Minisante yaciye amarenga y’ubwandu bushya bwa COVID-19 mu masoko yo kwa Mutangana no mu rya Nyarugenge

Yanditswe na Rabbi Malo Umucunguzi
Kuya 2 Ukwakira 2020 saa 12:49
Yasuwe :
0 0

Minisitiri w’Ubuzima, Dr Ngamije Daniel, yaciye amarenga ko hashobora kuba hari ubwandu bushya bwa COVID-19 mu masoko yo kwa Mutangana n’isoko rya Nyarugenge, nyuma y’iminsi yongeye gufungurwa, kuko hari iminsi yafunzwe ngo abanze aterwe imiti, n’abayakoreramo bapimwe.

Muri Kanama nibwo muri ayo masoko hagaragaye ubwandu buri hejuru bwa Coronavirus bituma yombi afungwa. Icyo gihe isesengura rya Minisante ryari ryagaragaje ko hariho ugutezuka mu gukurikiza amabwiriza yo kwirinda Coronavirus, aho muri ayo masoko abantu batambara udupfukamunwa, abandi bakatwambara nabi ndetse ntibanakarabe uko bikwiriye.

Mu kiganiro yagiranye n’itangazamakuru kuri uyu wa Gatanu, Dr Ngamije yavuze ko mu kugenzura uko ubwandu bwa COVID-19 buhagaze mu gihugu, muri iki cyumweru habayeho uburyo bwo gupima abantu bagenda mu Mujyi wa Kigali no mu binjira mu Mujyi wa Kigali mu bice bya Giti cy’inyoni, Gahanga, Kabuga na Gatsata, kimwe no mu masangano y’imihanda mu Mujyi wa Kigali.

Yavuze ko mu bantu bageze ku 2000 basuzumwe, abantu babiri aribo bari bafite COVID-19.

Ati “Ibyo bigaragaza ko niba usuzumye abantu 2000 ukabonamo babiri gusa mu bantu muhuye nta gahunda ufitanye nabo, bigaragaza ko ubwandu budakanganye, ko abantu barimo gushyira mu bikorwa ingamba zo kwirinda COVID-19.”

Yakomoje no ku bwandu mu masoko yo kwa Mutangana no mu isoko rya Nyarugenge, avuga ko bongeye kuhafata ibipimo, ariko ibizamini by’ibanze bigaragaza ko ibisubizo atari byiza nko mu bantu bapimiwe mu muhanda.

Ati “Mu bantu 250, abagera ku 162 nta kibazo bari bafite, ariko abandi turashaka gusubiramo ibipimo byabo, kugira ngo tumenye ngo abo dukeka ko banduye barangana gute? Ariko ntabwo imibare yabo ari myiza nk’iy’abantu twasuzumye mu muhanda.”

Biteganyijwe ko imibare yabo imenyekana kuri uyu wa Gatanu mu ijoro.

Minisiteri y'Ubuzima yagaragaje ko mu masoko yo kwa Mutangana na Nyarugenge hashobora kwaduka ubwandu bwa Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .