’arangije umwaka. Uretse iyi, indi mpamvu ngo ni ukugira ngo azabahe ishusho bazagenderaho bafungura mashuri abanza ayisumbuye n’ay’incuke.

Yagize ati “Amashuri makuru na kaminuza basaga n’abagiye kurangiza umwaka, turashaka kugira ngo barangize umwaka aho bari bagejeje ariko cyane cyane binaduhe n’ishusho y’uko byagenda mu gihe twaba tugenda dufungura n’andi mashuri mu byiciro.”

Yakomeje avuga ko mu Ukwakira hagati, Kaminuza izagaragaza ko yujuje ibisabwa izemererwa gusubukura amasomo.

Ati “Buriya muri kaminuza n’ubundi ntabwo zose zitangirira ku itariki imwe, bivuze ngo ishuri rizaba rifite ubushobozi ryabigaragaje, ryiteguye guhera hagati mu Ukwakira ryatangira.”

Minisiteri y’uburezi ivuga ko kaminuza zizatangira amasomo bitarenze Ukwakira, nyuma zikazakurikirwa n’amashuri mpuzamahanga azagaragaza ko yujuje ibisabwa, ibizava mu gutangira kw’aya mashuri akaba ari nabyo bizagenderwaho mu gufata ibyemezo byatuma n’andi afungura.

Umuyobozi Mukuru wa REB, Dr Ndayambaje Irénée, aherutse kubwira IGIHE ko mu gihe amashuri azaba afunguye, usibye ibijyanye n’isuku ku mashuri mu kwirinda Coronavirus, hari byinshi bizahinduka birimo imyigishirize izajyanishwa n’ikoranabuhanga.

Aha Minisitiri w'Uburezi, Dr Uwamariya yafashaga abanyeshuri bahuye n'ibibazo ubwo amashuri yafungaga muri Werurwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .